Salmo 34:2-12

²It-ek ko gapo sin kinasiged na. Amin koma ay nabibiteg ya napakombaba et dengngen da ya manragsak da.

³Maitapi kayon sak-en ta man-es-esa tako ay mamigbig sin kinangaton Diyos Apo.

⁴Nankararagak en Diyos yan sinongbatana, din amin ay pan-egyatak et kinaana.

⁵Din mantalek en sisya et maragsakan da, adi da polos madismaya.

⁶Nankedaw nan kaseseg-ang ay ipogaw si badang na et insalakana sin amin ay ligat na.

⁷Bantayan din anghel Diyos din mangipateg en sisya et isalakana si daida.

⁸Padasen yo si Diyos ta maammoan yo din kinasiged na. Nagasat din komamang en sisya.

⁹Patgen yo si Diyos, dakayo ay ipogaw na, tan din mangipateg en sisya et wada amin di kasapolana.

¹⁰Olay din layon yan madagaangan da tan mankolang das kanen da, ngem din ipogaw ay si Diyos di kamangen da et maga di pankolangan da.

¹¹Dengngen yo ay an-ak ko ta itdoak dakayo ay mangipateg en Diyos Apo.

¹²Sino en dakayo di manglayad ay matagotago ta kagkagam-is ay biyag di ganasen yo?