SALAMO 7:2-17

²leona na heto bae daregu na garina, asi ihamaurigu bae verigu oho na garina.

³Iehova e, egu Dirava, ini bama kara toma, eiava imagu bema kerere,

⁴eiava turagu bama kara dika henia, eiava inaigu ena ḡau bama dadi kava.

⁵Inaigu ese baine havagu ela bona baine lasigu tao, egu mauri na tano ai baine moia tao, bona laumagu na ḡahu ai baine moimoilaia.

⁶Iehova e, mai badumu ida a tore isi, lau inaigu edia badu ba laoa ahu totona a tore isi; Egu Durava e, a noga, hahemaoro vada o haheḡanilaia.

⁷Bese idau-idau edia hegogo ese baine ḡeḡemu ahu; atai ai ba helai, idia daediai.

⁸Iehova ese bese idau-idau e hahemaoro henidiamu: Iehova e, egu kara maoromaoro bona egu lalo-ḡoevaḡoeva heḡereḡeredia ba hahemaoro henigu.

⁹Kara havara taudia edia dika ba hadokoa, a kara maoromaoro taudia do ba haginidia; badina be oi na kara maoromaoro Diravana, taunimanima daradia bona lalodia o dibadiamu.

¹⁰Dirava na egu kesi, ia ese laloḡoevaḡoeva taudia e hamauridiamu.

¹¹Dirava na hahemaoro tauna, mai ena kara maoromaoro; dina iboudiai Dirava ese kara dika e badu heniamu.

¹²Tau ta basine helalo kerehai, Dirava ese ena dare baine segea. Ena peva vada e beua, vada e rohea,

¹³ena ala-ala ḡaudia vada e abi heḡaeḡae, ena diba na lahi dibadia ai e halaodiamu.

¹⁴A itaia, kara havara tauna ese dika e havaraiamu, kara dika ai e rogorogomu, koikoi daladia e havaramu.

¹⁵Ia ese guri e ḡeia dobumu, bena e ḡeia gurina lalonai e moru dobimu.

¹⁶Ena kara dika na sibona kwarana ai ma e kaumu, ena daḡedaḡe na sibona tubuana ai e dihomu.

¹⁷Iehova baina hanamoa, ena kara maoromaoro dainai, Iehova, atai doriva-doriva Diravana, ladana baina imodaia.