SALMOS 18:30-45

³⁰Iojhui Toteco Dios nelía xitahuac. Huan icamanal cati quitencahua, cuali para ipan timotemachise. TOTECO quinmanahuía nochi cati ipan ya motemachíaj.

³¹Amo cana aqui seyoc Dios quej TOTECO. Amo aqui seyoc cati huelis ipan timotemachise huan techmanahuis.

³²Toteco Dios nechmaca chicahualisti, huan nechchihualtía ma ninejnemi xitahuac.

³³Yaya nechfuerzajmaca para amo ma nihuetzi. Noicxihua mochihuaj temachti quej iicxihua se chivo quema moquetzaj campa tahuejcapa huan talxixitaca.

³⁴Toteco Dios nechmachtía taya ma nijchihuas quema onca tatehuilisti. Nechfuerzajmaca para cuali ma niquitzqui nopa tetic tepos huitoli cati quichijtoque ica bronce.

³⁵Toteco Dios, ta techmanahuía huan techmaquixtía. Techitzqui ica monejmat. Ica mohueyi teicnelijcayo techhueyichijtoc.

³⁶Tijchijtoc noojhui más patahuac para ma amo nihuetzis.

³⁷Niquintepotztocac nocualancaitacahua huan niquinajsito. Huan amo nimocuetqui hasta quema niquintzontamiltijtoya.

³⁸Niquinhuejhuelo huan ayecmo quema motananase. Huetzque noicxita.

³⁹Toteco Dios, ta techfuerzajmacac ipan nopa tatehuilisti huan tijchijqui para nocualancaitacahua ma motancuaquetzaquij noixpa.

⁴⁰Miyaqui moicancuetque para cholojtehuase huan quej nopa huelqui niquintzontamilti.

⁴¹Inijuanti tetzajtzilijque para ma quinpalehuiquij, pero amo aqui huelqui quinpalehui. Quinotzque TOTECO, pero yaya amo quinnanquili.

⁴²Quej se quitisi talcuajnexti huan quihuica ajacat, na quej nopa niquinchijqui. Huan ininpa nimoquejquetzqui quej soquit ipan ojti.

⁴³TOTECO nechmanahuijtoc ten nopa sequinoc altepet ehuani cati mosisiníaj huan quinequiyayaj nechtehuise. Yaya nechchijtoc ma nieli niinintayacanca masehualme cati campa hueli ehuani. Masehualme cati amo niquinixmatiyaya hualahuij para nechtequipanose.

⁴⁴Quema quicaquij nocamanal, inijuanti nechneltoquilíaj. Cati ehuani ipan sequinoc altepeme huihuipicaj noixpa.

⁴⁵Nochi motemacaj noixpa huan huihuipicatiyahuij quema quisaj campa motatijtoque.