YƐSÃÃ 18:7-49

⁷Dɛ̀ do n di kɛ̀ n yú Kuyie nku, kɛ́ ku nkuɔ́nnɛ̀, kɛ̀ kùu keè n tɑmmɛ̀ ku cĩ́ɛ̃̀tɛ̀ miɛkɛ, kɛ̀ m bɑ́ɑmmìi tuɔkoo ku borɛ̀.

⁸Kɛ̀ kɛtenkɛ̀ɛ ɑɑ́, kɛ̀ yɛtɑ̃rɛ̀ɛ sɑ̃ntɛ̀ kɛ́ɑɑ́, ku miɛkɛ pɛikɛ mɛ̀ɛ̀ kpɛ́í.

⁹Kɛ̀ kuyukú nyiɛ̀ní Kuyie nwũɔ̃̀, nkɛ̀ fɛhɑ̃ɑ̃dɛɛ̀nfɛ̀ yìɛ̀ní ku nùù nɛ̀ ihɑ̃ɑ̃pɛ́m̀pɛ́rí.

¹⁰Kɛ̀ kùu bíi ntiwɛtì kɛ́cútɛ́ní, kɛ́ncutiní kɛ nɑ yɛwɛtisùɔ̀.

¹¹Kɛ dekɛ oĩ́nkɛ̀mbɑ̀rì, kɛ puù, kɛ́mpùtì kuyɑɑkù miɛkɛ.

¹²Kɛ̀ yɛwɛtisùɔ̀ kù fitɛ́, kɛ̀ yɛwɛtɛ̀ diɛyɛ̀ kù cɛ̃̀ɛ̃̀tɛ, kɛ̀ dɛ̀ sɔ̀ù kɛ dò ndibinni cũmpuri.

¹³Kɛ̀ kuwenniku diɛkù yìɛ̀ní ku ììkɛ̀ Kɛ̀ yɛwɛtɛ̀ pɛ̃nkù nɛ̀ yɛmɑ́tɑ̃́rɛ̀ nɛ̀ ihɑ̃ɑ̃pɛ́m̀pɛ́rí.

¹⁴Kɛ̀ ti Yiɛ̀ nKuyie mpɛ́ú kɛĩ́nkɛ̀ fɛtɑɑfɛ̀ kɔ̃mɛ, kɛ̀ bɛ̀ yo Kuyie nkùu bɑkɛ́ kɛĩ́nkɛ̀ nɛ̀ kɛtenkɛ̀ ku tɑmmɛ̀. Kɛ̀ fɛtɑɑfɛ̀ mɑ́tɑ̃́rɛ̀ duòní, kɛ̀ muhɑ̃ɑ̃́ ncɔ́ú.

¹⁵Kɛ̀ fɛtɑɑfɛ̀ nwéí tipíìtì timɔu, kɛ̀ Kuyie ntɑ̃ũ ku pie ntipíìtì timɔu.

¹⁶Kɛ̀ kùu pɛɛ kɛ̀ dɑ̀mɛ́ɛ̀rì fũ̀ɔ̃̀ feitɛ́, kɛ̀ kùu wei kɛ̀ kɛtenkɛ̀ miɛkɛɛ feitɛ́.

¹⁷Kɛ̀ kùu youtɛní ku nɔ̀ùtɛ̀ kɛĩ́nkɛ̀, kɛ n yṹɔ̃́ mmɛniɛ mmiɛkɛ kɛ́dennɛní.

¹⁸Kuù n dɛɛrínɛ̀ n dootitɔbɛ̀, nɛ̀ n sĩ̀mbɛ̀ bɛ̀ɛ̀ wɛ̃rímú pɛ̃ɛ̃tɛ́ n kɔ̃mu.

¹⁹N do bo mɛsémmɛ̀ miɛkɛ nkɛ kɛ̀ bɛ̀ n cɛ̃̀ɛ̃̀tɛ, kɛ̀ Kuyie mmɛ nní nni mbonɛ̀.

²⁰Kɛ n dènnɛní difɔ̃̀tìrì miɛkɛ, kɛ nh òmpùnnɛ kù n dɔ́ mɛ̀ɛ̀ kpɛ́í.

²¹Kuyie nni nyietí n dɔɔri mɛ̀mmɛ dɛ̀ɛ̀ sìɛ́. N wennimu kɛ̀ kù n yietí mɛsɑ̀ɑ̀.

²²N tũmmu Kuyie nkó kucɛ, n yí yetɛ ku kpɛti mɑtì.

²³N yí yetɛ́ ku kuɔ́ mɑì, m mɛ n yí yetɛ́ ku tɑnnùù mɑrì.

²⁴N dɔɔrimu kù dɔ́mɛ̀. N dɑkɛmu nyɑ̀ɑ̀ bo yetɛ́ mɛ̀ɛ̀ kpɛ́í.

²⁵Kuyie nni nyietí n wetí kɛ̀ dɛ̀ mɑ̀mɛ̀ mmɛ, n wennimu kɛ̀ kù n yietí mɛsɑ̀ɑ̀.

²⁶Kuyie, nwèè dɔ̀ɔ̀ri dɛ̀ɛ̀ wenni, ɑ we ndɔɔri dɛ̀ɛ̀ wenni. Wèè tu onìtì mɔ́mmuɔ ɑ we ndɔɔri timɔ́mmɔnti.

²⁷Wèè dò mpɑ́íí, ɑ ɔ̃ɔ̃ ò bɛnkɛmu ɑmɑ́ɑ̀ pɑ́íí. Kòò tu oyɛiwe ɑ nyɛ̃́ ɑ bo ò yĩ́mɛ̀.

²⁸Fɔ̃́ɔ̃̀ dɛɛrí bɛsénnìbɛ̀ kɛ kɛ̃́kùnko sifeí yɛmbɛ̀.

²⁹N Yiɛ̀ nKuyie nfɔ̃́ɔ̃̀ cɔ́unko n fìtírɛ̀, fɔ̃́ɔ̃̀ m mí dibiìnnì miɛkɛ.

³⁰Kuyie nfɔ̃́ɔ̃̀ te kɛ̀ n do n dootitɔbɛ̀. Fɔ̃́ɔ̃̀ te kɛ̀ n sèńtɛ́ bɛ duotí.

³¹Kuyie nkó kucɛ do mpɑ́íí nwe, kɛ̀ ku nɑ́ɑǹtì tu timɔ́mmɔnti, kɛ̀ kù dò nkudɔpìkù kɛ kɑ̃nkù bɛ̀ɛ̀ sɔ̀ri ku borɛ̀.

³²Kuyie nkuù tu ti yiɛ̀, Kuyie mbo kumɑ́ɑ̀ ndi, kuù mɑ́ɑ̀ tu dipèrì dìì ti kɑ̃nkɛ́.

³³Kuyie nkuù n duɔ̀ mmuwɛ̃rímú, kuù wèńkùnko n cɛ.

³⁴Kuù te kɛ̀ n tɑ̀ɑ̀kɛ cɑ̃ɑ̃ tɛhontɛ̀ kpɛyi kɔ̃mɛ. Kuù te kɛ̀ n còḿmú ditennì ĩ́nkɛ̀.

³⁵Kuù m bɛnkú dikpɑ̀nnì, kɛ n teénnɛ̀ kɛ̀ n nɔ nkɛ yũɔ̃ mmutɑ̃mmù.

³⁶N Yiɛ̀ nKuyie nhɑ nɔ̀ùtɛ̀ youtɛ tɛɛ̀ n tɔ, kɛ n kɑ̃nkɛ́ kudɔpìkù kɔ̃mɛ, kɛ n dɛɛrí, nh ɔ̃ɔ̃ dɑ yú kɑ̀ɑ yiemmu kɛ́ n kpénkùnnɛ.

³⁷Fɔ̃́ɔ̃̀ te kɛ̀ n kèrí mɛcɑ̃ɑ̃, bɑ́ n tɑ̀ɑ̀kɛ í seití.

³⁸M bɛ̀ti n dootitɔbɛ̀ mbɛ kɛ bɛ̀ nìntɛ, kɛ̀ n yí bɛ̀ kùɔ bɛmɔu m bɑ́ɑ́ wɛ̃tɛ.

³⁹M bɛ̀ kèétɛ́ kéétɛ́mu kɛ̀ bɛ̀ còú kɛ̀ m bɛ̀ nɑ̀ù, bɛ̀ bɑ́ɑ́ nɑ kɛ́ítɛ́, m bɛ̀ nɑmu.

⁴⁰Kuù n duɔ́ mmukpɑ̀rìwɛ̃rímú, kɛ te kɛ̀ n dootitɔbɛ̀ m bɔ̀útɛ́.

⁴¹Fɔ̃́ɔ̃̀ te kɛ̀ n dootitɔbɛ̀ bùtínnɛ́ kɛ cokɛ́, kɛ̀ nh ɑutɛ́ n sĩ̀mbɛ̀ kɛ bɛ̀ kɔ̀ù.

⁴²Kɛ̀ bɛ̀ kuɔ̀ mbɑ́ òmɔù í bɛ̀ teénnɛ̀, kɛ̀ bɛ̀ dɑ kuɔ̀nnɛ̀ fɔ̃́ nKuyie mbɑ́ ɑ í bɛ̀ cɔ̀ú.

⁴³M bɛ̀ nɑ̀ntɛmu kɛ̀ bɛ̀ nɑɑ́ nkutɑ̃ɑ̃yukú, kuyɑɑkù tɔ kù kɛ̀ m bɛ̀ nɑ̀ù kucɛ kó tisɑ̃sɑ̃̀ɑ̃̀tì kɔ̃mɛ.

⁴⁴Kuù n dɛɛtɛ́nɛ̀ m botí kɔbɛ bɛ̀ɛ̀ yetɛ n kpɛti, kɛ n nií nyibotí ììkɛ̀, kɛ̀ kubotí n yí yɛ̃́ kù nɑɑ́ n kó tidɑɑtì.

⁴⁵Kɛ̀ bɛpɔ̀ɔ̀bɛ̀ n sɑ̃ntí, kɛ̀ m bɛ́i mmɛ̀mɑ́ɑ̀ bɛ̀ɛ yie n kpɛti.

⁴⁶Kɛ̀ bɛ̀ cĩ̀tɛ kɛ kpeutí, kɛ yiɛ̀ní bɛ sɔ̀rɛ̀ miɛkɛ.

⁴⁷N Yiɛ̀ nKuyie mbomu kuù tu n kó dipèrì. Ndɛ́úkùnkonnɛ̀ ku yètìrì, kuù tu n dɛɛtíwè.

⁴⁸Kuyie nkuù m pɛ̀ìri, kɛ te kɛ̀ ibotí m bɔ̀útɛ́.

⁴⁹Kuù n dɛɛrínɛ̀ n dootitɔbɛ̀, kɛ te kɛ̀ n nɔ n kpɑntídɛ̀ntɔbɛ̀, kuù n dɛɛrínɛ̀ bɛnitiyonkubɛ.