Rom 2:3-16

³Ya ou badeh, ndramak laleyah le; buku ou anya aleben iri lau rayah ja, arile ou amekes kandriyen ndra-in i le buku aliy; ou anya kameh, ou baratobwak ta bolo maha-an ta Kindrei barala buku sah?

⁴Ya eme ou abudon anya, “Bolo tikisiy tan tinan labai, ya iy udu le abe-en lau katubuni ndrine iri, ma iy badeu ndramas ndra-in bala tiri suwi bwe. Idah kameh, jo winiyan bala bolo maha-an ta Kindrei bwe.” Sebwe ou abudon kandriyen mwasin tan doh, i buku lakou laleyah nadeh? Ya eme ou baseleyani se bwai, ta tikisiy tan badeh, ta anya katubuni ndrinem ma katiye ou ame hamon ja.

⁵Arile, ou badeh, batum boto-on labai, ma ou batubuni ndrinem bwe. Ou atukum losen ta Kindrei ewek tam i tinan le gwek abe-en len ta losen ta Kindrei kameh asahan eme lewan. Na len doh iy kameh anuhun taha lau mari, ma mada sahou tan badeh, amwenen labai.

⁶Kindrei kameh, “edeu sowa iri lau mwan ma badih ari, ari in hamon ta kandriyen iri amekes.”

⁷Iri lau rayah amekes gok boto-on ta a-en hamon le ta kandriyen mwasin, tasah iri anya kado bolo lomadan hawe masiye ta Kindrei, ma iri ale anya kakohok kohan handru winiyan bamak bwe. I tiri le kameh Kindrei winiyan edeu kohan handru ta udu le buku doh.

⁸Arile, iri lau rayah ja aseken le budon tiri le, ma iri baseken sahou handru bwe, ya iri an hamon ta kandriyen ndra-in, iri kameh bwese maha-an hawe losen ta Kindrei.

⁹Are lau iri le amekes kandriyen ndra-in i buku doh, idah kameh, Kindrei le edeu iri mara-ei ala bolo maha-an hawe sisi-in. Idah kameh, ili tiri Juwis bwena, ano kameh ili tiri lau badu leheleh ale;

¹⁰Arile, Kindrei kameh edeu lomadan, masiye hawe mondrei kameh i tiri lau mari le amekes kandriyen mwasin: Ma mwena kameh i tiri Juwis, ano kameh i tiri lau badu leheleh ale.

¹¹Tasah, Kindrei aleben iri lau mari i san ta kandriyen randra le.

¹²Iri are lau bakohok batanau malen Kindrei edeu i mine Moses bwe, i buku none iri amekes karei ma lomondra ndra-in, iri kameh bwese maha-an ta aliy. Ya, iri Juwis bwena mene, ndrakohok batanau malen Kindrei ndradeu ndra mine Moses, ya, i buku none iri amekes karei ma lomondra ndra-in, idah kameh, batanau malen le aleben iri amwenen.

¹³Tasah, are lau ndranyen anuhun le batanau malen kameh iy winiyan basahan mwasin ta mada Kindrei bwe. Arile, are lau le in hamon ta batanau malen, Kindrei kameh aloh iy mwasin labai ta madan.

¹⁴Handru labai, batanau malen ta Moses bala tiri lau mara-ei bwe. Arile, len ra-on badeh, budon tiri amwenen mesekei, ma iri an hamon le ta kandriyen ta batanau malen tiye iri ka-en hamon ta aliy. Idoh i buku batanau malen amwenen atondrok iri.

¹⁵Ya idoh leheya i buku Kindrei ndratorowenei kandriyen ta batanau malen ndrala ndrine iri. Eme ma, buku iri anya kamekes kandriyen mwasin, o, iri amekes kandriyen ndra-in, bar tiri badeh, leheya tanan ta amekes budon tiri abadok ta aseben iri.

¹⁶Kindrei kameh abudon ta iri lakou nane doh na len iy suni Jises Krais eme ta manyah anuhun budon ma kandriyen tataha amai, in hamon ta sahou mwasin jo atiye i tiri lau mari.