Salmo 80:2-18

²ziyà te etuvangan te tribu ni Efraim, ni Benjamin, wey ni Manase. Ipeehè nu en is gehem nu, ne veyai key ne ibriya key.

³He Megbevayà, iliku nu kayi te kenami is keupiya te kebpekesavuk dey zengan. Ipeehè nu kenami is hizu nu su wey key melibri.

⁴Nengazen he Megbevayà he Mekeǥeǥehem, sengemenu keluǥayad is timpu he igkeepes nu zà is menge kebpengemuyù dey te menge etew nu?

⁵Mibpenù key kenikew te seeng ne samè dà kenè dey meinum is luhè dey.

⁶Intuǥut nu he tebeka key te kesikbit dey he menge nasyun, ne sikandan is menge kuntada zey ne ed-undaunda kenami.

⁷He Megbevayà he Mekeǥeǥehem, ilikù nu kayi te kenami is meupiya he kebpekesavuk dey zengan. Ipeehè nu kenami is keupiya nu su wey key melibri.

⁸Sikami is menge etew nu, neiring key te pinemula he paras he migkuwa nu ziyà te Ehipto ne impemula nu ziyà te tanà te menge etew he midsegseg nu.

⁹Mibpurungan nu hiǥewani haazà is tanà, ne nendalid haazà is paras ne neeneb te langkat din heini is tanà.

¹⁰Nelembungan te menge subpang din is menge vuntud wey is dezekelà he kayu he sidru.

¹¹Nekeuma is menge subpang din diyà te Daǥat he Mediteraneo ne taman en te zekelà he Wahig he Eufrates.

¹²He Megbevayà, maan is midrundus nu is menge verengbeng kayi te paras? Egketakew en hinuun te langun he sumeseǥazà is menge veǥas din.

¹³Egkeenen heini te kenà ayam he menge vavuy wey zuma pa he menge leew he langgam.

¹⁴Seǥipaa key zed umani, Megbevayà he Mekeǥeǥehem! Puun diyan te langit ahaa nu is kebpekesavuk dey. Is-isipa key kenikew is menge etew nu,

¹⁵he iring te pinemula he paras he impemula nu pinaaǥi te ǥehem nu. Tentenuzi key kenikew is menge anak nu he impehitindeg nu su para mevantug ka.

¹⁶He Megbevayà, iring key te midtamped he paras he mibinsulan. Egkezumahan te pauk nu is kedtengtengi nu kenami ne midezeetan key kenikew.

¹⁷Piru ǥuntaan tevangi key en kenikew is menge etew he mibpilì nu he ebpekeuvey kenikew wey midlig-enan nu su para mevantug ka,

¹⁸ne kenè dey en sikew ed-ewaan. Ilikù nu zini te kenami is meupiya he kebpekesavuk dey, ne ed-ezapen dey sikew.