Salmos 30:1-11

¹Gucá'ana szrena' Lue', Xran, lawe' da bechisu' neda', ne quebe bnézruju' lataj benne' ca' dxeledábague̱' neda' xelún le̱' chia'.

²Xrana' Dios, bláwizra' Lue', na' bexunu' neda'.

³Xran, bseláu' neda' lu lataj ba xa'. Bexunu' neda' chee̱ quebe chu'a xe̱dxu ba.

⁴Le gul-la chee̱ Xránadxu, le'e nácale benne' cheé̱queze̱'. Le xe̱ Le̱': “Xcalenu'”, ne dxajsá lázrele naque̱' lá'azxa,

⁵lawe' da tu chí'idauze dxezré̱'e̱ san chadía chacanna zua xel-la' zri'i lazre' chee̱'. Wabézredxu tu zreze, san che zílala wabéle̱'e̱dxu.

⁶Gate guzúa chawa' gunnía': Quebe nu seque' gutá neda',

⁷lawe' da bze̱ chuchu' neda', Xran, ca tu xi'a zren, ne blé'enu' neda' cháwedau'. Gate bcache lau', na' guzúa' ste̱be.

⁸Xran, guláwizra' Lue', ne gata' xueda' Lue'.

⁹¿Bizra da ba neza gaca na chiu' che gatia', ne chu'a xe̱dxu ba? ¿Güe lá'ana' Lue' gate ba naca' xu xrte? ¿Waca nu guzenda' da li chiu'?

¹⁰Bze̱ naga neda', Xran, ne bexache lazre' neda'. Xran, gúcale̱ neda'.

¹¹Be̱nu' bexaca xel-la' dxebezre chia' xel-la' wexá'a. Bcuasu' xel-la' dxewí'ine lazre' chia', ne bzu' chia' xel-la' dxebé.