Kölfel 30:1-11

¹Echö än Tafit köl. Echö köl fän iten apinipinin ewe imwenfel. Ai Samol mi Lapalap, üpwe ingeituk, pun ka amanauaei, nge kosap mwüt ngeni ekewe chon pälüeniei pwe repwe ämängauaei.

²Ai Samol mi Lapalap, ai Kot, üa siö ngonuk pwe kopwe alisiei. Iwe, ka apöchökülaei.

³Ai Samol mi Lapalap, ka angeeitä seni peias. Üa fetal ngeni ewe lenien sotup, nge en ka amanauaei.

⁴Oupwe kölün mwareiti ewe Samol mi Lapalap, ämi nöün kewe chon pin. Oupwe chechemeni Ewe mi Pin o kilisou ngeni.

⁵Pun a mochomoch fansoun an song, nge an kirikiröch a wor lon unusen fansoun manauen eman aramas. Lepwin a fis kechü, nge lesosor a fis pwapwa.

⁶Lupwen üa nom lon nükünüköch, üa apasa, “Üsap fokun mwökütüküt.”

⁷Ren om kirikiröch, ai Samol mi Lapalap, ka anükücharaei usun eu chuk mi pöchökül. Nge lupwen ka amona mesom seniei, üa fokun niuokus.

⁸Ai Samol mi Lapalap, üa siö ngonuk. Üa tüngor ngonuk pwe kopwe alisiei.

⁹“Met sokun win kopwe angei, are üpwe mäla o tolong lon peias? Ifa usun, chon mäla repwe tongeni mwareituk? Ifa usun, repwe tongeni apworausa usun om allükülük?

¹⁰Ai Samol mi Lapalap, kopwe aüselingaei o ümöümöch ngeniei. Ai Samol mi Lapalap, kopwe alisiei.”

¹¹Iwe, ka awili ai ngüngüres ngeni pwörük, ka pwiliti seniei üfei üföüfen letipeta o aüföüfa ngeniei pwapwa.