Romanos 2:3-16

³¿Naꞌ llakroꞌ chaꞌ bibi gonn Diosenꞌ da saꞌkziꞌo chaꞌ ll-lliayiꞌlloꞌ beꞌnne, naꞌ naoteꞌo llonoꞌ kanꞌ llon akeꞌn naꞌ? Bi llayaꞌl gakroꞌ waraꞌo rao yel llzaꞌkziꞌ ke Diosenꞌ, ka nak da kaꞌ llonoꞌ naꞌ.

⁴¿Bi llakbeꞌroꞌ Diosenꞌ nakeꞌ beꞌnn chaꞌo, naꞌ beꞌnn xhenraꞌlle laꞌkze napllo doꞌle? Diosenꞌ lloneꞌ kaꞌ nench gakbeꞌroꞌ da xhinnjenꞌ llonoꞌ, naꞌ yeyatroꞌ.

⁵Rweꞌ nakoꞌ beꞌnn zid kwis, bi llayatroꞌ da xhinnj kaꞌ llonoꞌn, naꞌ llonlloꞌ biꞌch da xhinnj koꞌon nench waslliꞌoll Diosenꞌ da wsaꞌkzieꞌ rweꞌ kate llin lla wchoybieꞌ ke beꞌnnach. Kanaꞌ wroeꞌn zejkzeꞌ lixhej kanꞌ wchoyeꞌ saꞌkziꞌ toto beꞌnn ren yeolol da ben akeꞌ.

⁶Kanaꞌn goneꞌ ke totollo kon ka ben totollo.

⁷Weꞌe yel nban zejlikane ke beꞌnn kaꞌ gon da wen laꞌkze biteze yellayrao akeꞌ, beꞌnn kaꞌ llayirjlaꞌlle akre gon akeꞌ nench yedoꞌl akreꞌ ganꞌ llia Dios ke chnare, naꞌ nench yeyazraꞌll Diosenꞌ kanꞌ gon akeꞌ naꞌ, naꞌ nench goneꞌ leakeꞌ beꞌnn zaꞌke.

⁸Naꞌ gaklleꞌe weꞌe yel llzaꞌkziꞌ ke beꞌnn kaꞌ llon kon da nen ke akeꞌ, naꞌ bi llejleꞌ akeꞌ diꞌll li ke Diosenꞌ, llon akeꞌ kanꞌ ne da xhinnjenꞌ.

⁹Yeolol beꞌnnach llon da xhinnj saꞌkziꞌ akeꞌ yellayrao akeꞌ, zgaꞌtek beꞌnn Israel kaꞌ yellayrao, naꞌtellre noteze beꞌnn bi nak beꞌnn Israel.

¹⁰Zan beꞌnn kaꞌ llon da wen, weꞌe Diosenꞌ leakeꞌ yel banez ke akeꞌ, naꞌ yel baraꞌnne, naꞌ goneꞌ so akeꞌ wen. Zgaꞌtek beꞌnn Israel kaꞌ, naꞌtell yezikre nollre beꞌnne.

¹¹Diosenꞌ bi llaleꞌe ke ke beꞌnne.

¹²Beꞌnn kaꞌ bi nombiaꞌ ley danꞌ bzoj da Moisésenꞌ, naꞌ llon akeꞌ da xhinnj, Dios naꞌ goneꞌ da kweyiꞌ akeꞌ laꞌkze bi nombiaꞌ akeꞌ ley naꞌ, wchoybieꞌ ke akeꞌ le nnez akreꞌ llon akeꞌ da xhinnj naꞌ. Naꞌ beꞌnn kaꞌ nombiaꞌ akseꞌ leyenꞌ, naꞌ llon akeꞌ da xhinnj, Diosenꞌ wchoybieꞌ ke akeꞌ kon ka ne ley naꞌ.

¹³Kere danꞌ yénzello ley naꞌ, gaktello beꞌnn wen rao Dios, llayaꞌl gonllo kanꞌ nen naꞌ, naꞌllenꞌ gakllo beꞌnn wen raweꞌn.

¹⁴Beꞌnn bi nake beꞌnn Israel, bi nombiaꞌ akeꞌ ley danꞌ bzoj da Moisésenꞌ. Laꞌkze bi nombiaꞌ akeꞌ leyenꞌ, kon lo raꞌlldaꞌo akeꞌ naꞌ, llwia akeꞌ, naꞌ llon akeꞌ da wen naꞌ, naꞌllenꞌ naksen ka to ley ke akeꞌ.

¹⁵Nnezjekze lo raꞌlldaꞌo akeꞌn llayaꞌl gon akeꞌ ka danꞌ nllia leyenꞌ biaꞌa gon akeꞌ naꞌ, le llon akeꞌ raꞌt wejenꞌ. Naꞌllenꞌ nneze yichjraꞌlldaꞌo akeꞌn danꞌ llon akeꞌn, chaꞌ naken wen o chaꞌ naken da xhinnj.

¹⁶Kanꞌ gak kate llin lla gon Diosenꞌ rao naꞌa Jesucristonꞌ, choyraweꞌ ke bi da ba ben totollo laꞌkze da ngaꞌche, chaꞌ da wen o chaꞌ da xhinnj. Kanꞌ niaꞌ katenꞌ llyixjweꞌraꞌ Diꞌll Wen ke Jesucristonꞌ.