SALMOS 119:97-171

⁹⁷¡Tahuel niquicnelía moley! San ten ya nimoyolilhuijtinemi semilhuit.

⁹⁸Motanahuatilhua nechchijtoque más nitalnamiqui que nocualancaitacahua. Pampa motanahuatilhua nechyacantiyahuij mojmosta.

⁹⁹Quena, achi más nitalnamiqui hasta niquintani inijuanti cati notamachtijcahua, pampa na nimoyolilhuijtinemi ten motajtol.

¹⁰⁰Na más nijmachilía que nopa huehue tacame, pampa nijchihua cati quiijtohuaj motanahuatilhua.

¹⁰¹Amo quema nijnectoc nijtoquilis se ojti cati amo cuali, pampa senquisa nijnequi nijchihuas cati quiijtohua mocamanal.

¹⁰²Amo nimohuejcatalijtoc ten motamachtil, pampa ta technextilía quenicatza ma nimonejnemilti.

¹⁰³Nijmati nelía ajhuiyac mocamanal. Achi más tzopelic nijmati que sayolnecti.

¹⁰⁴Motanahuatilhua nechmacaj talnamiquilisti. Yeca amo nijnequi niquitas yon se tamanti istacatili.

¹⁰⁵Mocamanal eltoc quej se taahuili cati quitaahuilía noojhui campa ninejnemi para amo nimotepotanis.

¹⁰⁶Se huelta nitatestigojquetzqui, huan ama sempa nitatestigojquetzas para nijchihuas cati quiijtohuaj motamachtilhua pampa nelía xitahuac.

¹⁰⁷TOTECO, nechca eltoc para nimiquis inimaco nocualancaitacahua. Techmaca yancuic chicahualisti quej tiquijtojtoc para tijchihuas.

¹⁰⁸TOTECO, nimitztajtanía xijseli nopa tascamatili cati nimitzmaca quej se tacajcahualisti. Huan technextili motamachtil.

¹⁰⁹Mojmosta nimopantía campa mahuilili para nonemilis, pero amo niquelcajtoc moley.

¹¹⁰Nopa taixpanoca masehualme quitalíaj taquetzti para ma nimasi huan nihuetzis ipan tajtacoli, pero na amo nimoiyocanequis ten motanahuatil.

¹¹¹Na san nimoaxcatijtoc motajtol, pampa san ipan motajtol nijpantía paquilisti.

¹¹²Ica nochi noyolo nijchihuas cati quiijtohuaj motanahuatilhua nochipa hasta nimiquis.

¹¹³Amo nijnequi niquinitas masehualme cati quichihuaj ome inixayac. Pero na niquicnelía moley.

¹¹⁴Ipan ta nimotatía para amo nechcocose nocualancaitacahua huan ipan ta nimomanahuía. Pampa nimotemachía san ipan mocamanal.

¹¹⁵Ma nechtalcahuica nopa masehualme cati fiero inintalnamiquilis. Ma amo nechcuatotonica pampa na nijnequi nijchihuas cati quiijtohuaj motanahuatilhua, Toteco Dios.

¹¹⁶Huajca noTeco, techmaca yancuic fuerza senquisa quej techtajtolcahuili. Huan quej nopa sequinoc amo quema huelis quiijtose para san tapic nimochixtoc ipan ta.

¹¹⁷Techfuerzajmaca para nimomaquixtis inimaco nocualancaitacahua, huan nochipa nijpiyas paquilisti para nijchihuas cati techyolmelajtoc.

¹¹⁸Ta tiquinhuejcamajcajtoc nochi cati quitahuelcahuaj cati techyolmelajtoc. Inijuanti quiijtohuaj talnamiquij, pero amo cana, san mocajcayahuaj.

¹¹⁹Nochi masehualme cati quinpactía tajtacolchihuaj ipan ni taltipacti tiquinita quej itetejtzo teposti cati mocahua quema tijmolonía para tijtapajpacchihuas. Pero na niquicnelía huan nijtepanita motajtol.

¹²⁰Nochi notacayo huihuipica pampa mitzimacasi huan mitztepanita, Toteco. Huan nojquiya niquimacasi motatzacuiltil, huan yeca amo nijnequi nimitzixpanos.

¹²¹Na nijchijtoc cati xitahuac huan cati melahuac moixpa. Amo techtahuelcahua inimaco nocualancaitacahua.

¹²²Xitatestigojquetza para techtiochihuas na, nimotequipanojca. Amo xiquincahuili ma nechtaijyohuiltica nopa masehualme cati mohueyimatij.

¹²³Campa hueli nitachixtoc pampa nijchixtoc techmaquixtiqui ten nocualancaitacahua, hasta siyajtoque noixteyolhua. Nijchixtoc techmanahui senquisa quej tiquijtojtoc para tijchihuas.

¹²⁴TOTECO, ipan motaicnelijcayo techchihuili cati cuali na, nimotequipanojca. Technextili quenicatza nijchihuas cati techyolmelajtoc ma tijchihuaca.

¹²⁵Na nimotequipanojca, techmaca talnamiquilisti, para niquixmatis motajtol.

¹²⁶TOTECO, ya ajsic tonali para timonextis huan tijchihuas cati tiquita para cuali. Pampa ni taixpanoca masehualme ayecmo quitepanitaj moley.

¹²⁷Pero na más niquinicnelía motanahuatilhua huan amo quej oro cati senquisa cuali.

¹²⁸Pampa nochi motanahuatilhua nelía xitahuac. Yeca amo nijnequi niquitas yon se tamanti istacatili.

¹²⁹Motajtol nelía cuajcualtzi, TOTECO, yeca nijtoquilijtinemi ica nochi noalma.

¹³⁰Quema quiixtomaj mocamanal, techtaahuilía huan techtalnamictía nochi timasehualme, hasta nojquiya masehualme cati pilquentzi quimachilíaj.

¹³¹Yeca tahuel nijnequi niquixmatis más cati quiijtohuaj motanahuatilhua, huan ya nopa nijtemohua.

¹³²Techtachili huan techtasojta, quej timomajtoc tiquinchihuilía cati mitzicnelíaj.

¹³³Techyacana ipan se cuali ojti ica mocamanal para amo nechtanis yon se taixpanoli.

¹³⁴Techmanahui ten nopa tacame cati mosisiníaj huan quinequij nechtaijyohuiltise. Huan quej nopa nijchihuas cati quiijtohuaj motanahuatilhua.

¹³⁵Ma monexti moteicnelijcayo ipan moxayac quema techtachilía na, nimotequipanojca, huan techmachti nochi cati techyolmelajtoc para ma tijchihuaca.

¹³⁶Tahuel nichoca pampa miyac masehualme amo quitepanitaj moley.

¹³⁷TOTECO, ta nelía tixitahuac huan nochi tatzacuiltili cati titemaca nojquiya xitahuac.

¹³⁸Nochi motajtol xitahuac huan temachti para ipan ma timotemachica.

¹³⁹Nelía nimotequipachohua huan nicualani, pampa nocualancaitacahua amo quitepanitztoque cati ta tiquijtojtoc.

¹⁴⁰Nochi moley nijyejyecojtoc huan niquitztoc para nelía tatzejtzeloltic. Yeca niquicnelía.

¹⁴¹Nelía niteicneltzi huan miyac amo quinequij nechitase, pero na amo niquinelcajtoc motanahuatilhua.

¹⁴²Ta tijchihua cati xitahuac para nochipa huan moley senquisa melahuac.

¹⁴³Nopani huetztoc tequipacholi huan taijyohuilisti, pero motanahuatilhua san ya nopa nechyolchicahuaj.

¹⁴⁴Motajtol nochipa xitahuac. Techmaca talnamiquilisti para nijmachilis huan quej nopa huelis niitztos.

¹⁴⁵Ica nochi noyolo nimitztzajtzilía. Technanquili noTeco, huan nijchihuas cati techyolmelajtoc.

¹⁴⁶Na nimitztzajtzilía huan nimitzilhuía: “Techmaquixti ten nocualancaitacahua”, huan nijchihuas cati quiijtohua motajtol.

¹⁴⁷Nimijquehua ica ijnaloc quema ayemo quisa tonati, huan nimitztzajtzilía, TOTECO, pampa san ipan mocamanal nimotemachía.

¹⁴⁸Ica tayohua amo nicochi pampa san nimoyolilhuía ten nochi cati tiquijtojtoc techchihuilis.

¹⁴⁹Techtacaquili pampa titetasojta, TOTECO. Techmaca yancuic chicahualisti quej quiijtohua motamachtil para tijchihuas.

¹⁵⁰Nechca hualahuij nopa tacame cati mosisiníaj huan nechtepotztocatinemij. Inijuanti mohuejcatalijtoque ten moley.

¹⁵¹Pero ta tinoTeco tiitztoc nonechca. Nochi motanahuatilhua senquisa melahuac.

¹⁵²Hasta quema niitztoya nipilquentzi niquixmatqui motajtol, huan nijmatqui para motajtol amo quema mopatas para nochipa.

¹⁵³Xijtachili notaijyohuilis huan techmanahui, pampa amo niquelcajtoc moley.

¹⁵⁴Quena, techtenpalehui huan techmanahui quej techtajtolcahuilijtoc tijchihuas.

¹⁵⁵Amo tiquinmaquixtis nopa masehualme cati amo mitztepanitaj. pampa inijuanti amo quitacaquilíaj cati techyolmelajtoc.

¹⁵⁶TOTECO, ta tahuel techtasojta. Techmaca yancuic chicahualisti quej quiijtohua motamachtil para tijchihuas.

¹⁵⁷Miyac nocualancaitacahua nechtepotztocatinemij huan quichihuaj campeca para ma nimitzixpano, pero na amo nijcajtoc motajtol.

¹⁵⁸Na niquincualancaita nopa tacajcayahuani, pampa inijuanti amo quichihuaj cati quiijtohua mocamanal.

¹⁵⁹Xiquita TOTECO, na tahuel niquinicnelía motanahuatilhua. Techmaca yancuic chicahualisti pampa ta nelía ticuali, huan hueyi moyolo.

¹⁶⁰Nochi mocamanal senquisa melahuac. Quena, nochi motamachtil senquisa xitahuac huan huejcahuas para nochipa.

¹⁶¹Tacame cati quipiyaj tequiticayot nemij notepotzco para nechcocose masque amo teno niquinchihuilijtoc, pero ipan noyolo san niquimacasi para niquixpanos mocamanal.

¹⁶²Na nimopaquilismaca ipan mocamanal quej se cati paqui miyac quema quipantijtoc cati tahuel patiyo.

¹⁶³Nijcualancaita nochi tamanti istacatili, pero niquicnelía miyac moley.

¹⁶⁴Nimitzhueyimati chicome huelta ipan se tonal, huan nimitztascamati pampa xitahuac motamachtil.

¹⁶⁵Nochi cati quiicnelíaj moley quipiyaj miyac tasehuilisti ipan iniyolo, huan amo huetzise ipan tajtacoli.

¹⁶⁶TOTECO, tahuel nimochixtoc para techmaquixtis huan yeca niquintepanita motanahuatilhua.

¹⁶⁷Na nijneltoca motajtol huan niquicnelía ica nochi noyolo.

¹⁶⁸Na nijchihua cati quiijtohuaj motanahuatilhua huan motajtol, pampa ta tiquixmati nochi cati nijchihua.

¹⁶⁹TOTECO, xijtacaquili cati nimitztajtanía, techmaca talnamiquilisti senquisa quej tiquijtojtoc para tijchihuas.

¹⁷⁰Xijtacaquili cati nimitztajtanía quema nimotatajtía, huan techmanahui quej tiquijtojtoc techchihuilis.

¹⁷¹Na nimitzpaquilismacas, pampa ta technextilijtoc quenicatza nijchihuas nochi cati techyolmelajtoc ma tijchihuaca.