SALMOS 140:1-9

¹X̱ana' Dios, beslá neda' ḻo na'gak benne' wen da' ẕinnj ka' nich bi gongak benne' yichj ža'a ka' neda' ẕia.

²Benne' ki žíljgake' da' ẕinnj da' góngake'. Tža tža ẕdíḻ-ḻengake' benách ka'.

³Da' ẕnnágake' naken ka laye' bele da' zej ntochen'. X̱tíža'gak benne' ka' zej naken ka nis snia che bele.

⁴X̱ana' Dios, bi go'o latje benne' wen da' ẕinnj ka' góngake' chia' da' ẕinnj. Beslá neda' ḻo na'gak benne' yichj ža'a ka', benne' ka' žon byéngake' chejchégoa'a.

⁵Benne' ka' ẕka'n ẕen kwíngake' wlékgake' to da' senen neda'. Bzáḻjgake' do yeḻj žoa'a nez. Wlékgake' da' ka' séngaken neda'.

⁶Goža' X̱ana' Dios: “Le' nako' Dios chia'. X̱ana' Dios, benle chi'a kate' žḻiža' Le'.

⁷X̱ana' Dios, nakkzo' Benne' weslá chia'. Le' wdape chi'o yichja' ḻo ža gok wdiḻe.

⁸X̱ana' Dios, bi go'o latje gak kan žak ḻáže'gak benne' wen da' ẕinnj ka'. Bi go'o ḻégake' latje góngake' da' ẕza' ḻáže'gake' nich bi wká'n ẕen kwíngake'.

⁹Zej nyechjle benne' wen da' ẕinnj ka' neda'. Ben ga gak chegak benne' ka' kan žénegekle' góngake' chegak benne' yoble ka'.