SALMOS 147:4-16

⁴Nnézkzele' baḻ belj ka' nníta'gaken. To to belj ka' žwe'e lan.

⁵Ẕente nak X̱anžo Dios, na' nape' dot yeḻa' wak. Bi be de da' bi žejni'ile' Ḻe'.

⁶X̱anžo Dios žákḻene' benne' gax̱jw ḻaže' ka', san ẕzex̱jwe' benne' wen da' ẕinnj ka'.

⁷¡Le goḻ da' wká'n ẕenle X̱anžo Dios! ¡Le goḻ, na' le wchínnj da' ka' ẕgoḻ-le ḻaw Dios chežo!

⁸Ḻe' ẕnnite'e bejw ka' ẕan ya'abá. Ḻe' žseḻe'e nis yejw ḻo yežlyó. Ḻe' žone' ga žiagak yíx̱e'do' ka' ḻaw ya'a ka'.

⁹Ḻe' ẕneẕjwe' da' žawgak bia yix̱e' ka'. Ẕneẕjwe' da' žawgak sechjdo' ka', bia ka' ẕbéžeya'agakba'.

¹⁰Da' žaz ḻaže'e bi naken yeḻa' waḻe chegak bžina' ka', na' kege yeḻa' waḻe chegak benne' ka',

¹¹san žaz ḻaže'e benne' ka' ẕžébegake' Ḻe', na' benne' ka' žx̱en ḻáže'gake' Ḻe' nich yeyache' ḻáže'le' ḻégake'.

¹²¡Le wká'n ẕen X̱anžo Dios, ḻe'e zoale yež Jerusalén! ¡Le wká'n ẕen Dios chele, ḻe'e zoale yež Sión!

¹³Ḻe' ẕzoa choche' ze'e da' žape chi'in yež chele. Žon chawe'e benne' ka' nníta'gake' yež chele.

¹⁴Ẕzoe' yeḻa' ẕga'n chawe' ḻo yežlyó chele. Gónnḻi'e chele ẕoa' cháwe'ḻe'e.

¹⁵Žseḻe'e x̱tiže'e chegak benách yežlyó ka', na' ka' gaze žak da' ẕnne'.

¹⁶Ẕwakwe' yežlyó ḻen bege' da' naken ka ẕila'. Ẕzex̱jwe' x̱le'l yel ka de.