SALMOS 18:2-19

²TOTECO, ipan ta nimotatía pampa temachti techmaquixtis. Techyahualojtoc para amo huelis nechajsise nocualancaitacahua. Ta tinotamanahuijca. Ipan ta, noTeco Dios, nimotatía, pampa na niitztoc momaco. Quena, san ipan ta nimotemachía. Ta techyahualojtoc para techmocuitahuía. Ta tieli quej se huejcapantic tepancali cati cuali huan temachti. Ica ta mochicahualis nitatanis.

³San monequi nijnotzas TOTECO cati quinamiqui para nijhueyichihuas, huan yaya nechmanahuis inimaco nochi nocualancaitacahua.

⁴Eltoya quej nechpixtoya imaco miquilisti. Nochi cati fiero cati onca ipan ni taltipacti nechtanisnequiyaya.

⁵Nopa mijca ostot nechtaquechilijtoya hasta ayecmo nijpixqui fuerza. San se quentzi más huan nimiquisquía.

⁶Pero quema más nimotequipachohuayaya, nijnotzqui TOTECO. Nijtajtani ma nechpalehui noTeco Dios. Huan yaya nechtacaquili hasta nepa ipan ilhuicac. Quena, quichihuili cuenta cati niquilhui.

⁷Huajca chicahuac mohuiso tali hasta momajmatijque nochi tepeme. Moojolinijque nopa tepeme hasta campa tatzquitoque, huan mohuihuixojque pampa Toteco Dios cualanqui.

⁸Elqui quej quisayaya pocti ipan iyacatzol, huan ipan icamac quisayaya se tit cati nochi quitamitatiyaya, huan nochi quisosolohuayaya. Quena, quimajcahuayaya ticoli xaxahuacatoc pampa nelcualanqui.

⁹Pampa Toteco Dios quitapo nopa cortina ten ilhuicac, huan temoc para nechpalehuis. Nejnentihualayaya ipan miyac mixti cati nelyayahuic.

¹⁰Toteco Dios tejcoc ipan ieltapal se iilhuicac ejca cati itoca querubín, huan patantihualajqui ipan ajacat.

¹¹Yaya motzajqui ica tzintayohuilot, huan moyahualo ica at para amo aqui quiitas.

¹²Tapetanilot quiyacantihualajqui quema ajsico yaya cati tahuel cahuani. Huan nojquiya huetzqui tesihuit huan ticoli xaxahuacatoc.

¹³TOTECO quichijqui ma quicaquica itoscac quej se tatomonilot cati quisqui ilhuicac. Quena, Toteco Cati Más Hueyi tahuejchijqui. ¡Tahuel miyac tesihuit huan ticoli xaxahuacatoc huetzqui!

¹⁴Quimajcajqui cuataminti ma quinajsi nochi nocualancaitacahua, huan inijuanti cholojtejque. TOTECO quintzohuitejqui ica se hueyi tapetanilot huan quintzontamilti.

¹⁵Quema TOTECO tailpitzqui, nochi nopa at ipan hueyi at san sejco momanqui hasta nesqui nochi nopa tali cati mocahua atatzinta campa más tahuejcata. Ica icamanal TOTECO mopanexti itzinpehualtil taltipacti, pampa yaya cualanqui.

¹⁶Huan TOTECO quicalaqui imax hasta campa más huejcata, huan nechquixti ten nopa hueyi at.

¹⁷Nechmaquixti inimaco nocualancaitacahua cati quipiyayayaj miyac chicahualisti. Quena, nechmanahui ten nocualancaitacahua cati más quipiyayayaj chicahualisti que na.

¹⁸Inijuanti nechtanque ica na quema amo nijpixqui fuerza, pero TOTECO nechtananqui.

¹⁹Nechquixti huan nechsehui campa amo mahuilili. Nechmanahui pampa nechicnelía.