SAAMUNƆ 22:3-29

³Ń kú adona ń vɛ̃ɛna kpatan, mmↄn kɛ̀ Isarailinↄ è n sáabu kpá.

⁴Ḿbe wa dezinↄ n náanɛ kɛ̀, aↄ̃ n náanɛ kɛ̀, ben n ń mì sì.

⁵Aↄ̃ lɛ́ zùnzi, ben aↄ̃ bↄkii è, aↄ̃ n náanɛ kɛ̀, ben wí e ń kũro.

⁶Kↄ̀kↄ nɛ́ngon ma ũ, gbɛ̃nteen ma ũro, wèe ma sↄ̃sↄ̃ↄ, wèe kya kaamagu.

⁷Gbɛ̃ kɛ̀ aↄ̃ↄe ma gwaanↄↄ e ma faboo, aↄ̃ↄe lɛ́zukii kɛɛma, aↄ̃ↄe ń mì kɛɛ degũdegũ wèe bee:

⁸Lán èe Dii náanɛ kɛɛ nà, ɛ̃ndɛ̃ à à mì sí, tó à yã kànɛmɛ, à à mì sí.

⁹Ḿbe n ma bↄ ma da gbɛɛɛn, n ma gwa aafia ma yↄ̃migurↄ.

¹⁰Má na n ↄzĩ zaa nɛ́'isↄmmɛ, ma Ludan n ũ zaalɛ má kú ma da gbɛɛɛn.

¹¹Ǹtongↄ̃ kúmao zã̀ro, zaakɛ wahaa kĩi kũ̀mao, gbɛ̃kee kuu à dↄmalɛro.

¹²Wà ligamazi paripari lán zùswareenↄ bà, wà ma kagura kɛ̀ lán Basã bùsu zùsware gbãaanↄ bà.

¹³Wèe lɛ́ aɛɛmazi lán músu ↄ́ↄdↄri kɛ̀ aↄ̃ↄe pↄ́ kɛɛ gyáigyainↄ bà.

¹⁴Ma gbãaa yã̀a lán í kwɛɛna bà, ma gupɛkiinↄ bↄ̀kũn píngi, ma mɛ̀ yↄ̀ lán zↄ́sa bà.

¹⁵Ma kòto gàga lán pɛ̃ɛ korii bà, ma nɛ́nɛ nà ma lɛ́ musu, wà ma daɛ lán gɛ̀ bà bùsutin.

¹⁶Lɛwannↄ gãli liganamazi, gbɛ̃ zaaa pìnↄ nànakↄ̃rɛma, aↄ̃ ma ↄↄnↄ kↄ̃n ma gbánↄ zↄ̃̀zↄ̃.

¹⁷Mɛ́ fↄ̃ mà a wánↄ naro píngi, wà wɛ́ɛ bìibiia, wèe ma gwaa.

¹⁸Aↄ̃ ma pↄ́kãsãanↄ kpàatɛtɛkↄ̃nɛ, aↄ̃ kàbankpɛ kɛ̀ ma uta yã musu.

¹⁹Dii, ǹtongↄ̃ kúmao zã̀ro, ḿbe ma gbãaa ũ, ǹ mↄ́ ǹ dↄmalɛ kpakpaa.

²⁰Ǹ ma bↄ aↄ̃ fɛ̃ɛdaa lɛ́zĩ, ǹ ma wɛ̃̀ndi sí lɛwan pìnↄa.

²¹Ǹ ma bↄ músu pìnↄ lɛ́zĩ, ǹ ma si zùsɛ̃tɛ pìnↄ kobaa.

²²Mɛ́ n tↄ́ bↄ ma gbɛ̃nↄ tɛ́, mɛ́ n sáabu kpá kakↄ̃ana guu.

²³A Dii vĩakɛrinↄ, à à sáabu kpá, a Yakubu boriinↄ, à à tↄ́ bↄ, a Isarailinↄ, à mì siɛnɛ.

²⁴Zaakɛ èe kya ká takaasideenlo, èe à wɛ̃ndakɛɛ faboro, èe mìkpɛɛ zunɛro, à swã kpà à wiipɛnazi.

²⁵Mɛ́ n sáabu kpá pari kakↄ̃ana guu, mɛ́ lù kɛ̀ má sɛ̀nnɛ papa n vĩakɛrinↄ aɛzĩ.

²⁶Takaasideenↄ é pↄ́ ble wà kã, Dii kii wɛ̀tɛrinↄ é à sáabu kpá, aↄ̃égↄ̃ kú wɛ̃̀ndio gurↄ píngi.

²⁷Andunalɛzɛkideenↄ égↄ̃ Dii dↄ̃ aↄ̃ aɛ dↄa, borii kɛ̀ aↄ̃ↄ kuunↄ é kúɛnɛ ń píngi,

²⁸zaakɛ kíblena nɛ́ Dii pↄ́mɛ, è kí ble bori píngia.

²⁹Anduna auzikideenↄ é dↄnzi kɛnɛ ń píngi kↄ̃n gbɛ̃ kɛ̀ aↄ̃ↄ kú gaa lɛ́zĩnↄ, gbɛ̃ kɛ̀ aↄ̃ gàa gákiianↄ é mì siɛnɛ ń píngi.