Salmo 7:2-17

²Mo adi kan tomolong, dompap da, sin lugar ay magay omisalakan yan omiey da. Kaman dan layon, bomisngibisngit da.

³Yahweh ay Diyos ko, mo waday binmasolak si gait ko,

⁴mo way nilipotak ay gayyem ko ono pinos ko din sanikwan di kalaban ko ay maga di gapo,

⁵olay bay-am ay dompap din kalaban ko. Bay-am ay pomse da ya taynan da din bangkay ko sin lota.

⁶Pomika ka koma, Apo, gapo sin bonget mo ta sangoem din mabonget ay kalaban ko. Man-gonay ka ta bomadang ka, Diyos ko, tan waday timpo ay pangokomam ay inkeddeng mo.

⁷Sinopem din ipogaw sin kailiili ta likoben das sik-a. Tomokdo kad langit ay mangituray en daida.

⁸Sik-a di mangokom si am-in ay ipogaw, Apo. Ibagam di ikeddeng mon sak-en ta maammoan ay magay basol ko.

⁹Ammom di am-in ay panggep ya nemnem yan kosto am-in ay amagem. Topapem din mangamag si lawa yan gon-gonaam din nalinteg di ogali da.

¹⁰Isalakan Diyos din managtongpal en sisya. Sisya di somalaknib ay kaman kon salida.

¹¹Nalinteg si Diyos sin pangokomana, kanayon ay dosaena din mangamag si lawa.

¹²Mo adi manbabawi di ipogaw, palidena din kampilana ya isagana na din pana na.

¹³Alaena din mankatatadem ay armas na yan ipaturong na din bomidbidang ay pana na.

¹⁴Ilaem din iyat di managbasol ay mannemnem si lawa. Manplanos manproblimaan ya ietekanay iib-a na.

¹⁵Ngem sisya met laeng di makna sin bito ay inamag na para sin gagait na.

¹⁶Madosa gapo met laeng sin lawa ay am-amagena tan din panakitanas odom yan mantaoli met laeng en sisya.

¹⁷Diyos ay Kangatoan, man-iyamanak sin kinalinteg mo. Mankantaak ay mangidaydayaw sin ngadan mo.