ROMANOS 10:9-19

⁹Tsa biꞌ ti chaꞌ ntiꞌ, chaꞌ cachaꞌ na jiꞌi̱ nguꞌ chaꞌ Jesús laca nu Xuꞌna na, loꞌo juaꞌa̱ tyucui tyiquee na jlya tiꞌ na chaꞌ nguaꞌni ycuiꞌ Ndyosi chaꞌ ndyuꞌú Jesús chaca quiyaꞌ ca su nguatsiꞌ. Liꞌ taca jiꞌi̱ Ni cuaꞌni lyaá Ni jiꞌna,

¹⁰chaꞌ nde neꞌ cresiya jiꞌna ntsuꞌu chaꞌ jiꞌi̱ Jesús nu cua ngusñi na, loꞌo la cuiꞌ juaꞌa̱ nde tuꞌba na ntsuꞌu chaꞌ jiꞌi̱ Jesús nu nchcuiꞌ na loꞌo ñati̱; liꞌ taca ca tsoꞌo cresiya jiꞌna cuentya jiꞌi̱ ycuiꞌ Ndyosi, loꞌo juaꞌa̱ cuaꞌni lyaá Ni jiꞌna jiꞌi̱ lcaa chaꞌ cuxi nu ntsuꞌu chalyuu.

¹¹Cua nscua chaca chaꞌ lo quityi jiꞌi̱ ycuiꞌ Ndyosi ndiꞌya̱: “Ni tsaca na, tyaꞌa ngusñi na chaꞌ jiꞌi̱ ycuiꞌ Ndyosi, ná ntsuꞌu chaꞌ caca taja tiꞌ na jiꞌi̱ Ni liꞌ”. Juaꞌa̱ nchcuiꞌ quityi.

¹²Sca ti cuayáꞌ tyacua chaꞌ biꞌ jiꞌi̱ nguꞌ judío, la cuiꞌ juaꞌa̱ tyacua chaꞌ biꞌ jiꞌi̱ nguꞌ xaꞌ tsuꞌ, chaꞌ sca ti ycuiꞌ Ndyosi nu Xuꞌna na laca loo jiꞌi̱ lcaa ñati̱ chalyuu; sca ti cuayáꞌ tsoꞌo tsa nduꞌni Ni loꞌo lcaa ñati̱ nu jña chaꞌ clyu tiꞌ jiꞌi̱ ycuiꞌ Ni chacuayáꞌ jiꞌi̱ Jesús.

¹³Ndiꞌya̱ ndyuꞌu chaꞌ nu nscua lo quityi cusuꞌ: “Cuaꞌni lyaá Ni jiꞌi̱ lcaa ñati̱ nu jña chaꞌ clyu tiꞌ jiꞌi̱ Ni chacuayáꞌ jiꞌi̱ ycuiꞌ nu Xuꞌna na”.

¹⁴Pana ná caca chcuiꞌ nguꞌ loꞌo ycuiꞌ Ndyosi chacuayáꞌ jiꞌi̱ Jesús si bilya xñi nguꞌ chaꞌ jiꞌi̱ yu; juaꞌa̱ ná caca xñi nguꞌ chaꞌ jiꞌi̱ Jesús si bilya cuna nguꞌ chaꞌ biꞌ; ni ná caca cuna nguꞌ chaꞌ biꞌ si bilya caja ñati̱ nu ta chaꞌ biꞌ loꞌo nguꞌ.

¹⁵Pana ná tucui caca jiꞌi̱ tsaa chaꞌ ta chaꞌ biꞌ loꞌo xaꞌ la nguꞌ si ná culo Ni cña jiꞌi̱ chaꞌ tsaa. Ndiꞌya̱ nchcuiꞌ quityi cusuꞌ: “Tsoꞌo tsa ntiꞌ na loꞌo tyalaa nguꞌ slo na chaꞌ ta nguꞌ chaꞌ tsoꞌo jiꞌi̱ ycuiꞌ Ndyosi loꞌo na, chaꞌ culuꞌu nguꞌ ñiꞌya̱ caca chaꞌ ti̱ ti tyiꞌi̱ tyiquee na”. Juaꞌa̱ nchcuiꞌ quityi.

¹⁶Ná ndyuna tsoꞌo lcaa ñati̱ chaꞌ nu nda na loꞌo nguꞌ, nu loꞌo ndachaꞌ na jiꞌi̱ nguꞌ ñiꞌya̱ cuaꞌni lyaá Ni jiꞌi̱ ñati̱. La cuiꞌ juaꞌa̱ ngua loꞌo jyoꞌo Isaías cua saꞌni. “Ndyosi Xuꞌna ya, ná tucui ndu̱ tsiyaꞌ ti nu ngusñi chaꞌ jinuꞌu̱ nu nchcuiꞌ ya loꞌo nguꞌ”, nacui̱ jyoꞌo biꞌ.

¹⁷Pana nu na ni, cua ngusñi na chaꞌ jiꞌi̱ Jesús nu ngua tya clyo, tya loꞌo ndyuna na chaꞌ tsoꞌo nu cua nchcuiꞌ nguꞌ loꞌo na chaꞌ jiꞌi̱ Cristo.

¹⁸Ntiꞌ naꞌ xcuane naꞌ sca chaꞌ jiꞌi̱ cuꞌma̱: ¿Ha bilya cuna nguꞌ judío chaꞌ jiꞌi̱ Cristo lacua? Cua ndyuna nguꞌ, chaꞌ cua nscua sca chaꞌ lo quityi cusuꞌ nu nchcuiꞌ ndiꞌya̱: Tyucui ñaꞌa̱ chalyuu nguañi chaꞌ nu nda nguꞌ loꞌo; lcaa seꞌi̱ ndyalaa chaꞌ nu nchcuiꞌ nguꞌ, masi ca su cua tyijyuꞌ la cua ndyalaa chaꞌ biꞌ. Juaꞌa̱ nchcuiꞌ quityi.

¹⁹Chaca chaꞌ xcuane naꞌ jiꞌi̱ ma̱ liꞌ: ¿Ha ná nda nguꞌ judío cuentya ñiꞌya̱ ndyuꞌu chaꞌ biꞌ lacua? Saꞌni tsa nguscua jyoꞌo Moisés chaꞌ jiꞌi̱ nguꞌ biꞌ, ndiꞌya̱ nchcuiꞌ quityi biꞌ: Cuaꞌni naꞌ chaꞌ caca liyeꞌ tiꞌ ma̱ ñaꞌa̱ ma̱ jiꞌi̱ xaꞌ ñati̱ nu siꞌi ñati̱ tsoꞌo laca nguꞌ ntiꞌ ma̱, nacui̱ Ni. Nacui̱ ma̱ chaꞌ ple tsa nguꞌ; ná nchca cuayáꞌ tiꞌ nguꞌ, ntiꞌ ma̱. Ta naꞌ chaꞌ ñasi̱ꞌ tiꞌ jiꞌi̱ ma̱, xquiꞌya chaꞌ cua ngusñi ñati̱ biꞌ chaꞌ jnaꞌ; masi cuꞌma̱ ni, ná ntiꞌ ma̱ cuna ma̱ chaꞌ jnaꞌ, nacui̱ Ni.