Salmo 69:2-27

²Sin malosong ay pitek yan malmalnedak, magay kosto ay pan-gatinak. Wadaak sin malosong ay danom, dandaniak malned begew sin dalloyon.

³Nankedakedawak si badang mo et nabbayak, enggay nasaekak ya linmadag pay nan matak gapo si kaoogak sin nangan-anapak en sik-a ay Diyos ay pantaltalkak.

⁴Ad-ad-ado mo din book ko din omililiget ay magay gapo. Ad-ado din kaeegyat ay kalaban ko, layden da ay domadael, Apo. Intoy iyat ko pay ay mangitaoli koma si banag ay adiak met ina?

⁵Apo, ammom di kinaong-ong ko, adi mailibak en sik-a di basol ko.

⁶Yahweh ay Diyos ay Kangatoan di Turay na ay daydayawen di Israelita, baken koman sak-en di gapo na ay maibabain din mantalek ya mandayaw en sik-a.

⁷Naibabainak gapon sik-a, Apo.

⁸Nanbalinak ay mangili sin kakabsat ko.

⁹Kaman kaiw ay mapoppooan di kasasaad ko begew sin palalo ay pangisaksakitak sin beey mo. Din panglaslasoyan di ipogaw en sik-a et ibilang ko ay sak-en met laeng di laslasoyen da.

¹⁰Idi nanlolowaak ya init-itpek di dagaang ko, linmaslasoy da.

¹¹Sin nangibadoak si sako ay mangipailas ladingit ko, sinmis-iyek da.

¹²Sak-en di ol-oliten da sin kakalsada, din makabeteng yan sak-en di turong di kanta da.

¹³Ngem sak-en pay, mankararagak en sik-a, sin timpo ay laydem, somongbat ka koma. Gapo sin dakdake ay layad mo ay magay kolang na, tongpalem koma ay Diyos din karim ay omisalakan ka.

¹⁴Nay ay lomlomnedak sin pitek. Komay-at ka! Somalaknib ka kod sin kalaban ko ay nay da. Malosong ay danom di kad-ak, omisalakan ka!

¹⁵Adim kod ipalobos ay maianodak ono malnedak, bomadang ka into et ya mateyak.

¹⁶Patgam kod din kararag ko gapo sin kinasiged di adi manbalbaliw ay layad mo, somagong ka gapo sin dakdake ay seg-ang mo.

¹⁷Adi ka koman itabonan nan baam, Apo, songbatam koma ay dagos nan kararag ko, tan nay palalo di ligat ko.

¹⁸Somag-en ka ta omisalakan ka sin kalaban ko.

¹⁹Ammom din omin-insoltoan da, omibabain ya omipalawlawa da, amin ay kalaban ko, ammom daida.

²⁰Mansakit di nemnem ko gapo sin en da pangin-insolto et palaloy ladingit ko. Ninamnamak en waday someg-ang, ngem maga di madtengan. Kanak en waday lomiwliwa, ngem kambaw et maga.

²¹Idi mandagaangak, manpait ay kaman sabidong di inpakan da, idi manbigawak, soka di inpainom da.

²²Sapay koma ta bigla ay madpap da sin pakipangpanganan da, kaman titit ay sin tagdey yan makna da ono animal ay sin bito yan mag-as da olay mo kanan da en natalna di biyag da.

²³Magodab da koma abe ta say adi da makaila dowan da aben mabobok-ong si eng-enggana.

²⁴Ipalak-am mo koma din palalo ay bonget mo en daida ta maedasan da sin inkeddeng mo ay dosa.

²⁵Dadaelem koma din kampo da yan adi kan ipalobos ay way makalasat en daida.

²⁶Tan palpaligaten da din enggay dinosam, yan sepsepen da ay sakitan din sinogatam.

²⁷Nemnemem koma amin di basol da sin pangokomam en daida ya adi kan itapi ay isalakan daida.