Salmo 83:6-13

⁶Nantotolag din Edomita ya Ismaelita, Hagareno ya Moabita,

⁷din taga-Gebal, Ammonita ya Amalekita, din taga-Tiro ya Filistia.

⁸Naitapi aben daida din taga-Assyria ay napigsa ay kabadang din polin Lot ay Ammonita ya Moabita.

⁹Amagem koman daida din inyat mos taga-Midian ya da Sisera en Jabin sin ginawang ay Kison.

¹⁰Inabak mo ed Endor si daida et naboyok awak da sin lota.

¹¹Kaman din inyat mon da Oreb en Zeeb koma di amagem sin papangolo da. Abakem din tuturay da ay kaman din panangabak mon da Zeba en Zalmunna.

¹²Daida din nangwani en okaen da din okan Diyos ay daga.

¹³Iwalang mos daida ay kaman tapok, kaman teg-ap ay itayaw di dagem.