SALMOS 34:13-22

¹³Bwíakze da' ẕchaḻjo' nich bi nnio' da' ẕinnj, na' nich bi wchaḻjo' da' wen laže'.

¹⁴Bzoa cheḻa'ale da' bi nak chawe' da' ẕchaḻjo', na' ben da' nak chawe'. Ben byene so' ḻo yeḻa' ẕga'n chawe', na' ben ka nak chen.

¹⁵Ẕwíakze X̱anžo Dios benne' ka' zej nake' chawe', na' ẕze nage' da' ẕnnábgekle' Ḻe'.

¹⁶Ẕža'a X̱anžo Dios benne' wen da' ẕinnj ka', na' bi soa no benne' chejsá' ḻaže'e ḻégake'.

¹⁷Benne' chawe' ka' žḻížgake' X̱anžo Dios, na' Ḻe' ženle' chégake', na' žeslé' ḻégake' ḻo yógo'te da' ẕzáka'gake'.

¹⁸Gawze zoa X̱anžo Dios gan zej nnita' benne' ka', benne' žak nyache' ḻáže'gake', na' žeslé' ḻégake'.

¹⁹Da' zanḻe'e da' ẕzaka' benne' chawe', san žeslá X̱anžo Dios ḻe' ḻo yógo'te da' ka'.

²⁰Ḻe' žape chi'ikze' yógo'te žit yo'o bennen', na' nitó žit chie' bi gachjwn.

²¹Da' ẕinnj da' žon benne' bi nake' chawe' goten ḻe', na' kwia yi'gak benne' ka' ẕží'igake' chegak benne' chawe' ka'.

²²X̱anžo Dios ẕzoa chawe'e be' da' nákgakkze benne' wen žin chie' ka', na' yógo'te benne' ka' žx̱en ḻáže'gake' Ḻe' batkle kwia yí'gake'.