Buk Song 135:2-10

²Yupela i save sanap insait long banis bilong Bikpela, long haus bilong God bilong yumi.

³Litimapim nem bilong en, long wanem, em i save mekim gut tru long yumi. Em i save marimari long yumi, olsem na yumi mas singim ol song bilong litimapim nem bilong en.

⁴Bikpela i bin makim Jekop bilong em yet, olsem na ol Israel ol i lain bilong God stret.

⁵Mi save Bikpela i gat biknem tru, na em i antap long olgeta giaman god.

⁶Bikpela i laik mekim wanem samting long heven na long graun na long solwara na long as bilong solwara, orait em i save mekim.

⁷Em i save mekim ol klaut bilong ren i kamap long olgeta hap graun, na em i save mekim lait bilong klaut i kamap wantaim ren, na em i save kirapim win na salim i go nabaut.

⁸Long Isip em i bin kilim i dai ol nambawan pikinini bilong ol Isip na bilong ol abus bilong ol.

⁹Na long Isip em i wokim olkain mirakel bilong mekim save long king wantaim ol ofisa bilong en.

¹⁰Bikpela i bagarapim planti kantri na kilim i dai ol strongpela king.