Salmos 30:1-11

¹Diospa Wasinta inaurananpaj David isquirbishan alabansa. Ñacaycajta jorgamashayquipitami Tayta Dios gamta alabä. Chiquimajcuna cushicunantaga manami munashcanquichu.

²Tayta Dios, ruwacur mañacuptë allchacächimarayqui.

³Tayta Dios, gammi wañuypita salbamashcanqui. Wañojcuna chayashanman mana chayanäpaj cawachimashcanqui.

⁴Tayta Dios munashanno goyaycajcunaga paypaj cantar alabay. Juchaynaj Tayta Diosta alabay.

⁵Payga rätullami rabyan. Alli cayninmi ichanga imaypis mana ushacanchu. Chacaypa wagashpanchïpis tutapaga cushicushunnami.

⁶Nogaga jauca goyashpä yarparä «manami imapis päsamangachu» nir.

⁷Gammi Tayta Dios alli cashpayqui nogataga alli pachaman tiyachimarayqui. Cachaycamaptiquimi ichanga manchariyllawan ima ruraytapis mana camäpacushcänachu.

⁸Tayta Dios gamtami mañacamö. Gamtami ruwacamö.

⁹Noga wañuptë ¿imataraj gänanqui? Wañushanaga manami alabashunquinachu. Ni alli cashayquitapis mananami willaconganachu.

¹⁰Tayta Dios, wiyamashpayqui cuyapaycamay ari. Tayta Dios, yanapaycamay ari.

¹¹Fiyupa llaquicuycho caycaptëmi cushicuyta churamushcanqui. Lütu röpata lojtiparcamar fistapaj caj röpatana jatiparcamashcanqui.