Yontu 80:2-18

²Hɑɩ, Ɩsɛɣɛlɩ nyə́mɑ tiikilu, ke ŋkpɑŋŋ. Nyɑ́ tiikiɣinɑ nyɑ́ yəlɑɑ ɩsɩɩ kɑləkʋ. Ɩsɔtɑɑ tɑŋlɑɑ tɔɔ kɛ́ nyɑ́ təcɑɣɑlɛ wɛɛ, hʋlɩ nyɑ́ tɩ.

³Hʋlɩ nyɑ́ toŋ nɑ ń kɔɔ ń wɑɑsɩ-tʋɣʋ Ɩfəlɑyim nɑ Pɛncɑmɛɛ nɑ Mɑnɑsee pɑ ɩsɛntɑɑ.

⁴Hɑɩ, Ɩsɔ kʋsɩ-tʋ nɑ ń kɛɛsɩ nyɑ́ ɩsɛ nɑ tɑ́ tɔɔ nɑ pə́ yɑ-tʋ.

⁵Hɑɩ, Ɩsɛɣɛlɩ Ɩsɔ Tɑcɑɑ, pəlee kɛ́ nyɑ́ tɑ́ɑ́ kɑ́ yele kpɑnɑʋ kɛ nyɑ́ yəlɑɑ sələməŋ?

⁶Nəɣəsɛɛ kɛ n cɑləɣɩ nyɑ́ yəlɑɑ nɑ ɩsəlʋm kʋɣɩ-wɛɣɛ sʋlʋm nyəm nɑ pə́ tɛləsəɣɩ mpəle.

⁷N yelɑɑ nɑ tə́ pəsɩ mpi pə yoosiɣi tɑ́ nɑ tɑ́ cɔlɔ nyə́mɑ tɔ. Nɑ tɑ́ kolontunɑɑ nɑ́ɑ́ woŋiɣi-tʋ.

⁸Ɩsɔtɑɑ nɑ ɑtɛ pə tʋ Ɩsɔ kʋsɩ-tʋ. Kɛɛsɩ nyɑ́ ɩsɛ nɑ tɑ́ tɔɔ nɑ pə́ yɑ-tʋ.

⁹N kpɛsɑ lɛsɛŋ tʋɣʋ kɛ Icipiti nɑ ń tɔɣɔnɩ yəlɑɑ nɑ ń sɔ-kʋ.

¹⁰Nɑ ń tɑɣɑnɩ-kʋ nɑ kʋ tɛɛ nɑ kʋ sú tɛtʋ.

¹¹Kʋ wɑɑsɑ pɔɔŋ kɛ kʋ ɩsotom, nɑ kʋ piliŋɑsɩ wɛ ɩsɩɩ Ɩsɔ tɩɩŋ sɔsɔɔŋ.

¹²Ɩlɛnɑ kʋ piliŋɑsɩ hɛlɩ nɑ sɩ́ polo teŋku nɑ kʋ ɑkpɑɑ kɛ pɔɣɔ sɔsɑɣɑ.

¹³Pepe tɔɔ kɛ́ n pɛlɑ kɑlɑɑnɑɑ sɩ mpɑtɔntɑɑ ɩ́ wɑkəlɩ-kʋ?

¹⁴Hɔtʋɣʋ tɑɑ teele kɑ tɔɣɔ-kʋ, nɑ tɑɑlɛ wontu nɑ́ɑ́ pəsɩ-kʋɣʋ tə tɔɣɔnɑɣɑ.

¹⁵Atɛ nɑ ɩsɔtɑɑ pə tʋ Ɩsɔ kɔɔ. Kʋsɩ nyɑ́ ɩsɛ kɛ ɩsɔtɑɑ tənɑ nɑ ń nyənɩ. Pɑɑsənɑ lɛsɛŋ tʋɣʋ kʋnɛ.

¹⁶Kenti mpi nyɑ́ niŋ sɔwɑ tɔ nɑ ɑpɑlʋpəyɑɣɑ ŋkɑ n ləsɑ nyɑ́ tɩ tɔ.

¹⁷Mpɑ pɑ sɛtɑ-kʋ nɑ pɑ wɔ-kʋ tɔ, nyɑɑsɩ-wɛ nɑ pɑ́ sɑɑlɩ yem.

¹⁸Tənɩ nyɑ́ ŋkpɑləŋɑ kɛ yʋlʋ pəyɑɣɑ ŋkɑ n ləsɑɑ nɑ kɑ́ wɛ nyɑ́ ntɔɣɔŋ tɔɔ tɔ kɑ tɔɔ.