ܡܙܡܘܪ̈ܐ 119:102-175

¹⁰²ܡ̣ܢ ܕܝܼܘܵܢܘܼܟ݂ ܠܵܐ ܩܠܝܼܒ ܠܝܼ، ܣܵܒܵܒ ܐܲܢ݇ܬ ܩܵܡ ܡܲܠܦܸܬ ܠܝܼ.

¹⁰³ܟܡܵܐ ܚܸܠܝܹ̈ܐ ܝܢܵܐ ܠܫܵܡܵܟܝܼ̈ ܗܹܡܸܙܡܵܢܘܼ̈ܟ݂، ܒܘܼܫ ܚܸܠܝܹ̈ܐ ܡ̣ܢ ܕܸܒ݂ܫܵܐ ܠܦܘܼܡܝܼ.

¹⁰⁴ܡ̣ܢ ܦܘܼܩܵܕܘܼ̈ܟ݂ ܟܹܐ ܫܵܩܠܹܢ ܦܲܪܡܲܝܬܵ‌ܐ، ܒܘܼܬ ܐܵܗܵܐ، ܣܢܹܐ ܠܝܼ ܟܠܔ ܐܘܼܪܚܵܐ ܕܕܘܼܓܠܵܐ.

¹⁰⁵ܫܪܵܓ݂ܵܐ ܝܠܹܗ ܠܐܲܩܠܝܼ ܚܲܒܪܘܼܟ݂، ܘܒܲܗܪܵܐ ܠܫܒ݂ܝܼܠܝܼ.

¹⁰⁶ܝܡܹܐ ܠܝܼ ܘܒܸܬ ܡܲܩܘܹܝܢ ܡܵܘܡܝܼܬ‌ܝܼ، ܠܸܢܛܵܪܵܐ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.

¹⁰⁷ܦܝܼܫ ܠܝܼ ܡܘܼܠܝܸܨܵܐ ܟ̰ܸܡ ܪܵܒܵܐ، ܝܵܐ ܡܵܪܝܵܐ، ܡܲܚܝܼ ܠܝܼ ܐܲܝܟ݂ ܚܲܒܪܘܼܟ݂.

¹⁰⁸ܩܲܒܸܠܔ ܠܗܘܿܢ ܩܘܼܪ̈ܒܵܢܹܐ ܕܨܸܒ݂ܝܵܢܵܐ ܡ̣ܢ ܦܘܼܡܝܼ، ܝܵܐ ܡܵܪܝܵܐ، ܘܕܝܼܘܵܢܘܼ̈ܟ݂ ܡܲܠܸܦ ܠܝܼ.

¹⁰⁹ܓܵܢܝܼ ܒܩܹܘܲܢܕܹܢܘܿܣ ܝܠܵܗ̇ ܐܲܡܝܼܢܵܐܝܼܬ، ܐܝܼܢܵܐ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.

¹¹⁰ܡܘܼܬܸܒ݂ ܠܗܘܿܢ ܪ̈ܲܫܝܼܥܹܐ ܦܲܚܵܐ ܐܸܠܝܼ، ܐܝܼܢܵܐ ܡ̣ܢ ܦܘܼܩܵܕܘܼ̈ܟ݂ ܠܵܐ ܚܠܝܼܛ ܠܝܼ.

¹¹¹ܗܘܹܐ ܠܗܘܿܢ ܝܵܪܬܘܼܬܵ‌ܐ ܐܸܠܝܼ ܣܵܗܕܘܵܬܘܼ̈ܟ݂ ܠܥܵܠܲܡ، ܣܵܒܵܒ ܦܨܝܼܚܘܼܬܵ‌ܐ ܕܠܸܒܝܼ ܝܢܵܐ.

¹¹²ܡܘܼܬܸܒ݂ ܠܝܼ ܠܸܒܝܼ ܠܸܥܒ݂ܵܕܵܐ ܩܵܢܘܿܢܘܼ̈ܟ݂، ܠܥܵܠܲܡ، ܗܲܠܔ ܚܲܪܬܵ‌ܐ.

¹¹³ܠܦܠܝܼܥܵܐ ܒܪܸܥܝܵܢܵܐ ܟܹܐ ܣܵܢܹܝܢ، ܐܝܼܢܵܐ ܠܢܵܡܘܿܣܘܼܟ݂ ܟܹܐ ܡܲܚܸܒܸܢ.

¹¹⁴ܣܸܬܵܪܝܼ ܘܡܵܛܵܠܝܼ ܐܲܢ݇ܬ ܝܼܘܸܬ، ܠܚܲܒܪܘܼܟ݂ ܟܹܐ ܣܵܦܪܹܢ.

¹¹⁵ܪܚܘܿܩܘܼܢ ܡܸܢܝܼ، ܝܵܐ ܒܝܼܫܹ̈ܐ، ܕܢܵܛܪܹܢ ܦܘܼܩܕܵܢܹ̈ܐ ܕܐܲܠܵܗ‌ܝܼ.

¹¹⁶ܣܢܘܿܕ ܠܝܼ ܐܲܝܟ݂ ܗܹܡܸܙܡܵܢܘܼܟ݂ ܩܵܐ ܕܚܵܝܹܝܢ، ܘܠܵܐ ܫܵܒ݂ܩܹܬ ܢܵܟ݂ܦܹܢ ܡ̣ܢ ܣܲܒ݂ܪܵܐ ܕܐܝܼܬ ܠܝܼ.

¹¹⁷ܣܢܘܿܕ ܠܝܼ ܩܵܐ ܕܦܵܝܫܹܢ ܦܘܼܪܩܵܐ، ܘܒܸܬ ܚܵܝܪܹܢ ܒܩܵܢܘܿܢܘܼ̈ܟ݂ ܐܲܡܝܼܢܵܐܝܼܬ.

¹¹⁸ܡܘܼܣܠܹܐ ܠܘܼܟ݂ ܠܟܠܵܝܗ‌ܝ ܚܵܠܛܵܢܹ̈ܐ ܡ̣ܢ ܩܵܢܘܿܢܘܼ̈ܟ݂، ܣܵܒܵܒ ܣܪܝܼܩܵܐ ܝܠܹܗ ܦܸܠܡܵܝܗ‌ܝ.

¹¹⁹ܐܲܝܟ݂ ܚܸܠܬ ܕܣܹܐܡܵܐ ܪܘܼܦܝܵܝ ܠܘܼܟ݂ ܟܠܵܝܗ‌ܝ ܪ̈ܲܫܝܼܥܹܐ ܕܐܲܪܥܵܐ، ܒܘܼܬ ܐܵܗܵܐ، ܟܹܐ ܡܲܚܸܒܸܢ ܠܟܠܵܝܗ‌ܝ ܣܵܗܕܘܵܬܘܼ̈ܟ݂.

¹²⁰ܪܘܼܬܪܸܬ ܠܹܗ ܒܸܣܪܝܼ ܒܥܸܠܬܵ‌ܐ ܕܣܘܼܪܵܕܘܼܟ݂، ܘܡ̣ܢ ܕܝܼܘܵܢܘܼ̈ܟ݂ ܟܹܐ ܙܵܕܥܹܢ.

¹²¹ܥܒ݂ܝܼܕ ܠܝܼ ܕܝܼܘܵܢ ܘܙܲܕܝܼܩܘܼܬܵ‌ܐ، ܠܵܐ ܫܵܒ݂ܩܹܬ ܠܝܼ ܒܐܝܼܕܵܐ ܕܙܵܠܡܵܢܝܼ̈.

¹²²ܗܘܝܼ ܥܲܪܵܒ݂ܵܐ ܕܪܹܓܘܼܟ݂ ܠܛܵܒ݂ܬܵ‌ܐ، ܠܵܐ ܫܵܒ݂ܩܹܬ ܙܵܠܡܝܼ ܐܸܠܝܼ ܚܵܬܪ̈ܵܢܹܐ.

¹²³ܥܲܝܢܝܼ̈ ܚܒܹܐ ܠܗܘܿܢ ܒܸܣܦܵܪܵܐ ܠܦܘܼܪܩܵܢܘܼܟ݂، ܘܠܗܹܡܸܙܡܵܢ ܕܙܲܕܝܼܩܘܼܬܘܼܟ݂.

¹²⁴ܥܒ݂ܘܿܕ ܥܲܡ ܪܹܓܘܼܟ݂ ܐܲܝܟ݂ ܛܲܝܒܘܼܬܘܼܟ݂، ܘܩܵܢܘܿܢܘܼ̈ܟ݂ ܡܲܠܸܦ ܐܸܠܝܼ.

¹²⁵ܥܲܒ݂ܕܘܼܟ݂ ܝܼܘܸܢ ܐܵܢܵܐ، ܡܲܦܪܸܡ ܠܝܼ ܕܝܵܕܥܹܢ ܣܵܗܕܘܵܬܘܼ̈ܟ݂.

¹²⁶ܥܕܵܢܵܐ ܝܠܵܗ̇ ܕܥܵܒܹܕ ܚܲܕ ܡܸܢܕܝܼ ܡܵܪܝܵܐ، ܒܗ̇ܝ ܕܒܘܼܛܸܠܔ ܠܗܘܿܢ ܢܵܡܘܿܣܘܼܟ݂.

¹²⁷ܒܘܼܬ ܐܵܗܵܐ، ܟܹܐ ܡܲܚܸܒܸܢ ܦܘܼܩܕܵܢܘܼ̈ܟ݂، ܒܘܼܫ ܡ̣ܢ ܕܲܗܒ݂ܵܐ، ܘܡ̣ܢ ܕܲܗܒ݂ܵܐ ܨܸܦܝܵܐ.

¹²⁸ܒܘܼܬ ܐܵܗܵܐ، ܟܠܵܝܗ‌ܝ ܦܘܼܩܵܕܹ̈ܐ ܟܹܐ ܢܵܛܪܹܢ ܬܪܘܼܨܵܐܝܼܬ، ܟܠܵܗ̇ ܐܘܼܪܚܵܐ ܕܕܘܼܓܠܵܐ ܣܢܹܐ ܠܝܼ.

¹²⁹ܥܓ̰ܝܼܒܹ̈ܐ ܝܢܵܐ ܣܵܗܕܘܵܬܘܼ̈ܟ݂، ܒܘܼܬ ܐܵܗܵܐ ܢܛܝܼܪܵܝ ܠܵܗ̇ ܓܵܢܝܼ.

¹³⁰ܦܬܵܚܬܵ‌ܐ ܕܚܲܒܪܘܼܟ݂ ܟܹܐ ܒܲܗܪܸܢܵܐ، ܟܹܐ ܡܲܦܪܸܡܵܐ ܠܗܘܿܢ ܦܫܝܼ̈ܛܹܐ.

¹³¹ܦܘܼܡܝܼ ܦܬܝܼܚ ܠܝܼ ܘܡܘܼܠܗܸܕ ܠܝܼ، ܣܵܒܵܒ ܠܦܘܼܩܕܵܢܘܼ̈ܟ݂ ܪܘܼܚܪܸܚ ܠܝܼ.

¹³²ܕܘܼܪ ܠܟܸܣܠܝܼ ܘܪܲܚܸܡ ܥܲܠܝܼ، ܐܲܝܟ݂ ܕܝܼܘܵܢܘܼܟ݂ ܠܡܲܚܸܒܵܢܹ̈ܐ ܕܫܸܡܘܼܟ݂.

¹³³ܡܲܩܘܝܼ ܦܵܣܘܿܥܝܵܬ‌ܝܼ̈ ܒܗܹܡܸܙܡܵܢܘܼܟ݂، ܘܠܵܐ ܫܵܒ݂ܩܹܬ ܗܲܟܸܡ ܥܲܠܝܼ ܟܠܔ ܥܵܘܠܵܐ.

¹³⁴ܦܲܪܸܩ ܠܝܼ ܡ̣ܢ ܙܠܘܼܡܝܵܐ ܕܒܲܪܢܵܫܵܐ، ܩܵܐ ܕܢܵܛܪܹܢ ܦܘܼܩܵܕܘܼ̈ܟ݂.

¹³⁵ܒܲܗܪܸܢ ܦܵܬܘܼܟ݂ ܥܲܠܔ ܪܹܓܘܼܟ݂، ܘܡܲܠܸܦ ܠܝܼ ܩܵܢܘܿܢܘܼ̈ܟ݂.

¹³⁶ܫܵܩ̈ܝܼܵܬܹ‌ܐ ܕܡ̈ܝܼܵܐ ܓ̰ܪܹܐ ܠܗܘܿܢ ܡ̣ܢ ܥܲܝܢܝܼ̈، ܣܵܒܵܒ ܠܵܐ ܢܛܝܼܪܗܘܿܢ ܢܵܡܘܿܣܘܼܟ݂.

¹³⁷ܙܲܕܝܼܩܵܐ ܝܘܸܬ ܐܲܢ݇ܬ، ܝܵܐ ܡܵܪܝܵܐ، ܘܬܪ̈ܘܼܨܹܐ ܝܢܵܐ ܕܝܼܘܵܢܘܼ̈ܟ݂.

¹³⁸ܦܩܝܼܕܵܝ ܠܘܼܟ݂ ܣܵܗܕܘܵܬܘܼ̈ܟ݂ ܒܙܲܕܝܼܩܘܼܬܵ‌ܐ، ܘܒܟܠܔ ܡܗܘܼܡܢܘܼܬܵ‌ܐ.

¹³⁹ܩܵܡ ܐܵܟܹܠܔ ܠܝܼ ܛܢܵܢܝܼ، ܣܵܒܵܒ ܡܘܼܢܫܹܐ ܠܗܘܿܢ ܚܲܒܪ̈ܵܢܘܼܟ݂ ܕܸܫ̃ܡܸܢܝܼ̈.

¹⁴⁰ܨܘܼܪܸܦܬܵ‌ܐ ܝܠܵܗ̇ ܗܹܡܸܙܡܵܢܘܼܟ݂ ܪܵܒܵܐ، ܘܪܹܓܘܼܟ݂ ܟܹܐ ܡܲܚܸܒ ܠܵܗ̇.

¹⁴¹ܙܥܘܿܪܵܐ ܝܘܸܢ ܐܵܢܵܐ ܘܡܘܼܣܠܝܼܵܐ، ܐܝܼܢܵܐ ܦܘܼܩܵܕܘܼ̈ܟ݂ ܠܵܐ ܢܸܫܝܵܝ ܠܝܼ.

¹⁴²ܙܲܕܝܼܩܘܼܬܘܼܟ݂ ܙܲܕܝܼܩܘܼܬܵ‌ܐ ܝܠܵܗ̇ ܠܥܵܠܲܡ، ܘܢܵܡܘܿܣܘܼܟ݂ ܫܪܵܪܵܐ ܝܠܹܗ.

¹⁴³ܥܵܘܩܵܢܵܐ ܘܐܘܼܠܨܵܢܵܐ ܩܵܡ ܡܲܫ݇ܟ̰ܚܝܼ ܠܝܼ، ܐܝܼܢܵܐ ܒܲܣܝܼܡܘܼܬ‌ܝܼ ܝܢܵܐ ܦܘܼܩܕܵܢܘܼ̈ܟ݂.

¹⁴⁴ܙܲܕܝܼܩܘܼܬܵ‌ܐ ܝܢܵܐ ܣܵܗܕܘܵܬܘܼ̈ܟ݂ ܠܥܵܠܲܡ، ܗܲܒ݂ܠܔ ܠܝܼ ܦܲܪܡܲܝܬܵ‌ܐ ܕܚܵܝܹܝܢ.

¹⁴⁵ܩܪܹܐ ܠܝܼ ܒܟܠܹܗ ܠܸܒܵܐ؛ ܓ̰ܲܘܸܒ ܠܝܼ، ܝܵܐ ܡܵܪܝܵܐ، ܘܩܵܢܘܿܢܘܼ̈ܟ݂ ܒܸܬ ܢܵܛܪܹܢ.

¹⁴⁶ܩܪܹܐ ܠܝܼ ܐܸܠܘܼܟ݂، ܦܲܪܸܩ ܠܝܼ، ܘܒܸܬ ܢܵܛܪܹܢ ܣܵܗܕܘܵܬܘܼ̈ܟ݂.

¹⁴⁷ܩܕܝܼܡ ܠܝܼ ܓ̰ܲܠܕܹܐ ܒܨܲܦܪܵܐ ܘܓܥܹܐ ܠܝܼ، ܠܚܲܒܪܘܼܟ݂ ܣܦܝܼܪܝܼ.

¹⁴⁸ܦܬܝܼܚܹܐ ܝܢܵܐ ܥܲܝܢܝܼ̈ ܒܒܲܕ̈ܠܹܐ ܕܠܲܝܠܹܐ، ܠܗܲܓܘܼܝܹܐ ܗܹܡܸܙܡܵܢܘܼܟ݂.

¹⁴⁹ܫܡܹܥ ܩܵܠܝܼ ܐܲܝܟ݂ ܛܲܝܒܘܼܬܘܼܟ݂، ܝܵܐ ܡܵܪܝܵܐ، ܐܲܝܟ݂ ܕܝܼܘܵܢܘܼܟ݂ ܡܲܚܝܼ ܠܝܼ.

¹⁵⁰ܩܘܼܪܒܸܢܗܘܿܢ ܐܸܠܝܼ ܢܵܦܠܵܢܹ̈ܐ ܕܒܵܬܪ ܒܝܼܫܬܵ‌ܐ، ܪܚܝܼܩ ܠܗܘܿܢ ܡ̣ܢ ܢܵܡܘܿܣܘܼܟ݂.

¹⁵¹ܩܘܼܪܒܵܐ ܝܘܸܬ ܐܲܢ݇ܬ، ܝܵܐ ܡܵܪܝܵܐ، ܘܫܪܵܪܵܐ ܝܢܵܐ ܟܠܵܝܗ‌ܝ ܦܘܼܩܕܵܢܘܼ̈ܟ݂.

¹⁵²ܡ̣ܢ ܓ̰ܲܠܕܹܐ ܝܕܝܼܥ ܠܝܼ ܡ̣ܢ ܣܵܗܕܘܵܬܘܼ̈ܟ݂، ܕܠܥܵܠܲܡ ܫܘܼܬܐܸܣܵܝ ܝܘܸܬ.

¹⁵³ܚܙܝܼ ܐܘܼܠܨܵܢܝܼ ܘܦܲܨܝܼ ܠܝܼ، ܣܵܒܵܒ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.

¹⁵⁴ܥܒ݂ܘܿܕ ܕܝܼܘܵܢܝܼ ܘܦܲܪܸܩ ܠܝܼ، ܐܲܝܟ݂ ܗܹܡܸܙܡܵܢܘܼܟ݂ ܡܲܚܝܼ ܠܝܼ.

¹⁵⁵ܪܸܚܩܵܐ ܝܠܹܗ ܦܘܼܪܩܵܢܵܐ ܡ̣ܢ ܪ̈ܲܫܝܼܥܹܐ، ܣܵܒܵܒ ܠܩܵܢܘܿܢܘܼ̈ܟ݂ ܠܵܐ ܛܥܹܐ ܠܗܘܿܢ.

¹⁵⁶ܪܵܒܵܐ ܝܢܵܐ ܪ̈ܲܚܡܘܼܟ݂، ܝܵܐ ܡܵܪܝܵܐ، ܐܲܝܟ݂ ܕܝܼܘܵܢܘܼ̈ܟ݂ ܡܲܚܝܼ ܠܝܼ.

¹⁵⁷ܪܵܒܵܐ ܝܢܵܐ ܪ̈ܵܕܘܿܦܝܼ ܘܕܸܫ̃ܡܸܢܝܼ̈، ܐܝܼܢܵܐ ܡ̣ܢ ܣܵܗܕܘܵܬܘܼ̈ܟ݂ ܠܵܐ ܩܠܝܼܒ ܠܝܼ.

¹⁵⁸ܚܙܹܐ ܠܝܼ ܚܵܝܝܼܢܹ̈ܐ ܘܓܘܼܢܓܸܙ ܠܝܼ، ܣܵܒܵܒ ܗܹܡܸܙܡܵܢܘܼ̈ܟ݂ ܠܵܐ ܢܛܝܼܪܗܘܿܢ.

¹⁵⁹ܚܙܝܼ ܕܵܐܟ݂ܝܼ ܦܘܼܩܵܕܘܼ̈ܟ݂ ܟܹܐ ܡܲܚܸܒܸܢ، ܝܵܐ ܡܵܪܝܵܐ، ܐܲܝܟ݂ ܛܲܝܒܘܼܬܘܼܟ݂ ܡܲܚܝܼ ܠܝܼ.

¹⁶⁰ܐܝܼܬܘܼܬܵ‌ܐ ܕܚܲܒܪܘܼܟ݂ ܫܲܪܝܼܪܘܼܬܵ‌ܐ ܝܠܵܗ̇، ܘܠܥܵܠܲܡ ܝܼܢܵܐ ܟܠܵܝܗ‌ܝ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.

¹⁶¹ܓܘܼܪ̈ܵܢܹܐ ܢܦܝܼܠܔ ܠܗܘܿܢ ܒܵܬܪܝܼ ܒܠܵܐ ܥܸܠܬܵ‌ܐ، ܐܝܼܢܵܐ ܡ̣ܢ ܚܲܒܪ̈ܘܼܟ݂ ܟܹܐ ܙܵܕܹܥ ܠܸܒܝܼ.

¹⁶²ܒܸܦܨܵܚܵܐ ܝܘܸܢ ܐܵܢܵܐ ܥܲܠܔ ܗܹܡܸܙܡܵܢܘܼܟ݂، ܐܲܝܟ݂ ܗ̇ܘ ܕܡܲܫ݇ܟ̰ܸܚ ܣܠܵܒܬܵ‌ܐ ܪܵܒܵܐ.

¹⁶³ܟܹܐ ܣܵܢܹܝܢ ܠܕܘܼܓܠܵܐ ܘܟܹܐ ܓܲܢܓܸܙܸܢ ܡܸܢܹܗ، ܐܝܼܢܵܐ ܢܵܡܘܿܣܘܼܟ݂ ܟܹܐ ܡܲܚܸܒܸܢ.

¹⁶⁴ܫܒܲܥ ܓܵܗܹ̈ܐ ܒܝܵܘܡܵܐ ܟܹܐ ܫܲܒܚܸܢܘܼܟ݂، ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.

¹⁶⁵ܫܠܵܡܵܐ ܪܵܒܵܐ ܐܝܼܬ ܠܡܲܚܸܒܵܢܹ̈ܐ ܕܢܵܡܘܿܣܘܼܟ݂، ܘܠܲܝܬ ܐܸܠܵܝܗ‌ܝ ܬܘܼܪܩܵܠܵܐ.

¹⁶⁶ܣܒܝܼܪܝܼ ܒܦܘܼܪܩܵܢܘܼܟ݂، ܝܵܐ ܡܵܪܝܵܐ، ܘܦܘܼܩܕܵܢܘܼ̈ܟ݂ ܥܒ݂ܝܼܕ ܠܝܼ.

¹⁶⁷ܢܛܝܼܪܵܗ̇ ܓܵܢܝܼ ܣܵܗܕܘܵܬܘܼ̈ܟ݂، ܘܟܹܐ ܡܲܚܸܒܸܢܗܘܿܢ ܪܵܒܵܐ.

¹⁶⁸ܢܛܝܼܪܝܼ ܦܘܼܩܵܕܘܼ̈ܟ݂ ܘܣܵܗܕܘܵܬܘܼ̈ܟ݂، ܣܵܒܵܒ ܟܠܵܝܗ‌ܝ ܐܘܼܪ̈ܚܵܬ‌ܝܼ ܩܲܕܡ ܥܲܝ̈ܢܘܼܟ݂ ܝܼܢܵܐ.

¹⁶⁹ܩܲܪܒܸܢܵܐ ܡܲܩܘܲܚܬ‌ܝܼ ܠܟܸܣܠܘܼܟ݂، ܝܵܐ ܡܵܪܝܵܐ، ܐܲܝܟ݂ ܚܲܒܪܘܼܟ݂ ܡܲܦܪܸܡ ܠܝܼ.

¹⁷⁰ܥܵܒ݂ܪܵܐ ܩܲܕܡܘܼܟ݂ ܦܲܪܦܲܠܬ‌ܝܼ، ܐܲܝܟ݂ ܗܹܡܸܙܡܵܢܘܼܟ݂ ܦܲܨܝܼ ܠܝܼ.

¹⁷¹ܡܲܢܒܸܥܝܼ ܣܸܦܘܵܬ‌ܝܼ̈ ܬܸܫܒܘܿܚܬܵ‌ܐ، ܣܵܒܵܒ ܟܹܐ ܡܲܠܦܸܬ ܠܝܼ ܩܵܢܘܿܢܘܼ̈ܟ݂.

¹⁷²ܙܵܡܹܪ ܠܸܫܵܢܝܼ ܗܹܡܸܙܡܵܢܘܼܟ݂، ܣܵܒܵܒ ܟܠܵܝܗ‌ܝ ܦܘܼܩܕܵܢܘܼ̈ܟ݂ ܙܲܕܝܼܩܘܼܬܵ‌ܐ ܝܢܵܐ.

¹⁷³ܗܵܘܝܵܐ ܐܝܼܕܘܼܟ݂ ܠܗܲܝܘܼܪܝܼ، ܣܵܒܵܒ ܦܘܼܩܵܕܘܼ̈ܟ݂ ܓܘܼܒܹܐ ܠܝܼ.

¹⁷⁴ܪܘܼܚܪܸܚ ܠܝܼ ܠܦܘܼܪܩܵܢܘܼܟ݂، ܝܵܐ ܡܵܪܝܵܐ، ܘܢܵܡܘܿܣܘܼܟ݂ ܒܘܼܣܵܡܝܼ ܝܠܹܗ.

¹⁷⁵ܚܵܝܵܐ ܓܵܢܝܼ ܘܫܲܒܚܵܐ ܐܸܠܘܼܟ݂، ܘܕܝܼܘܵܢܘܼ̈ܟ݂ ܗܲܝܸܪܝܼ ܠܝܼ.