Godigo Nogi Ugwaba Sabo Tęąbi Po Wabo Buku Dabe 147:4-16

⁴Agai augwaligo namba te hǫgo dąį ilama, tama mu tama, agai te augwali deli deligo nogi nodigi pabo dao.

⁵Te dago Genuai Bidigo nogi me te tigidali bomo elalubao. Dago agai koneani kolesaga te usu me siyu, dąį me iligobeo.

⁶Agai te augwa digi augwa haliga aiyaba tegaluama bidibo bidi dabego nogi ugwaba saibao, tiali goli, agai te dwai sę ebo we bidi dabe augwali te bomonama mu agala sabo dao.

⁷Puba hwi po weyu, te Genuai Bidigo nogi ugwaba sabo balia po dabe waiyąo. Te dena Godiba te gita me musik wao.

⁸Agai te dagalude pǫ pedalumainu elama, tama te tulubage tagala palama, tama te bulu du dabede te nosa pedalumainu ebo dao.

⁹Agai te tigidali kibu hasa dabeba nai mobao, tama te gesi tamadi dilibo ba tagadi dabego i wabo sogo, te agai augwaliba nai mabo dao.

¹⁰Genuai Bidigo te bomai hos dabede, me te bomai ami bidi dabe te wiegi yai pemene me egobeo.

¹¹Menio, agai te wiegi yai pemene te agade wi ebo we bidiba yaibao, tama te agai da sesemane godolo ebo dao homu eyu, agaba homu kęą pabo we bidi dabede, te agai augwalide dwagi yai homu ebo dao.

¹²Te Jerusalem dabeo, te Genuai Bidigo nogi ugwanu siąo. Awe, dage Saion dabe, te duga God nogi ugwaba sao.

¹³Agai te nago Jerusalem obo bagulali sunumi te dąų walama elalu, tama te naga we bidi dabeba te wiegi yai nai mayu ebo dao.

¹⁴Te boi bidi dabe asidali weyu, agai te dagego tǫ me tonaluyu, tama te gide wiegi yai wit mu holomainu elama, tama dagego tulama, tama pągąna pabo dao.

¹⁵Te agai po me deli obaso da, teda polo tama te po te tǫba dulubo dao.

¹⁶Agai te talua ge tulubage hauwa te aiyaba tagala palama, tama te tǫ mesega sigulobo dao.