Salmos 18:7-49

⁷Nadxa guzrú' lu xe̱zr la xu nigá. Gulezrize lane xi'a ca'. Gulezrízele̱'e̱ na lawe' da bzra'a Le'.

⁸Bdxuaj zren chee̱ xi' lu zrine̱', ne bdxuaj xi' lu dxu'e̱ da bzezxe na da de̱ lawe̱', na' xi' na' gudel-la na bau ca'.

⁹Bzéxruje̱' da zria zran xabáa, na' bétaje̱', na' guzúa da chul-la zran ni'e̱.

¹⁰Gudée̱' lu be' zrie̱' tu da nazí le na querubín. Chadí gudée̱' lu be' bdunu'.

¹¹Gúcue̱' da chul-la, da bcache na Le̱', da na' naca na beuj bza da xuzru na nisa.

¹²Lu da dxácatite legala chee̱' da xu'u lu beuj bza, na' beledxúaj bau dxelala, ne xiaj bezxe'.

¹³Zran xabáa gunné̱ guziu' chee̱ chi'i Xránadxu, na' ben chi'i Dios szrente̱ ládujla bau dxelala ca', ne xiaj bezxe' na'.

¹⁴Bsane̱' xaga nalá xéche'ze chee̱' ca', na' be̱se dínnaje̱' benne' ca' dxeledábague̱' neda'. Bsane̱' xesa guziu' ca', ne bzria xi'e̱ benne' ca'.

¹⁵Nadxa belelá' da zaj de̱ lu situj chee̱ nísadau', ne ble'e lau lane xe̱zr la xu da zua na zran nísadau', gate na' gudil-lu' benne' ca' dxeledábague̱' neda', Xran, ne lu xel-la' dxezrá'a chiu' bzagu' benne' ca'.

¹⁶Bétaje̱' lu da sibe, ne bequé̱'e̱ neda'. Bebéaje̱' neda' lu da naca ca tu nisa zila.

¹⁷Bselé̱' neda' lu na' benne' wal-la dxeledábague̱' neda', ne lu na' benne' ca' dxelecuídene̱' neda', benne' zaj nácadxe̱' wál-la ca neda'.

¹⁸Buluzague̱' neda' gate na' zua' lu da sté̱bele̱'e̱, san Xrana' Dios gúcale̱ne̱' neda'.

¹⁹Bebéaje̱' neda' naga xu'a, ne bzue̱' neda' tu lataj zren. Bselé̱' neda' lawe' da bezaca ba lazre̱' chia'.

²⁰Xránadxu Dios bexunne̱' chia' cáte̱ze naca da xrlátaje da nuna'. Cáte̱ze naca da xrlátaje da nuna' bexunne̱' chia'

²¹lawe' da dxuna' ca da dxuse̱de Xrana' neda', ne quebe guleaj xíchaja' Dios chia'.

²²Dxuna' ca naca da dxenná bé'ene̱' neda', ne quebe bsana' da ca' nadxíxruj be'e̱.

²³Guca' li lazre' lau Le̱', ne bxue cuina' chee̱ quebe guna' da cale̱la.

²⁴Chee̱ le̱ na' bexunna Xránadxu Dios chia' cáte̱ze naca da xrlátaje da be̱na', cáte̱ze naca da xrlátaje da nuna' lau Le̱'.

²⁵Dxexache lazru' chee̱ benne' dxexache lazre̱' le sa' ljwezre̱', ne nacu' li lazre' nen benne' naque̱' li lazre'.

²⁶Dxunu' da naca chawe' chee̱ benne' naque̱' chawe', na' gacu' snia nen benne' we̱n da cale̱la.

²⁷Guseláu' benne' zaj zue̱' lu da zi' da xa', san guzéxruju' benne' dxulucá'ana szren cuine̱'.

²⁸Lué'queze guzalju' xi' chia'. Xrana' Dios, guzani'u chia' naga zua' lu da chul-la.

²⁹Nen xel-la' waca chiu' guzría xi'a benne' zante̱ dxeledíl-lale̱ne̱' neda'. Che Lue', Dios, súale̱nu' neda' waca guchínnaja' ze'e da zaj naxechaj xe̱zre ca'.

³⁰Li lazre' zaj naca da dxun Dios, na' du lazre' naca xrtizre̱'. Dxucu'uje̱' xúgute̱ benne' ca' dxelebeza lazre̱' Le̱'.

³¹Tuze Xránadxu naque̱' Dios. Tuze Dios chee̱dxu naque̱' Benne' dxucu'uje̱' dxi'u.

³²Dios naque̱' Bénnea' dxune̱' neda' benne' wal-la, ne Benne' dxune̱' li lazre' da dxuna' neda'.

³³Dxune̱' ni'a ca zaj naca ni'a bzrina' xixre' ne dxuzúa chúchue̱' neda' lu xi'a Sión chee̱'.

³⁴Dxusé̱dene̱' neda' chee̱ gaca cha'a lu wedil-la, ne̱ chee̱ gaca guchíneda' xaga nalá xéche'ze da naca na xia gache'.

³⁵Lu xel-la' weselá chiu' bcu'uju' neda', ne nen na'u xabe̱la gúcale̱nu' neda'. Xel-la' zri'i lazre' chiu' ba nucá'ana szren na neda'.

³⁶Be̱n chawu' neza naga tea', chee̱ quebe cuila' lu neza na'.

³⁷Blaga' benne' dxeledábague̱' neda', na' xeajzrena' le̱', na' quebe bebi'a cadxa bé̱tetea' benne' ca'.

³⁸Be̱na' benne' ca' we̱', na' quebe guca xelexase̱'. Xeajlecházie̱' zran ni'a.

³⁹Btipu' lazra' chee̱ cha'a lu wedil-la. Bzéxruju' benne' dxeledábague̱' neda' zran ni'a.

⁴⁰Be̱nu' buluzrunnuj benne' dxeledábague̱' neda' lawa', chee̱ bzria xi'a benne' ca' dxelecuídene̱' neda'.

⁴¹Gulenné̱' nu benne' gácale̱ne̱' le̱' san quebe nu chilá'. Gulenné̱' Xránadxu Dios, san quebe benne̱' chee̱'.

⁴²Bzúzruja' benne' ca' ca bxrte xu da dxua be'. Bléaja' le̱' ca dxuléaja' guna' la neza ca'.

⁴³Bseláu' neda' lu na' benne' ca' dxeledábague̱', na' be̱nu' neda' benne' xíchaje̱ xe̱zr la xu ca', na' benne' ca' quebe núnbe'a dxelune̱' zrin chia'.

⁴⁴Gate belenne̱' chia', na' buluzúe̱' xrtizra'. Benne' zaj zra' xe̱zr la xu ca' belune̱' ca gunná be'eda'.

⁴⁵Benne' zitu' ca' gulate ni'a ne̱'e̱, na' beledxúaje̱' dxelezrízie̱' lu xe̱zre zrentau' chee̱' ca'.

⁴⁶Gaca ba lá'azxa Xránadxu Dios. Gaca ba Bénnea' dxucu'uje̱' neda'. Xegá'ana szrénqueze Dios, Bénnea' dxuselé̱' neda'.

⁴⁷Naca Dios Bénnea' dxebéaj lazre̱' benne' dxeledábague̱' neda', ne dxuzúe̱' benne' ca' zran ni'a.

⁴⁸Naque̱' Bénnea' dxuselé̱' neda' lu na' benne' ca' dxeledábague̱' neda'. Dxune̱' dxenná be'eda' benne' ca' guledábague̱' neda'. Bselé̱' neda' lu na' benne' xichaj zra'a ca'.

⁴⁹Chee̱ le̱ na' xeche̱ba' chiu', Xran, lau benne' xe̱zr la xu ca', na' gúl-laqueza' chee̱ Lau' Lue'.