Salmo 147:1-16

¹Madaydayaw din Apo! Mayat ay mankanta si pangidayaw en Diyos tako, lebbeng na ay idayaw sin kanta din Apo.

²Itaolin Diyos sin ili da din naipaaddawi ay Israelita et kasinan saaden din siyodad ay Jerusalem.

³Panragsakena din palalo ay madisdismaya, ya papigsaena kasin di nemnem da.

⁴Din tatalaw et inkeddeng na di kaad-ado da, nginadanana amin daida.

⁵Si Yahweh ay Diyos tako et nangato ya manakabalin sisya, magay lokod di kinalaing na.

⁶Ikalintegana ya ayowanana din napakombaba, ngem itpig na sin tapok din laway nemnem na.

⁷Mankanta ya man-gitara tako ay man-iyaman sin Diyos tako.

⁸Komotana si liboo ed daya, idawtana si odan din daga, din logam sin dontog yan pagabayena.

⁹Idawtana din animal si kanen da ya din koyat di gayang mo mankedaw da.

¹⁰Baken say panlaydan din Apo di napigsa ay kabayo ya natoled ay soldado.

¹¹Ngem say panlaydana din mangipateg en sisya ya mantalek sin adi manbalbaliw ay layad na.

¹²Dakayo ay man-ili ed Zion ono Jerusalem, si Yahweh ay Diyos yo di en yo dayawen.

¹³Paknegena din liteb di siyodad yo ya bindisyonana din an-ak yo.

¹⁴Pawadaena di talna sin intiro ay ili yo, mansobsobray makan ay idawat nan dakayo.

¹⁵Ibaga na din bilina et maammoan ay dagos sin intiro ay daga.

¹⁶Kaman galey din andap ay iaplag na, kaman tapok ay isapowak na.