Salmos 37:20-39

²⁰Yashingchich tputs izuuru kurayaru, muchinlliniya. Karutaa puza tirookuch, kurataru ashiru kurachiya. Amb ashkachu, Apanll undarar izuuru pastachiya. Msas ashiru mzeetaru tsípatara ashchinllinaya.

²¹Tputs yashingchich maacheetsi yáyaritaatssin, itaru nda tuwanpukanaya. Itaru, Apanllchichsha maacheetsi yaksin, aranginasha tuwanpukanaya.

²²Yuwaa Apanll tputsee kis napku, anoo tputs watsapun wanasir ksutkiya. Itaru, yuwaatssha nda kis napku, anoo watstamari kapeetchiya. Nda istachiya.

²³Ashiri tputs Apanllee chinaku, Apanllee kuk payuku, anoo Apanll machkiya. Wanungish wanasirimshish machkiya.

²⁴Yashing xarashshee wayaktaa, nda izuuru pantsakiya. Watam Apanllsha uwpat putayaru, tuxiyzakuwa.

²⁵Nuw kanungasimasi taaranguri, itaru natsha wachinayanllina. Apanllee tiptsir uru yasakuri, Apanllsha waanaatsi tiptsir nda minamtiyam kasarangiya. Tiptsireemsha pishtats ndunimuna; tputsish pangaa nda mashtaranaya. Wipaamtamsha katungats nduntam pishtarangiya.

²⁶Ashiriya, tputs Apanllee chinaksin, nayanimpatari taaksin, tputseem mangutari maachiritaa istakiya. Ashirucha, wipshtisin ashiritam tputseem mangutaritam istakitamanaya.

²⁷Ashiri yutaritshishee mapiyngtsa. Saanaatsi wanasir ksutangtsa. Ashkus, waanasirimshee pangatssa. Yap tsap taakamchis anush uru kis taatssa.

²⁸Apanll tputsee tsiyatssee yaramapani chinakiya. Waanaatsee tiptsir nda ayamtaati kasachiya. Itaru, yutaritshishpanee izureeru waneeyaru, kasachiya. Nlluranur izuuru pastachiya.

²⁹Itaru, Apanllinaa tiptsir urutamari tsapurunasush kis taachinllinaya.

³⁰Ashiri tputs wanasirimish uru mangpatari wanasiri tputsee tsiyatkanaya. Tsiyatssee wanasirimsheetsimari yarkanaya.

³¹Apanllee kuk izuuru chinaksin, nda pantsakanaya. Uru tachitkanaya.

³²Tputs yutaritshishpan Apanllee tiptsir natsaku, pachapi, átu pachamaam tsangakiya.

³³Itaru, Apanllsha tiptsiree nda kasakiya. Tputs kurakap tputsee wanasirimshee tupantsamaam tsiyatkitaateesinaya, Apanll waana tapachindachiya. Kurak tputsireetsi tayutarittapa, átu ashkiya.

³⁴Ashiri siysa Apanllee chinangtsa. Kukoo tuminungtsa. Ashkachus, tputssha siyamun mang' tatchinlliniya, Ashiri Apanll siyaamanaa tsapuneemis ksutamaam panachiya. Itaru, yutaritshishpani waneekchu, anoo siysa kchiptartis pangatssa.

³⁵Nuw tputsee yutaritshishpanee parangina. Nuw kizpurtana. Nuwamari kasirina, tárangiya. Yasin tamatarpari ashiru natumasamaam pzeena, pzeena sheeru, támungayaru, wanasir wayanaptaru ashiru taarangiya.

³⁶Amb ashirangtaa, itaru musásiri izuuru tsiparangu, nuwsha nachungaranguri, nda ayamtiyam parangina.

³⁷Mazinangtsa. Tputs wanasirimish Apanllee kuk payuksin, urutari Apanllish pang' mang' ksaw wanasir taachinlliniya.

³⁸Itaru, Apanllsha yutaritshishpaneetssha tputs ashpaatsiri tpachingachiya. Ayamtaati tputsee mantsirimshee pangcheezich, ndambaree. Ichingaru Apanll wanichiya. Izuuru kachingeeru kasachiya.

³⁹Yuwash yutarit tushiychu anush Apanll waanaatstanaa tiptsir tapachindachiya. Apanll watacha tapachindampani.