Salmo 119:102-175

¹⁰²Adiak baybay-an din inkeddeng mo, tan sik-a ay mismo di omit-itdo.

¹⁰³Din kalim et makaay-ayo di kadngeana, mam-is mo din anig di katamtamana.

¹⁰⁴Lomaingak gapo sin bilbilin mo, isonga amin ay lawa ay ogali et kaliliget ko.

¹⁰⁵Din kalim et kaman say silaw nan biyag ko, tan itdo na din amagek ay kosto.

¹⁰⁶Tongpalek din insapatak, din nalinteg ay bilbilin mo et onodak.

¹⁰⁷Sik-a ay Diyos, palalo nan ligat ko, tongpalem kod din inkarim ta isalakan mo nan biyag ko.

¹⁰⁸Awatem kod ay Diyos nan kararag kon sik-a ay pandayaw ko ya itdom koma en sak-en din bilbilin mo.

¹⁰⁹Kanayon ay ipospostak din biyag ko, ngem adiak nilinglingan din kalim ay inpaisolat mo.

¹¹⁰Nan-isagana da din managbasol si enak kadadaelan, ngem din bilbilin mo, adiak dinokdokogan.

¹¹¹Din nabanol ay itdon di linteg mo, maiarig das komakaman ay tawid ko, daida di mangiparagsak isnan nemnem ko.

¹¹²Ninemnem ko ay tongpalen din linteg mo engganas pap-eng di biyag ko.

¹¹³Din nankadwa di pammati na et kalkaliget ko, ngem laylaydek pay din linteg mo.

¹¹⁴Sik-a di pankamangak ya salidak, din karim di pannamnamaak.

¹¹⁵Dakayo amin ay managbasol, komaan kayo, ta say tongpalek din bilbilin Diyos ko.

¹¹⁶Tomolong ka tan say inkarim ta manbiyagak, adim ipalobos ay madismayaak sin namnamak.

¹¹⁷Omitakkay ka ta magay pandanagak, ta kanayon ay din linteg mo di onodak.

¹¹⁸Am-in ay omaddawi sin linteg mo, sigaam si daida, tan magay silbin din sikap ya etek da.

¹¹⁹Basura am-in di lawlawa ay ipogaw sin pannemnem mo, say begew ay laylaydek din linteg mo.

¹²⁰Begew en sik-a, palalo ay emegyatak, mo nemnemek din dosa ay ikeddeng mo, manpayegpegak.

¹²¹Say inamag ko din nalinteg ya kosto, adi ka kod bomaybay-an sin kalaban ko.

¹²²Inkarim ay badangam sak-en ay mansilsilbin sik-a, adim kod palobosan ay din mangipapangatos awak da yan pomaligat da.

¹²³Nabbay nan matak ay manseseed sin panangisalakan mo ta matongpal din inkarim, Apo.

¹²⁴Ipailam koman sak-en din adi manbalbaliw ay layad mo ya itdom din linteg mo.

¹²⁵Mansilbiak en sik-a, Apo, isonga ipaawat mo koma din intolag mo.

¹²⁶Timpo na ay man-gonay ka, Apo, tan adi da tongtongpalen din linteg mo.

¹²⁷Din pananglayad ko sin linteg mo yan nasursurok mo din layad ko si kanginaan ay balitok.

¹²⁸Isonga onodak amin ay bilbilin mo, amin ay lawa yan kaliliget ko.

¹²⁹Sigesiged din intolag mo, isonga ipakat ko amin ay kabaelak ta matongpal ko.

¹³⁰Mo waday mangilawag sin kalim sin magay ammo na, kaman silaw ay mangipalaing en daida.

¹³¹Kaman bigaw si danom din layad ko ay mangammo sin linteg mo.

¹³²Dengngem kod sak-en ya maseg-ang ka, tan say iyat mo sin amin ay manglaylayad en sik-a.

¹³³Tongpalem koma din karim ta omayowan ka, ya adi ka ipalobos ay omituray din lawa.

¹³⁴Omisalakan ka kod sin mamalpaligat en sak-en ta say din bilbilin mo et mabalin ay enak tongpalen.

¹³⁵Maseg-ang ka en sak-en ay bag-en mo ta say itdom din linteg mo.

¹³⁶Kaman ginawang nan lowak begew si sakit di nemnem ko, tan adi tongpalen di ipogaw din linteg mo.

¹³⁷Nalinteg ka ay Diyos et siya abe sin ikeddeng mo.

¹³⁸Kostokosto din linteg mo.

¹³⁹Palalo nan bonget ko, tan adi ikaskason din kalaban ko din linteg mo.

¹⁴⁰Laylaydek din karim en sak-en, tan sigurado ay en ka tongpalen.

¹⁴¹Nababaak ya maga di bilang ko, ngem adiak liw-an din bilbilin mo.

¹⁴²Nalinteg ka si eng-enggana, ya din kalim et dadlon tet-ewa.

¹⁴³Palalo di problemak ya ligat ko, ngem say panragsakak din bilbilin mo.

¹⁴⁴Kosto si eng-enggana din intolag mo, tapiam kod din pangawat ko ta way iyat ko ay matago.

¹⁴⁵Naimposoan ay mankararagak en sik-a, Apo, patgam koma et patiek din bilbilin mo.

¹⁴⁶Man-adawagak en sik-a ay mankedaw si badang mo, omisalakan ka ta tongpalek din intolag mo.

¹⁴⁷Daan pomat-a yan bomangonak ay mankararag, din kalim di pantaltalkak.

¹⁴⁸Maninsinlabi ay adiak maseyseyep ta say din karim di nemnemnemek.

¹⁴⁹Patgam koma din kararag ko gapo sin adi manbalbaliw ay layad mo. Isalakan mo koma nan biyag ko babaen sin nalinteg ay ikeddeng mo.

¹⁵⁰Din makedse ay pomaligat yan somag-en dan sak-en, din linteg mo yan polos ay adi da tongpalen.

¹⁵¹Ngem asag-en ka en sak-en, Apo, ya pag tet-ewa din bilbilin mo.

¹⁵²Sin intolag mo, nabayag ay enak naammoan ay insaad mo ta magay pap-eng na ya komakaman.

¹⁵³Ilaem nan ligat ko ta en ka omisalakan, tan din bilbilin mo yan adiak nilinglingan.

¹⁵⁴Sapay koma ta ikalintegam sak-en ya somalaknib ka, tongpalem koma din karim ta omisalakan ka.

¹⁵⁵Adi maisalakan din mangam-amag si lawa, tan din linteg mo yan dinokogan da.

¹⁵⁶Dakdake din seg-ang mo, Apo, isalakan mo koma nan biyag ko babaen sin nalinteg ay ikeddeng mo.

¹⁵⁷Ad-ado di pomalpaligat ya kalaban ko, ngem adiak liwayan ay mantongpal sin intolag mo.

¹⁵⁸Malmaligetak ay mangila sin baken napodno, tan adi da tongpalen din bilbilin mo.

¹⁵⁹Ilaem mo kas-anoy pananglayad ko sin linteg mo, omisalakan ka gapo sin adi manbalbaliw ay layad mo.

¹⁶⁰Tet-ewa amin din kalim, Apo, komakaman si eng-enggana amin din nalinteg ay inkeddeng mo.

¹⁶¹Pomaligat di tuturay olay mo magay gapo, ngem say egyatak anggoy din kalim, Apo.

¹⁶²Begew sin karim enak maragsakan, kaman ragsak di nakadteng si dakdake ay kinabaknang.

¹⁶³Kaliliget ko amin ay etek, ngem din linteg mo et laylaydek.

¹⁶⁴Mamin pito si esay agew ay man-iyamanak, Apo, gapo sin nalinteg ay inkeddeng mo.

¹⁶⁵Din manglaylayad si linteg mo yan mayat ya natalna di biyag da, maga polos di kaisokbaan da.

¹⁶⁶Sedsed-ek ay omisalakan ka, Apo, ya tongtongpalek din bilbilin mo.

¹⁶⁷Say onodak din intolag mo, tan peteg ay laylaydek, Apo.

¹⁶⁸Amin ay linteg ya bilbilin mo yan tongpalek, tan iilaem amin din am-amagek.

¹⁶⁹Sapay koma ta omdas en sik-a din kararag ko, gapo ta inkarim, lawlawagam nan nemnem ko.

¹⁷⁰Dengngem kod nan adawag ko ta omisalakan ka, tan say inkarim, Apo.

¹⁷¹Kanayon ay idaydayaw kos sik-a tan itdom din linteg mo.

¹⁷²Din maipanggep sin kalim yan ikantak to, tan kosto amin ay bilbilin mo.

¹⁷³Nakasagana ka koma ay somalaknib, Apo, tan on-onodak din bilbilin mo.

¹⁷⁴Sedsed-ek din panangisalakan mo, maragsakanak sin linteg mo.

¹⁷⁵Ipalobos mo koma ay enak matago ta way iyat ko ay mangdayaw en sik-a, Apo. Sapay koma ta makatolong en sak-en din bilbilin mo.