Salmo 30:1-11

¹Apo, daydayawek sik-a, tan sin kateyak yan inmisalakan ka. Adim inpalobos ay din kalaban et lomaslasoy da.

²Nankedawak si badang mo yan inmagas ka, Yahweh ay Diyos ko.

³Dandani ay mapospos din leng-ag ko, ngem inmisalakan ka sin pese, Apo.

⁴Mankanta koma din napodno ay ipogaw mo, idaydayaw da koma din nasantoan ay ngadan mo.

⁵Tan sinkaattikan yan mamaga din bonget mo, ngem engganas tongpal biyag din seg-ang mo. Olay mo maninsinlabiak ay man-oga, ngem manragsakak sin kaagsapaana.

⁶Sin timpo ay mayat din biyag ko, kinwanik sin nemnem ko, “Maga polos di problima ay domteng sin biyag ko.”

⁷Gapo sin seg-ang mo, kamanak dakdake ay dontog ay insaad mo. Ngem idi binmaybay-an ka, Apo, palalo di egyat ko.

⁸Nan-adawagak en sik-a, Apo, et kinwanik sin kararag ko,

⁹“Sino pay di magon-od mo, mo mateyak et sin kad-an di natey di emeyak? Ay din natey yan dayawen daka ya dad-aten da ay matalek ka?

¹⁰Dengngem koma din kararag ko, maseg-ang ka ta bomadang ka, Apo.”

¹¹Et siya na di inyat mo, nanbalinem si ragsak din ladingit ko, isonga kinaan ko din inbabadok ay sako yan nay mansalsalaak begew sin ragsak ay indawat mo.