Salmo 59:1-12

¹Omisalakan ka ya somalaknib ka, Apo, sin gomobat ay kalaban ko.

²Omisalakan ka sin mankakekedse, daida ay manpanggep ay pomse.

³Ilaem din kalaban ko ay magay seg-ang da, semsem-ed da ay pomse, olay magay basol kon daida.

⁴Dalasen da ay mansagana ta pomse da, ilaem kod ta somalaknib ka.

⁵Yahweh, Kangatoan ay Turay ay Diyos di Israelita, ilaem kod ta dosaem nan nanasyon ay nay da. Manglilipot da, adi ka kod seg-angan daida.

⁶Nilablabi ay mantaoli dan kalaban ko, manngangaed da ay manlikliked sin siyodad ay kaman dan aso.

⁷Pag insolto di bomala sin tepek da, kaman kampilan ay makasogat din kali da, tan kanan da en magay mannge en daida.

⁸Ngem sik-a ay Diyos, sis-iyekam ay laslasoyen daida.

⁹Sik-ay pantalkak ya poon di bikas ko, kaman kan makneg ay beey ay pankamangak, Apo.

¹⁰Omali ka ay bomadang begew sin adi manbalbaliw ay layad mo, ipailam en sak-en din kaabakan di kalaban ko.

¹¹Adi ka kapese en daida, Diyos ay salaknib ko, ta adi linglingan din ipogaw ko. Dosaem daida babaen sin panakabalin mo ta owat dan lomikeliked, Apo.

¹²Basol ya pag lawlawa di kalien da. Kaman da koman titit ay matagdey sin kinatangsit da, tan maetek ya makabaos da.