Roma 2:3-16

³Ŋic go gâcne jaŋere dâŋbahac muhuc ijaha eekic, ehuc “no Anutuzi akicnuocmu” iŋuc mu wiac moc ezic ine!

⁴Me Wofuŋzi buuruc â wama ruaine sâc fekicne egarehuc akicguhuc jume go wemocte manatac qatakic ehuc juekic? Go maŋge bârisiecmurâ Anutuzi buuruc egareekac i mi mana taraekic me?

⁵Go maŋsanaŋ erâ maŋge mi bârisiehuc ʒocfiki bafeku seroŋ batec ʒoc ʒaza dameŋko Anuture mumutara dâŋ fârine fua taniŋkeme ʒâhâmocguocmu.

⁶Anutuzi ŋic eebapa‐nâŋecte sâc furine nârezokac hâcne.

⁷Ŋic eehâmo gie paŋʒâic bahuc eri tatamac â juju saric bâfuaniŋte samarieniŋmu jaŋe juju sanaŋ jarezokac.

⁸Ŋic râŋgeŋne dâŋ fâri qizecne bâsuehuc wiac hehesicne bajuniŋmu jaŋerao ine wiac ʒâʒâicne â mimicne bâfuaocmu.

⁹Sâqocne bapa sasawa, Judaŋic hâcne â Grikŋic mâmâc, jaŋe ʒâic serereŋ â hâhâwic sâko fua‐jareocmu.

¹⁰Tiŋne juniŋmu sasawa, Judaŋic hâcne â Grikŋic mâmâc, jaŋe eri tatamac â wama fua‐jareocmu.

¹¹Anutu e ra rowec ware rowec mi focnekac.

¹²Ŋic sâcmutâc dâŋ tâmiric juhuc sâqocne baeŋgopieŋ jaŋe sasawa sâcmutâc dâŋ tâmiric jaha sipirickeniŋmu. Â sâcmutâc dâŋhec juhuc sâqocne baeŋgopieŋ jaŋe sasawa Anutuzi sâcmutâc dâŋte sâcko dâŋjeŋic mutara‐jareocmu.

¹³Sâcmutâc dâŋ mâc hazeczi mananiŋmu jaŋe Anutuzi honec‐jopame tiŋne mi eŋgopieŋ, manarâ reŋkeeŋgopieŋ jaŋe ine tiŋne mujareocmu.

¹⁴Ŋic qâpuc sâcmutâc dâŋ mi mufua‐jarekicne jaŋe maŋjeŋicte sâcmutâc dâŋ reŋkehuc ine sâcmutâc dâŋ tâmiriczi sâcmutâc dâŋhec tinac eeŋgopieŋ.

¹⁵Iŋuc epie sâcmutâc dâŋ i maŋjeŋicko qâreŋkekicne, irec fuŋne jaŋgeŋkeekac. Sâcmutâc dâŋ maŋjeŋicko qâreŋkekicnere maŋjeŋiczi tutuc qajareekac, erâ wâc maŋ mamanasu‐jeŋiczi foc forisic ehuc ŋifec mu qatarac eekac â ŋifec mu bâmiriŋ eekac.

¹⁶I dameŋ sâkore iŋuc eekac. Ira Anutuzi Jesu Kristo ecneme maŋnâŋecko wiac soŋsoŋ fokac irec fuŋne bataniŋkeocmu. No Biŋebiaŋ muekopac irec sâcko bataniŋkeocmu hâcne.