Rom 10:9-19

⁹mɨmə tukmə nakhani-ərhav ye nhermiə mhamə Yesu in Yermaru, kɨni tukmə nakshatətə əfrakɨs yerkimiə mfam mə Kughen rɨmɨvəh mɨragh Yesu ye nɨmhəyen kafan, kɨni Kughen tukrɨvəh mɨragh əmiə.

¹⁰Ror məkneikɨn meinai Kughen ramor narmamə kɨsatuatuk ye nɨmrɨn nɨpɨg kɨshatətə əfrakɨs iran yerkiriə. Kɨni Kughen ravəh mɨragh narmamə nɨpɨg iriə kamhani-ərhav ye nheriə mhamə Yesu in Yermaru.

¹¹Ramhen kɨn yame Nəkwəkwə kape Kughen ramni mɨmə, “Mərɨg narmamə yamə mɨne kɨshatətə ye Kwən a, to khapəh nɨsaurɨsien nɨpɨg tuksərer ye nɨmrɨ Kughen.”

¹²Nəgkiarien e in kape narmamə m-fam, nar apnapɨg kwənərəus kape Isrel uə nəmə tanə pɨsɨn pɨsɨn mɨnə, meinai Yermaru kɨrikianə əmə e ramarmaru mamautə-pə kɨn kafan nɨhuvəyen kɨmi narmamə m-fam yamə mɨne kɨsaiyoh-pən kɨn.

¹³Rəmhen kɨn yame Nəkwəkwə kape Kughen ramni mɨmə, “Narmamə m-fam yamə mɨne kasokrən kɨn Kughen Yermaru mə tukrɨvəh mɨragh əriə, In tukrɨvəh mɨragh əriə.”

¹⁴?Mərɨg tukmə narmamə khapəh nɨshatətəyen ye Kughen Yermaru, tukshawor pən iran mɨne mɨsokrən kɨn In mə tukrɨvəh mɨragh əriə? ?Kɨni tukmə khapəh nɨsərɨgien nəvsaoyen kɨn, tukshawor pən iran mɨne mɨshatətə iran? ?Kɨni tukmə yermamə kɨrik rɨkək tuk nɨni-ərhavyen tuk əriə, tukshawor pən iran mɨne mɨsərɨg nəvsaoyen kɨn?

¹⁵?Kɨni tukmə Kughen rɨpəh nher-pənien kɨn narmamə, tukshawor pən iran mɨne mhani-ərhav Nəvsaoyen Huvə? Rəmhen kɨn yame Nəkwəkwə kape Kughen ramni mɨmə, “!Rhuvə pɨk əgkap mə kɨsəm yermamə kɨrik rɨvəh nəvsaoyen huvə kape Kughen muə kɨmi ətawə!”

¹⁶Mərɨg pəh nien mə nəmə Isrel m-fam kɨmnhavəh nəvsaoyen huvə yerkiriə. Rəmhen kɨn nəgkiarien yame Aesea rɨmɨrai mɨmə, “!Yermaru! Narmamə kwatɨksɨn əmə kɨmnhani nəfrakɨsien ye nəgkiarien kapəmawə.”

¹⁷Kɨni ror məknakɨn, nhatətəyen ramsɨ-pən ye nar yame nakasərɨg; kɨni nəgkiarien yame nakasərɨg ramsɨ-pən ye nəvsaoyen kɨn Kristo.

¹⁸?Mərɨg yakamaiyoh mɨmə nəmə Isrel kɨmɨsərɨg uə nɨkam? Ǝwəh, kwəsərɨg ta. Nəkwəkwə kape Kughen ramni mɨmə, “Nəgkiarien kape Kughen rɨmavən ikɨn mɨnə fam ye tokrei tanə, ruavən ikɨn mɨnə fam əgkap.”

¹⁹?Kɨni jakaiyoh əmə kɨn nar kɨrik mɨn mɨmə, nəmə Isrel kwənharkun ta uə nɨkam? Ǝwəh, kwənharkun. Meinai Moses rɨmnəkupan mɨni mɨmə, “Jakor huvə pən kɨmi narmamə yame kapəriə kantri kɨrik rɨkək, kɨmiə taksor jalus tuk əriə; kɨni jakor huvə pən kɨmi narmamə ye kantri yamə mɨne kɨmiə nakamhani mhamə iriə kɨsar-mar, niemhaa tukrhai əmiə tukun.”