Lom 10:9-19

⁹Ibo Yesuse niniino omkeimaniba baaniba Yesuse Sum kesoa e nakaia unanga nisa eka inamin namin osa alukum kima biebo ge baana bianiba eka ib bobol tem osa funaniba Bainobo, Yesuse kaane otane Gode imin dofaanea hananebiobo geib mole Gode ibo hengmino temo blibo dotlanamabebe.

¹⁰Niminbabe, nib bobol temo bainobo gabobo Gode nibo baabenea Ibo ne kin dimo hengmino blimobo gabebe. Eka nibo nib bainobo galino omkeimabob mole Gode nibo hengmino temo biobo dotlanamabebe.

¹¹Gode buk tem wengo enangge baanoa Nakaia unangai e bainobo genimibi e bain ele weng baanebio inanamabe kesoa i bobol ilumo mo omfubenomobabo genobiobe.

¹²Yuda nisa eka Yudaba ibsa nibo afet afetbabe, makobobe. Niminbabe, nib Sume elekiemobe. Nakaia unangai wanita e nganha bianiba Sum kobo ni daabenale gabibi e i wengo kla wentenea yang kebianea daayebebe.

¹³Niminbabe, Gode buk temo baanoa Nakaia unangai Sume nganha bianiba Kobo ni daabeneba dlone gabibi e i alukum daabenea i hengmino temo blibo dotlanamabebo genobiobe.

¹⁴Nakaia unangai Yesuse mo bainobo geim blim keib mole i e mo nganhamomabibbabe. Eka i e wengo mo wentim blim keib mole e mo bainobo genomabibbabe. Eka naka mak unang maki e weng sango mo omkayemin blim keib mole i e weng sango mo wentomabibbabe.

¹⁵Eka Gode nakai Yesuse wengo omkeimamomabibi mo dlanea unim blim keib mole i mo monibta Yesuse wengo omkeimamomabibbabe. Gode buk temo enangge baanoa Nakai Gode dowan wengo omeb tlaibi kukub olo dot ayamobo genobiobe.

¹⁶Ina otane Yuda nakai mo alukumata Yesuse dowan weng olo bainobo geim blimobe, elekiem olokiem ita wente binibbiobe. Sinanggwano Aisaiae kukub olo funanea Gode buk temo dolanea baanea Sum kobo sino ni keb wengo nakaia unangai omkayebobo nakaia unangai elekiem olokiemi wenteniba bainobo geibbiobo genebiobe.

¹⁷Inamin kesoa nakaia unangai moniba Klaiste wengo omkeimamibo nakaia unangai maki wente bianiba bainobo galomabiobe.

¹⁸Ina otane ne wengo baanamabi ole Yudai Klaiste dowan weng olo mo wente binibbioba bleka? Yeye i wente binibbu otane i mo bainobo geim blimobe. Gode buk temo weng mako enangge baanoa Gode weng omkeimalin nakai Gode wengo omkayebibo alukum bib mak bib mako onon tlanoa nakaia unangai alukum Gode wengo wentebib otane i mo bainobo geim blimobo genobiobe.

¹⁹Eka ne imin baanamabibe, ibo mo funanibta Isleli mo tekein kenibta Ni Gode dowan wengo mo wentim blim kenomobo e omeisenea Yudaba ita omyamabebo geim blimobo genimibe! Yeye, i tekein kebinibbiobe. Sino Mosese Gode buk temo dolanea baanea God neta nakaia unangai Yudabai kukub ayamo nabenamabi kesoa Yuda nakaia unanga ibo ne kukub ayamo Yudabai nabenimio yateniba bobol wayebua dolnomabiobe. Eka ne nakaia unangai tekein kemin blimi dlonia kukub ayamo omyamabi kesoa Yuda nakaia unanga ibo atliyebua i dolnomabiobo ge baanebo ge baanea dolanebiobe.