Godigo Nogi Ugwaba Sabo Tęąbi Po Wabo Buku Dabe 80:2-18

²Nago te Efraim dabe, me Benjamin dabe, me te Manase hani bage augwali homu dene yao. Nago te homu dene ebo te pepeli diliba hanilama, pedalumainu ilao. Te nago genuai bomo dabolo ola mayu, tama aselama, da tau sagasobaso da, teda da me dologobeo.

³God, nago da selasa, te nagaba ma pao. Nago te olo tau sabo wiegi yai kolesaga dabolo eyu, tama da tau sobaso da, teda da munu me hagagobeo.

⁴Genuai Bidi, nage te Tigidali Bomo Elalubo God dao, nisu naga sogo digi te nago naga we bidi dabego gedu haluasa po wabode te wado po me nago elalu odaibawe?

⁵Nago da te gela mu udumainu elama, tama dena gedu ąį te tubo nai, me te genuai tubo ąį tiwai ebao.

⁶Nago te gasa hani we bidi dabe te da pąba asomainu ilama, te augwaligo dago tǫ sainu hwįbao. Tama te boi bidi dabego dabolo te posobo po weyu, gisugu mayu, ebo dao.

⁷Te Tigidali Bomo Elalubo God, nago da edaba ma sao. Nago te olo tau sabo wiegi yai kolesaga dabolo eyu, tama da tau sobaso da, te da me hagagobeo.

⁸Polobadu nago te ni wain deli te Isipdu selasa asali. Tama nago gasa hani dabe te tǫde sela sąnama, tama nago te ni wain te augwaligo tǫde bulai dao.

⁹Nago aga tǫ delide peda selama, tama nago bulalio. Aga holama, tama aga sele te aiyanu mu dulalio, tama aga genuai mu holama, tama te tigidali tǫ pedai mesega sai dao.

¹⁰Tama te ni wain nologogo te tigidali bulu du me, tama te moni dobo dwai ni sida dabe mesegelai dao.

¹¹Te aga nologo pali, te genuai tamu ąį Mediterenian si, te dąį igi pelama, tama giliga asobo badu me pali, te wę Yufretisba usu nigi pai dao.

¹²Tiali goli, magi baso nago te wain gi bagulali obo dabe alualiwe? Megi da, te sunumidu soabo we bidi dabe augwaligo te wain gi du dabe wi saibao.

¹³Tama te uni kibu dabego agayu, tama te uni hasa dabego tubo dao.

¹⁴Te Tigidali Bomo Elalubo God, nago daba homu kone ma palao. Nage te dagalude bidiyu, tama nago daba aiya tonaluao. Tama nage aselama, da tau sagasao, da naga nago ni wain tiwai dao.

¹⁵Nago da tau sagasao, naga digi nago te naga bomogo da bulali. Da te gesi ni wain tiwai nago te bomonama mu pedalumainu yai dao.

¹⁶Te dago boi bidi dabego togolama, tama siaba ulalio. Te nago augwaliba wado eyu, tama augwali mu dolao.

¹⁷Tiali goli, nago da we bidi dabe tau sao, nago te naga da weyu, sa munama, tama da tonalubao. Nago da genuai pedalumainu elama, tama bomo ilali.

¹⁸Nago tama tibaso da, teda dago nage ma tagalugobeo. Nago da bugagia bidimainu eyu, tau sobaso da, tama te nageba gedu haluasa po weyu, tama nago nogi ugwaba saibao.