Roma 10:9-19

⁹Te am kurugan tam ta tinolay na Namaratu i Afu Hesus ta pasi na en, otturu ibosag tam ta intu hala ya dafu na ngamin a mekerutan kitam.

¹⁰Te ya pangurug na nonot tam ya ikwenta na Namaratu ta katunung tam, a am yen ya ibosag tam a ikerutan na kitam.

¹¹A ya uhohug na hapa ta takday para na surat a “Ya ngamin kiden mangikatalak tentu, a aweda sangaw melogot,” kunna.

¹²Te maski am Hudyo kitam ono am Hentil kitam a awan ta idaduma na Namaratu tekitam am ikatalak tam i Afu Hesus. Te ya Dafu na takday a Dafu da ngamin, a malogon mangatad ta ngamin kiden makimallak tentu,

¹³te ya uhohug na hapa ta takday ha na surat a “Ya ngamin kiden makimallak ta Dafu tam ewan a ikerutan na kid,” kunna hapa.

¹⁴Ammi aweda haman makimallak ta aweda ikatalak. A aweda ikatalak ya aweda en para la nadangag. A awan hapa ta madangag da am awan ta umange mangipadangag tekid.

¹⁵A awan hapa ta ange mangipadangag am awena medob. Ammi nonotan tam ya nebar ni mina Isayas ta surat na en: “Pake ispot ya umange kiden mangipadangag ta mappya en damag,” kunna.

¹⁶A addu mantu ya nedob, a ispot hapa ya nepadangag da, ammi intu dulay te pake addun ya awan mangurug ta nepadangag da en. A naggagitta kid mantu ta dadagkal da kiden nga binida ni mina Isayasen, “Ay Afu, manmano la ya nangurug ta nepadangag mi tekid,” kunna.

¹⁷A ta kuman na inuhohug ken a awan ta mangurug am awan ta nadangag na, a awan ta madangag na am awena mepadangag ya uhohug ni Hesus tentu.

¹⁸Ammi ya takday para saludsud ku gafu ta Istralita kiden a awan hud ta nangipadangag tekid? Itta haman, te “Madangag haman ya ngahal na Namaratu addet ta ngamin paglelehutin. A nepadangag ya uhohug na kiden addet ta ngamin kiden lugar ta lutakin,” kunna.

¹⁹Ammi mabalin de ta awena maawatan na Istralita kiden? Ammi anu haman ta aweda maawatan? Te ya uhohug na Namaratu tekid a “Pangahugun ta kam sangaw gafu ta takwan na tolay nga awan para la makkamu teyak, a magtaratna kam sangaw gafu ta pangurug da teyak,” kunna.