SAAMUNƆ 35:13-26

¹³Tó aↄ̃ↄe gyãa kɛɛ yã sↄ̃, mɛɛ̀ uta kãsãa damɛ, mɛɛ̀ ma zĩnda busa kↄ̃n lɛ́yinao, mɛɛ̀ adua kɛńnɛ yãana sai,

¹⁴lán wà be aↄ̃ↄ dɛ ma gbɛ̃nna ke ma danɛ ũu bà. Mɛɛ̀gↄ̃ lili oo mìpɛɛna kↄ̃n pↄsiaao, lán wà bè ma dan mɛ́ɛ wɛ̃nda kɛɛnɛ bà.

¹⁵Mↄde kɛ̀ ma gɛ̃̀n sì, aↄ̃ lìgamazi kↄ̃n pↄnnaao, aↄ̃ ma zãmba kɛ̀ aↄ̃ lɛ̀ɛma, aↄ̃ ma yaka yãana sai.

¹⁶Aↄ̃ ma fabò pãsĩpãsĩ, aↄ̃ swaa pìtimazi.

¹⁷Dii, nɛ́gↄ̃ ma gwaa lɛ ai bↄrɛmɛ? Músu pìnↄↄ e ma kɛɛ gyáigyai, ǹ ma síḿma màgↄ̃ kú wɛ̃̀ndio.

¹⁸Mɛ́ n sáabu kpá pari kakↄ̃ana guu, mɛ́ n tↄ́ kpá gbɛ̃nↄ wáa.

¹⁹Ǹton tó ma ibɛɛnↄ ma yáa dↄro, ǹton tó gbɛ̃ kɛ̀ aↄ̃ zàmagu pãanↄ ma gwa kↄ̃n wɛ́ɛ zaaaoro.

²⁰Yã nnaa è bↄ ń lɛ́nlo, aↄ̃è yã di nↄ̀sɛyĩideenↄa.

²¹Aↄ̃è lɛ́ aɛ wà be: Ɛ̃hɛ̃, ɛ̃hɛ̃, wa wɛ́ɛ è.

²²Dii, n wɛ́ɛ è, ǹtongↄ̃ yĩtɛnaro, ma Dii, ǹtongↄ̃ zã̀maoro.

²³Ma Luda, ǹ fɛɛ ǹ zɛmao, ma Dii, ǹ tó yã bↄmao nna.

²⁴Nɛɛ̀ yã kɛ a zɛ́a, Dii ma Luda, ǹ yã nnaa kpáma, ǹton tó aↄ̃ ma yáa dↄro.

²⁵Ǹton tó aↄ̃ be ń swɛ̃̀n wà ma nɛro, ǹton tó aↄ̃ be wà ma mↄ bɛ̃ɛro.

²⁶Lán aↄ̃ↄe pↄnnaa kɛɛ ma wɛ́ɛtãmma musu nà, ǹ tó wí ń kũ mà ń kpɛɛ e. Lán aↄ̃ↄe bítakɛɛ ↄdↄamɛ nà, ǹ wí daḿma ǹ ń kpɛ bↄ.