Rom 10:9-19

⁹Ngan betanga tina yo amwetewete pang di tooltool ye in naii; kumata be ong in kuwete mallangana la di tooltool matadi be Yesu in Tool Mai, inbe kutara lom medana be Maro ipamaditi ye ni kidi matenge nga, ngan Maro ole ikau ong a ipamulong ye so dook tiap yo be igarungong i.

¹⁰Ngan nen, yesoo kumata le tool itara lono medana be Kirisi imata motong Maro ipamaditi nga, ngan Maro ole iweta ye tool noonoonoo. Inbe kumata be iwete mallangana la di tooltool matadi be Yesu in Tool Mai nga, ngan ya in Maro ole ikauu a ipamule ye so dook tiap yo be igarungu i.

¹¹Le ben tina Rau ke Maro iwete nga, “Sei tool be itara lono medana panga nga, ngan o ke be moomoonoo tiap.”

¹²Ngan la di Yuda inbe di tooltool yo tipa ye rara kidi Yuda tiap nga, ngan dada dook mata gaongo leu la Maro iyei pang di nga. Nen le di tooltool le imot yo titara lodi medana panga nga, ngan Tool Mai kidi ataleu. Inbe ya in Tool Mai tani yo iyei urata dook mata alunu san pang di tooltool yo titoru be ilon di nga.

¹³Ngan ben tina Rau ke Maro iwete nga, “Di sema tooltool le imot yo titoro Tool Mai be ilon di nga, ngan ole ikap di a ipamulu di ye so dook tiap yo be igarung di i.”

¹⁴Bong kumata be di Yuda titara lodi medana pang Kirisi tiap nga, ngan ole tiyei belei be titoru a ilon di nga? Inbe kumata be tilongo betanga ki tiap nga, ngan ole tiyei belei be titara lodi medana panga nga? Inbe kumata be tool sa iwetewete bingi dook mata ke Kirisi pang di tiap nga, ngan ole tiyei belei be tilonga nga?

¹⁵Inbe kumata be tiyawar di tooltool sa be la tiwetewete bingi dook mata ke Kirisi pang di tiap nga, ngan ole di tooltool tina nga tiyei belei be la tiweteweta nga? Ngan Rau ke Maro iwete nen, “Di tooltool lodi ponana mai san ye di tooltool yo tikaua bingi dook mata be man tiweta nga.”

¹⁶Bong di tooltool ke Isrel le imot la titar talngadi a be tilongo bingi dook mata, ngan tiap. Ngan ben tina Esai iwete nga, “Tool Mai, ole sei tool be itara lono medana ye betanga kiong yo amweta i?”

¹⁷Ngan nanga, betanga yo amlonga i, in ipamadit lomam le amtara lomam medana pang Kirisi. Inbe betanga tani, in la bingi dook mata yo ke Kirisi i.

¹⁸Bong nga be ator: Di tooltool ke Isrel nga tilongo bingi dook mata lapau, too tiap? Moodoom, di ngan tilonga oo. Le ben tina Dawiti iwodo betanga lo ye Rau ke Maro a iwete nga, “Betanga ke Maro i, in di tooltool tiweta, le ila ye di tooltool nga le imot ke tana i, inbe betanga kidi tina, ngan ila le la itaua motingi ke tana mai i le imot.”

¹⁹Oo, nga be ator mulu: Di tooltool ke Isrel nga lodi galanga ye betanga ke Maro lapau, too tiap? Moodoom, di ngan lodi galanga ye, yesoo di tooltool yo tipa ye rara kidi Yuda tiap nga, ngan lodi galanga ye, le moolmool, di Yuda lodi galanga ye lapau. Ngan Mose in tool tani yo kulkulunu ngan iwete betanga i. Iyei ne, “Di tooltool yo kakamata di ben so sokorai inbe taukadi lo galanga nga, ngan ole ayei dada dook mata pang di. Ngan dada tani yo be ayeii pang di i, in ole iyei ang le matamim gorengana ye so kidi a lomim dook tiap pang di.”