Roma 4

1

2

3

4

5

6

7

8

9

10

11

12

13

14

15

16

¹Kỹ Judeu ag hỹn inh mỹ: “ẽg jóg'jóg ve pẽ tỹ Abraão hỹn hẽ ri ke tĩ?” he sór mũ.

²“Nén ũ há kar han ti tĩ, Abraão ti, hã tugrĩn tóg tỹ Topẽ mỹ ũn há nĩ,” he sór ag hỹn mũ, Judeu ag. Vó, hã tũ vẽ. Ti ki rã tugnĩn ke vẽ. Hã kỹ tag vỹ ti to rán kỹ nĩ, ha mẽ: “Abraão vỹ Topẽ ki rã, hã kỹ tóg tỹ Topẽ mỹ ũn há nĩ, ti tỹ ti ki rã tugrĩn,” he tóg mũ, Topẽ vĩ rán ki. Ti tỹ nén ũ há han tugnĩn Topẽ mỹ tỹ ũn há nĩ ra tóg vẽso: “tỹ sóg ũn há nĩ, ag kar kãfór,” henh ke mũ vẽ, vẽsỹ ũn há han sór kỹ. Hã ra ẽg vẽsỹ ũn há han ki kagtĩg nỹtĩ.

⁴Hã vé, ẽg rãnhrãj to ẽg tóg ẽg rãnhrãj kaja vég tĩ. Fagrĩnh mỹ ke tũ vẽ, ẽg rãnhrãj kaja ti.

⁵Topẽ jykre vỹ ge tũ nĩgtĩ. Ẽg tỹ ti ki ge kỹ ẽg tóg ti mỹ tỹ, ũn há nỹtĩ. Ẽg tỹ ti ki ge tugrĩn tóg ẽg mỹ vẽnh pãte fón tĩ, ẽg tỹ ti vĩ mranh ja ti. Ẽg rãnhrãj pijé'. Topẽ tỹ nén han mũn hã vẽ.

⁶Hã kỹ vãsỹ ẽg pã'i tỹ Davi tóg tó ja nĩgtĩ gé. Ũ tỹ nén ũ kórég han tĩ ẽn to tóg vĩ há han ja nĩ, Davi ti. Topẽ vỹ ẽg mỹ vẽnh pãte fón tĩ, ẽg tỹ ti vĩ mranh ja ti. Topẽ tỹ ũn mỹ vẽnh pãte fón ja ẽn to Davi tóg tag tó ja nĩgtĩ, ha mẽ:

⁷“Topẽ vỹ ẽg ve há han ke mũ, hã kỹ tóg ẽg mỹ ẽg tỹ ti vĩ mranh ja ẽn tỹ vẽnh pãte fón tĩ. Kỹ ẽg ve mãn ke tũ nĩ ha, ẽg jykre pãno ja ẽn ti, ti tỹ vẽnh pãte fón kỹ nĩn kỹ.

⁸Topẽ vỹ ẽg ve há han ke mũ, hã kỹ tóg ẽg mỹ ẽg tỹ ti vĩ mranh ja ẽn kaja kórég ẽn ven ke tũ pẽ nĩ,” he ja tóg nĩgtĩ, Davi ti.

⁹Kỹ Judeu ag hỹn inh mỹ: “Davi hỹn ũ tỹ hẽ to tag tó ja nĩgtĩ'?” he sór mũ. “Judeu jykre han mũ ag to ke mỹ vó, ag jykre han tũ ag to ke mỹ vó?” he sór ag hỹn mũ. Ẽg kar to ke vẽ. Hã vẽ, Abraão to sóg: “ti tỹ Topẽ ki rã tugrĩn tóg tỹ Topẽ mỹ ũn há nĩ,” he ja nĩ.

¹⁰Kỹ ti jykre tỹ Topẽ mỹ kuryj nĩ ẽn kã ti mỹ Judeu ag jykre han kỹ tĩ nĩ', Abraão ti'? Vó, ẽn kã ti ẽg jykre han tũ nĩ ver. Ẽn kã ti ã gré junun fár kym ja tũ nĩ ver.

¹¹Topẽ vỹ ti mỹ vẽnh pãte fón, ti tỹ ti ki rã tugnĩn, ti tỹ ver Israel ag jykre ki kagtĩg nĩn kã. Ti mỹ vẽnh pãte fón kar kỹ Topẽ tóg ti mỹ ẽg jykre tag nĩm ja nĩ, ti tỹ ã gré junun fár kym jé sir, vẽnh kar tỹ ti jykre há nĩ ki kanhrãn jé. Hã kỹ tóg tỹ ũ tỹ Topẽ ki ge mũ kar jóg nĩ sir, Abraão ti, ag tỹ Judeu ag jykre han tũ ra, ag tỹ ãjag fár kym tũ ra ke gé. Topẽ ki ge kỹ ẽg tóg Topẽ mỹ tỹ ũn há nỹtĩ, Abraão ri ke.

¹²Kỹ tóg tỹ Judeu jykre han mũ ag jóg'jóg ve pẽ nĩ gé sir, Abraão ti, ag tỹ ti mré Topẽ ki ge kỹ. Judeu jykre han to hã tóg Topẽ ki rã, ẽg jóg tỹ Abraão ti. Kỹ ẽg tỹ Topẽ ki ge kỹ tóg tỹ ẽg jóg pẽ nĩ gé sir, ẽg tỹ tỹ Judeu krẽ nỹtĩ ra Topẽ ki ge kỹ nỹtĩn kỹ.

¹³Topẽ vỹ Abraão mỹ: “ã krẽ vỹ ga kar mĩ mũnh mũ, kỹ tóg tỹ ag tũ kar nĩnh mũ,” he ja nĩgtĩ. Ti tỹ Topẽ vĩ kri fi tugrĩn tóg ti mỹ tag tó. Vẽnh jykre si ki króm tugnĩn ke pijé'. Ti tỹ Topẽ ki rã kỹ tóg ti mỹ tỹ ũn há nĩ, hã kỹ Topẽ tóg ti mỹ tag tó ja nĩ.

¹⁴Ha vé, ẽg tỹ Topẽ tỹ vãsỹ ẽg mỹ vẽnh jykre nĩm ja ẽn han sór mũ ra ẽg tóg mranh tĩ, kỹ Topẽ tóg ẽg vóg kónãn ke mũ vẽ sir. Hã kỹ ẽg tóg ti tỹ ẽg mỹ nén ũ há tó ja ẽn venh ke tũ pẽ nĩ vẽ sir. Ẽg vóg kónãn jé tóg ke mũ vẽ sir, kỹ tóg ẽg mỹ nén ũ há nĩm ke tũ nĩ vẽ sir. Kỹ tóg ẽg mỹ: “ha inh ki rã,” henh ke tũ nĩ vẽ gé. Topẽ tỹ ẽg vóg kónãn ke mũ hã ne kã nĩ vẽ', ti vĩ mranh tugrĩn.

¹⁶Hã ra tóg ẽg mỹ: “ha inh ki rã, sỹ ãjag mỹ nén ũ há ẽn han jé, ãjag tỹ inh ki ge tugrĩn,” he ja nĩgtĩ. Ti tỹ ẽg jagãgtãn hã vẽ. Topẽ tóg Abraão krẽ kar ag mỹ vin sór mũ, ã tỹ nén tó ja ẽn. Ti pi(jé) Judeu jykre han mũ ag tãvĩ mỹ vin sór mũ'. Ũ tỹ Abraão ri ke Topẽ ki ge mũ ag mỹ tóg vin sór mũ gé, Topẽ ti. Ẽg kar jóg'jóg ve vỹ tỹ ti nĩ, Abraão ti.

¹⁷Topẽ hã ne ti mỹ: “ã krẽ tỹ sóg povo e hyn han ke mũ,” he ja nĩ', hã kỹ tóg tỹ ẽg kar jóg'jóg ve pẽ nĩ. Rán kỹ ti nĩ, Topẽ vĩ rán ki. Kỹ tóg ti vĩ tag kri fi ja nĩgtĩ, Abraão ti, ã tỹ gĩr ve vãnh nĩ ra, ti kófa nĩn kỹ. Ũn ter mũ ag rĩnrĩr mãn han ki kanhró tóg nĩ, Topẽ ti. Kỹ tóg nén kar han ki kanhró nĩgtĩ gé. Nén ũ tóg tũ tĩ ver, hã ra Topẽ tóg nén ũ kar han tĩ, ã vĩ tỹ. Hã kỹ tóg Abraão mỹ ti kósin ke tó ja nĩgtĩ gé. Kỹ Abraão tóg ti vĩ kri fi ja nĩgtĩ. Ver tóg kósin ja tũ nĩ, ã kófa nĩ ra, hã ra tóg Topẽ vĩ kri fi ja nĩgtĩ, Topẽ tỹ ti mỹ: “ã krẽ tỹ sóg povo e hyn han ke mũ,” he ja tag to.

¹⁹Topẽ tỹ ti mỹ tag tó kỹ tóg 100 (ke) anos pétẽm, Abraão ti. Si há ti nĩ ja nĩgtĩ, ti prũ tỹ Sara fi ke gé. Gĩr han vãnh fag nỹtĩ, ẽn kã. Ẽn hã kã Topẽ tóg ti mỹ ti krẽ e hyn han ke tó ja nĩgtĩ. Kỹ tóg ti vĩ kri fi ja nĩgtĩ, to krónh ke tũ ja tóg nĩgtĩ. “Hỹ mỹ vỹ?” he ja tũ ti nĩgtĩ, Topẽ vĩ tag to. Ti vĩ kri fi kỹ tóg Topẽ to: “ũn mág vỹ tỹ ti nĩ,” he ja nĩgtĩ.

²¹“Topẽ vỹ ã tỹ nén tó ja han ki kanhró nĩ,” he ja ti nĩ, Abraão ti, to krónh ke tũ nĩn kỹ.

²²Tag hã tugnĩn tóg Topẽ mỹ tỹ ũn há nĩ, ti tỹ ã fe tỹ ti ki rãn kỹ.

²³Topẽ vĩ tó tĩ ũ tóg Abraão to rán ja nĩ, Topẽ vĩ rán ki, ti tỹ Topẽ mỹ tỹ ũn há nĩ ti.

²⁴Hã ra tóg ẽg to rán ja nĩ gé. Topẽ mỹ ẽg tóg tỹ ũn há nỹtĩnh ke mũ gé, Abraão ri ke, ẽg tỹ ti ki ge kỹ. Hã kỹ tóg ẽg Senhor tỹ Jesus rĩn mãn ja nĩgtĩ, ti ter ja tá.

²⁵Ẽg jagfy tóg ter ja nĩ, Jesus ti, ti tỹ ẽg tỹ Topẽ vĩ mranh tỹ tũg' he jé. Hã jé Topẽ tóg ti fẽg ja nĩ. Kỹ tóg ti rĩn mãn ja nĩ gé, ti tỹ ẽg mỹ vẽnh pãte fón jé, ẽg tỹ ti vĩ mranh ja ti.