SALMOS 135:2-10

²ḻe'e zoale ḻo yodo' che X̱anžo Dios, ḻo ḻi'a yodon' gan zoakze Dios!

³¡Le wká'n ẕen X̱anžon' dan' nake' chawe'! ¡Le goḻ da' wká'n ẕenle La la'y chie', dan' nake' ži'i ḻaže'!

⁴X̱anžo Dios wžíe' ẕa'só Jakob ka'. Wžíe' ẕa'só Israel ka' nich gákgake' benne' chie' ka'.

⁵Nnézkzelžo ẕente nak X̱anžo Dios. Nakže' ẕen ka yógo'te dios chegak benne' zi'to' ka'.

⁶Žon X̱anžon' yógo'te da' žénele' gone' ẕan ya'abá, na' ḻo yežlyó, na' ḻo nisdo', na' ḻo da' zoan gže' ẕan nisdon'.

⁷Žone' ga že' bejw do ẕente yežlyó. Žone' ga žasgak yes wzió' kate' žak yejw. Žone' ga žak be' gáte'teze.

⁸Ḻe' betkze' bi' byo nežw ka' chegak benne' Egipto ka'. Gotgak bi' byo nežw ka' chegak benne' ka', na' bia néžwdo' ka' chegak bia yix̱e' chégake' ka'.

⁹Bene' yeḻa' wak ka' che ya'abá, na' da' ẕente ka' kate' bchinnje' yežlyó Egipton', da' ka' ben Dios che benne' Faraón, na' chegak yógo'te benne' wen žin ka' che Faraón na'.

¹⁰Bžia yi'e benne' ka' chegak zante yež ka', na' bete' benne' wnná bia' ka', benne' ẕenḻe'e ka'.