Salmo 18:20-49

²⁰Binindisyonan Diyos sak-en gapo sin kinalinteg ko, indawat nay gon-gonak tan magay basol ko.

²¹Tan inon-onodak din ogali ay laydena, yan adiak dinokogan sisya.

²²Tinongtongpal ko din linteg na, magay nilabsing ko ay bilina.

²³Sin sangoanan Diyos, magay maipabasol en sak-en, tan inaddawiak di enak panbasolan.

²⁴Isonga gon-gonaanas sak-en tan nalintegak, ammo na ay magay binmasolak.

²⁵Sin ipogaw ay matalek, ipailan Diyos ay matalek sisya, ipaila na din kinasanto na sin magay kaoyawana.

²⁶Sin nalinis et maila din kinalinis na, ngem sin nasikap ay manowitik si ib-a na, nalaing si Diyos ay mangabak en sisya.

²⁷Isalakana din napakombaba, ngem ipababa na din mangipapangatos awak na.

²⁸Si Yahweh ay Diyos ko di silaw ko, silawana din mabolinget ay danan ko.

²⁹Gapo sin badang na, abakek di ad-ado ay kalaban ko, alad di ili yan makalay-at ko.

³⁰Sinay ay Diyos yan kostokosto di amagena, maila ay pag tet-ewa di inbagbaga na. Sin am-in ay mankamang en sisya, kaman kasay ay salaknib da.

³¹Magay odom ay Diyos mo adi et din Apo. Magay odom ay pankamangan mo adi et si Diyos tako.

³²Sisya si Diyos ay mangidawdawat si pigsak, bantayana din pandanak et magay pan-egyatak.

³³Pinapigsa na din sikik et kaman din kapigsan di ogsa, et olay sin kakayangan ay dontog, adiak maisokba.

³⁴Din iyat ko ay makigobat yan itdo na ta say kabaelak ay mangosal si bronsi ay pana.

³⁵Sinmalaknib ya inmisalakan sisya, pinmigsaak gapo sin badang na. Magay pandanagak gapo sin panakabalina.

³⁶Pinasiged mo din pandanak et inmannawa, isonga adiak naisokba.

³⁷Inapayaw ko din kalaban ko ya dinpap kos daida, adiak sinmaldeng enggana ay namaga da.

³⁸Adi da nakabangon sin nangtodokak en daida, sin sangoanak yan naiwalang da.

³⁹Tan din pigsak ay makigobat yan indawat na, inabak ko din kalaban ko begew en sisya.

⁴⁰Inturong Diyos et din kalaban ko yan tinmagtag da, din omililiget yan pinsek daida.

⁴¹Nan-adawag da ngem magay binmadang en daida. Nanpakpakaasi dan Diyos ngem adi na pinatgan kararag da.

⁴²Minekmek kos daida et nanbalin das kaman lota ay sin dagem, nalaka ay maitayaw da. In-gatigatin kos daida ay kaman pitek sin kalsada.

⁴³Inmisalakan si Diyos sin ipogaw ay kinmonkontra, sin nanasyon, nanbalinenas sak-en ay pangolo da, ipogaw ay adiak am-ammo, yan nay iturayak daida.

⁴⁴Manyakog-ong din nanasyon sin sangoanak, tongpalen da ay dagos mo dengngen dan ibagak.

⁴⁵Enggay namaga din toled da, et manpayegpeg das egyat da ay bomala sin nantatabonan da.

⁴⁶Matagotago din Apo! Madaydayaw din salaknib ko! En yo et daddad-aten din kinangaton Diyos ay mangisalakan en sak-en.

⁴⁷Binmadang et inabak kon kalaban ko, inpaiturayanan sak-en din ipogaw ay ad-ado.

⁴⁸Sin mankakekedse ay kalaban ko, inmisalakan sisya, yan insaad nas sak-en ay nangatngato mo daida.

⁴⁹Isonga sin kaipoipogaw, idaydayaw kos sisya, mankantaak ay mangidaydayaw sin ngadana.