Roma 10:9-19

⁹Maneniko o manaku mae, “Yesus nana, au Ramatua ka,” ma o mamahere nai dale ma mae, Manetualain fee Yesus nasoda seluꞌ neme mamate Na mai, sona Manetualain poꞌi-tata naa o meme sala-sikom mai.

¹⁰Maneniko o tebe-tebe mamahere Kristus nai dale ma, sona Manetualain tao o neuꞌ lahenda dale roos fo malole mo Ni. Ma kalu o manaku mae, Yesus dadi neuꞌ o Ramatua ma, sona Manetualain poꞌi-tata naa o meme sala-siko mara mai.

¹¹Nai Manetualain Susura Makamoi Na manaduiꞌ nae, “Lahenda fo namahere Manetualain, neuꞌ ko ta maeꞌ, huu fo Manetualain nau tao nadadiꞌ basa hata fo Ana nafada so a.”

¹²Lahenda Yahudi ra, ro lahenda fo ta Yahudi ra fa, sama. Ta esaꞌ ko enon fa. Huu fo Ramatuaꞌ noi esaꞌ a, ma Ana dadi Ramatuaꞌ soa-neuꞌ basa lahenda nusaꞌ. Ana nau natudu dale malole Na soa-neuꞌ basa lahenda fo hule tutulu-fafaliꞌ neuꞌ Ana.

¹³Sama leoꞌ manaduiꞌ nai Susura Makamoiꞌ a nae, “Basa lahenda fo hule tutulu-fafaliꞌ neuꞌ Ramatuaꞌ a, neuꞌ ko Ana poꞌi-tata naa si reme sala-siko nara mai.”

¹⁴Tehuu tao leoꞌ bea fo lahenda bisa hule tutulu-fafaliꞌ neuꞌ lahenda esa, kalu ara bei ta ramahere ni? Ma tao leoꞌ bea fo ara bisa ramahere ni, kalu ara bei ta parnaa ramanene laꞌe-neuꞌ ana? Tao leoꞌ bea fo ara bisa ramanene laꞌe-neuꞌ ana, kalu lahenda ta nafada si?

¹⁵Tao leoꞌ bea fo ara bisa rafada lahenda, kalu ta hapu esa nadenu si leoꞌ na? Nai Susura Makamoiꞌ a manaduiꞌ nae, “Maneniko lahenda neni Tutui Malole mai, sira mamain ria, malole a nan seli!”

¹⁶Tehuu emi bubuluꞌ mae, lahenda Israel ruma ta nau ramanene Manetualain Tutui Malole Na. Manetualain mana nesi matan Yesaya duiꞌ nae, “Ramatuaꞌ! Lahenda ra ta nau ramahere heheluꞌ fo ara ramanenen neme ami mai so a!”

¹⁷De Lahenda muste ramanene laꞌe-neuꞌ Kristus dei, besaꞌ ko bisa ramahere Ni. Ma muste tui-beka Manetualain Dedea-nafadan dei besaꞌ ko lahenda bisa ramanene.

¹⁸Au atane soba, leo iaꞌ: bate emi afi mae, lahenda Israel ara ta parnaa ramanene laꞌe-neuꞌ Kristus, do? Tantu ara ramanene so! Sama leoꞌ manaduiꞌ neme uluꞌ mai nai Manetualain Susura Makamoi Na daleꞌ nae, “Manetualain mana nesi mata nara helu laꞌe-neuꞌ Ramatuaꞌ a nanatui-nanabekaꞌ nai dae-bafoꞌ ia katemaꞌ so; Sira dedea-nafadan losa nai dae-bafoꞌ a bukun haas so.”

¹⁹Au nau atane seluꞌ hata esa ae, “Lahenda Israel ara ta bubuluꞌ Manetualain eno Na, do?” Taꞌa! Baꞌi Musa nana, lahenda masososaꞌ fo duiꞌ laꞌe-neuꞌ hata ria nae, Manetualain nafada lahenda Israel ara leo iaꞌ: “Au nau tao hata esa soa-neuꞌ lahenda nusa fekeꞌ ara. Hata ria neuꞌ ko tao na emi eteꞌao mara. Ma Au nau tao hata esa, soa-neuꞌ lahenda fo emi afi mae, sira koa-pakanaꞌ. Hata ria neuꞌ ko tao na emi heku nisi mara.”