1Iehova e, emu badu ai basio gwvau henigu, emu badu ḡaraḡara ai basio hahisigu;
2badina be emu diba na lauegu ai vada e heholo vareai, oi imamu metauna na latagu ai.
3Hidiogu na se digaramu, emu badu dainai; turiagu na asie aukamu, egu kara dika daidiai;
4badina be egu kara havara na kwaragu ai vada e kau, idia na maduna metauna na heto, ihuana na asi goadagu.
5Berogu na bonadia e daemu, vada e bodaga, egu kavakava dainai.
6Lau na igo dihomu, na goru dihomu, dina idoinai na tai ḡadeḡademu.
7Badina be taugu anina e siahumu, hidiogu na se aukamu.
8Vada na manoka, hisi ese e gugubagumu; na ḡanaḡanamu, daragu e dokomu dainai.
9Ḡaubada e, egu ura idoinai oi dibamu, egu ḡanaḡana na emu ai se hehunimu.
10Kudougu e hetahamu, egu goada e oremu; matagu diaridia danu vada e rakatanigu.
11Turagu bona bamogu na egu gorere amo e gini daudaumu, bona varavaragu na dahu ai gigini.
12Egu mauri e tahuamu taudia ese edia idoa e atomu; ihadikagu e uramu taudia ese hereva dikadia na latagu ai e gwauraimu, bona dina idoinai ikoigu daladia e haeromu.
13A lau na taia-kudima tauna na heto, asina kamonaimu, mu tauna, uduna se haḡaiamu, na heto.
14Oibe, lau na se kamonaimu tauna na heto, uduna ai gwaugwau herevadia asie miamu tauna na heto.
15Iehova e, lau oi na narimumu; Ḡaubada e, egu Dirava, oi ba haere.
16Badina be na ḡuriḡurimu, na tomu “Mani emu kara aegu e dedimu negadia ai e heaḡimu taudia na ba laodia ahu, basie kirikirilaigu”.
17Badina be lau na vada ba ketomu, egu hisihisi na vairagu ai e miamu nega idoinai.
18Egu kara dika na gwaurai hedinaraimu, egu kara havara amo na helalo kerehaimu.
19Asi badina e inai henigumu taudia na mai goadadia, e inai henigu koikoimu taudia na hutuma.
20Egu kara namo na dika e davanalaiamu taudia na lau inaigu, badina be lau ese namo na ḡavaiamu.
21Iehova e, basio rakatanigu; egu Dirava e, egu amo dauhai basio noho.
22Ḡaubada e, lau ihamaurigu Diravana, a durugu haraḡa.
