SAAMUNƆ 119:99-176 - Luda yã takada kↄ̃n Bokobaru yão

⁹⁹Ma wɛ́ɛzɛ̃ɛ dɛ ma yãdannɛrinↄ pↄ́la ń píngi, zaakɛ ma laasuu ègↄ̃ kú n yãnↄamɛ.

¹⁰⁰Ma ↄ̃ndↄ̃ↄ dɛ mareenↄ pↄ́la, zaakɛ mɛɛ̀gↄ̃ n ↄdↄkiinↄ gwaa.

¹⁰¹Mɛɛ̀ mì kɛ̃ zɛ́ zaa píngia lɛ mà e màgↄ̃ n yã kũna yãnzi.

¹⁰²Mɛ́ɛ kɛ̃ n dokayãnↄaro, zaakɛ ḿbe ń dàmɛ.

¹⁰³N yãnↄ nnamɛ à kɛ̀ bíta, à nna dɛ zↄ́la ma lɛ́n.

¹⁰⁴N ↄdↄkii è ma gba làakari, Beee yãnzin ma za sãsãna zɛ́ pínginzi.

¹⁰⁵N yãn fitia ũ ma gbánɛ, è guu pumɛ zɛ́n.

¹⁰⁶Ma la dà ma sↄ̃ zɛo, kɛ̀ mɛ́gↄ̃ tɛ́ n dokayã maaanↄzi.

¹⁰⁷Ma wɛ́ɛtãmmana kɛ̀ bíta, Dii. ǹ ma wɛ̃̀ndi dãkpa lán ń ò nà.

¹⁰⁸Ǹ ma sáabukpana sí, gbasa ǹ n dokayãnↄ damɛ, Dii.

¹⁰⁹Mɛɛ̀gↄ̃ ma zĩnda da kari guu, baa kↄ̃n beeeo n dokayãnↄ è sãmaguro.

¹¹⁰Zaakɛrinↄ takutɛɛ kpàkpamɛ, mↄde mɛ́ɛ zã n ↄdↄkiiaro.

¹¹¹N yãnↄn ma túbi ũ ai gurↄ píngi, aↄ̃mbe ma pↄnnaa ũ.

¹¹²Ma swɛ̃̀ kú n yãdannɛnanↄ kɛnaa ai ma wɛ̃̀ndi lɛ́n.

¹¹³Ma za nↄ̀sɛplaadeenↄn, n dokan má yezi.

¹¹⁴Ḿbe ma utɛki kↄ̃n ma sɛngbangoo ũ, n yãn ma wɛ́ɛ dↄzi.

¹¹⁵À gumala a zaakɛrinↄ lɛ màgↄ̃ ma Luda yãdiɛnanↄ kũna.

¹¹⁶Ǹgↄ̃ ma kũna lán ń ò nà, mɛ́gↄ̃ kuu, ǹton tó tãmaa ma nɛro.

¹¹⁷Ǹ ma sɛ́ musu lɛ mà bↄ aafia, ma wɛ́ɛ égↄ̃ pɛ́ n yãdannɛnanↄa.

¹¹⁸Nɛɛ̀ gí gbɛ̃ kɛ̀ aↄ̃ zã̀ n yãdannɛnaanↄzi, aↄ̃ mↄnafikikɛna nɛ́ pãmɛ.

¹¹⁹Nɛɛ̀ anduna zaakɛrinↄ kwɛ́ɛ lán mↄ̀gbↄ̃ bà, beee yãnzin má ye n yãnↄzizi.

¹²⁰Ma mɛ̀ è fɛɛ n vĩa yãnzi, n dokayãnↄↄ naasi vĩmɛ.

¹²¹Ma yã kɛ̀ a zɛ́a súusu, ǹton ma tó ma wɛ́ɛtãmmarinↄnɛro.

¹²²Ǹ kpɛ́gaau sɛ́ mamↄma n zↄ̀blerinɛ lɛ mà bↄ maa, ǹton tó wadadeenↄ wɛ́ɛ tãmaro.

¹²³Ma wɛ́ɛ dↄ n mìsinazi ai ma kpasa, má sↄ̃kpa n lɛ́gbɛ̃na maaazi.

¹²⁴Ǹ yã kɛmɛ n gbɛ̃kɛɛ guu, ǹ n yãdannɛnanↄ da mamↄma n zↄ̀blerinɛ.

¹²⁵N zↄ̀blerin ma ũ, ǹ ma gba làakari lɛ mà n yãnↄ dↄ̀rↄ dↄ̃.

¹²⁶Yãkɛna gurↄↄ kà, Dii, zaakɛ wèe bↄↄ n doka kpɛɛ.

¹²⁷Má ye n yãdiɛnanↄzi dɛ vurala, baa vura baasana.

¹²⁸Má è n ↄdↄkii maa, beee yãnzin sãsãna zɛ́ píngi è kɛmɛrozi.

¹²⁹N yãnↄↄ dɛmɛ yãbↄnsaɛ ũ, beee yãnzin má kũna ma swɛ̃̀nzi.

¹³⁰N yã bↄkↄ̃tɛna è guu puńnɛ, è nↄ̀sɛdodeenↄ gba làakari.

¹³¹Ma lɛ́ aɛna, mɛ́ɛ wesaa boo fɛ̀kuufɛkuu, zaakɛ n dokayãnↄ nii e ma dɛɛ.

¹³²Ǹ aɛ dↄma ǹ sùu kɛmao, lán nɛɛ̀ kɛ gbɛ̃ kɛ̀ aↄ̃ↄ ye n tↄ́zinↄnɛ nà.

¹³³Ǹ ma da zɛ́a lán ń ò nà, ǹton tó yã zaa ke kí blemaro.

¹³⁴Ǹ ma bↄ gbɛ̃ takiikɛrinↄ ↄzĩ lɛ mà n ↄdↄkii gwa.

¹³⁵Ǹ uu were mamↄma n zↄ̀bleria, ǹ tó mà n yãdannɛnanↄ dↄ̃.

¹³⁶Wɛ́ɛ'i e plaa ma wɛ́ɛn kɛ̀ wà n doka kũnaro yãnzi.

¹³⁷Dii, ń maa, n dokayãnↄↄ zɛ́ vĩ.

¹³⁸N n yãnↄ dìɛ a zɛ́a, aↄ̃ náanɛ vĩ maamaa.

¹³⁹Ma ibɛɛnↄ sã̀ n yãn, ben aↄ̃ yã ma kũ gbãa maamaa.

¹⁴⁰Wà n yã yↄ̃̀ wà gwà à see ke vĩro, mamↄma n zↄ̀bleri, má yezi maamaa.

¹⁴¹Pↄ́ken ma ũro, wè kya kámagu, baa kↄ̃n beeeo n ↄdↄkii è sãmaguro.

¹⁴²N yãmaakɛna yãana vĩro, n doka yãpuraa vĩ.

¹⁴³Nawɛ̃a kↄ̃n yã'ↄ̃ammao ma le, mↄde n yãdiɛnanↄn ma pↄnnaa ũ.

¹⁴⁴N yãnↄↄ maa gurↄ píngi, ǹ ma gba làakari lɛ màgↄ̃ kuu.

¹⁴⁵Mɛɛ̀ n sísi kↄ̃n nↄ̀sɛo do Dii, ǹ wemala, mɛ́gↄ̃ n yãdiɛnanↄ kũna.

¹⁴⁶Mɛɛ̀ wiipɛnzi ǹ ma mì sí, mɛ́gↄ̃ n yãnↄ kũna.

¹⁴⁷Mɛɛ̀ fɛɛ idɛ'idɛ mà wii pɛ́nzi, n yãn ma wɛ́ɛ dↄzi.

¹⁴⁸Ii è na ma wɛ́ɛn gwãavĩro lɛ mà e mà laasuu lɛ́ n yãa yãnzi.

¹⁴⁹Ǹ ma yã ma n gbɛ̃kɛ yãnzi, Dii, ǹ ma wɛ̃̀ndi dãkpa lán n yãzɛdekɛɛ dɛ nà.

¹⁵⁰Gbɛ̃ kɛ̀ aↄ̃è lɛ́ kpaakↄ̃sↄ̃maziinↄↄ kĩimao, mↄde aↄ̃ↄ zã̀ kↄ̃n n dokao.

¹⁵¹Ń kĩimao Dii, n yãdiɛnanↄ píngi yãpuraa vĩ.

¹⁵²Zaa gìkɛna má dↄ̃̀ n yãnↄa kɛ̀ ń dìɛ àgↄ̃ kuu gurↄ píngi.

¹⁵³Ǹ ma nawɛ̃akɛna gwa ǹ ma mì sí, zaakɛ n doka e sãmaguro.

¹⁵⁴Ǹ zɛmao ǹ ma bo, ǹ ma wɛ̃̀ndi dãkpa lán n à lɛ́ gbɛ̃̀ nà.

¹⁵⁵N mìsina zã̀ kↄ̃n zaakɛrinↄ, zaakɛ aↄ̃è n yãdannɛnanↄ wɛtɛro.

¹⁵⁶N wɛ̃ndaa bíta, Dii, ǹ ma wɛ̃̀ndi dãkpa lán n yãzɛdekɛɛ dɛ nà.

¹⁵⁷Ma ibɛɛ kɛ̀ aↄ̃è wɛ́ɛ tãmaanↄↄ pari, mↄde mɛ́ɛ zã n yãnↄaro.

¹⁵⁸Má ye n náanɛsaideenↄ kãziro, kɛ̀ aↄ̃ↄ n yã kũnaro yãnzi.

¹⁵⁹Ǹ gwa lán má ye n ↄdↄkiizi nà. Dii, ǹ ma wɛ̃̀ndi dãkpa n gbɛ̃kɛɛ yãnzi.

¹⁶⁰N yã píngipingi nɛ́ yãpuraamɛ, n dokayãnↄↄ maa aↄ̃ↄ yãana vĩro.

¹⁶¹Gbãadeenↄ è wɛ́ɛ tãma pã, mↄde n yã vĩa è ma kũ.

¹⁶²Mɛɛ̀ pↄnnaa kɛ kↄ̃n n lɛ́gbɛ̃nao, lán ma auziki bíta sɛ̀ɛ zĩ̀ guu bà.

¹⁶³Ma za mↄnafikin, má ye à yãziro, n dokan má yezi.

¹⁶⁴Mɛɛ̀gↄ̃ n táaki lɛɛ gurↄ do gɛ̃̀n swɛɛplaplaa kɛ̀ n dokayãnↄↄ maa yãnzi.

¹⁶⁵Gbɛ̃ kɛ̀ aↄ̃ↄ ye n dokazinↄ aafia bíta, yãke è tó aↄ̃ furo.

¹⁶⁶Ma wɛ́ɛ dↄzi ǹ ma mì sí, Dii, mɛɛ̀ tɛ́ n yãdiɛnanↄzi.

¹⁶⁷Má n yãnↄ kũna, zaakɛ má yezi maamaa.

¹⁶⁸Mɛɛ̀ n ↄdↄkii gwa mɛɛ̀ n yãnↄ ma, zaakɛ ma yãkɛna píngi kú n ↄzĩmɛ.

¹⁶⁹Ǹ tó ma wiipɛna n kii le, Dii, ǹ ma gba làakari lán ń ò nà.

¹⁷⁰Ǹ tó ma aduakɛna ká n kiia, ǹ ma mì sí lán n lɛ́ gbɛ̃̀ nà.

¹⁷¹N táakilɛna gↄ̃ da ma lɛ́n, zaakɛ nɛɛ̀ n yãdannɛnanↄ damɛ.

¹⁷²Mɛ́ lɛ̀ sí n lɛ́gbɛ̃na musu, zaakɛ n yãdiɛnanↄↄ maa píngi.

¹⁷³Ǹgↄ̃ kú soruo ǹ ↄ dↄmalɛ, zaakɛ ma zɛ kↄ̃n n ↄdↄkiio.

¹⁷⁴Mɛ́ɛ à ni dɛɛ ǹ ma mì sí, Dii, n dokan ma pↄnnaa ũ.

¹⁷⁵Ǹ tó màgↄ̃ kuu, mɛ́gↄ̃ n táaki lɛɛ, ǹ tó n dokayãnↄ gↄ̃ ma kũna.

¹⁷⁶Ma kɛ̃ zɛ́a lán sãa kɛ̀ sã̀sã bà, ǹ mamↄma n zↄ̀bleri wɛtɛ, zaakɛ n yãdannɛnanↄↄ e sãmaguro.