Roma 4

1

2

3

4

5

6

7

8

9

10

11

12

13

14

15

16

¹Ere mang e nga dogned u murung’agen Abraham ni ir e chitamangidad? Be mang e pir’eg?

²Fa’an mang e mat’awnag Got Abraham ngak ni bochan e tin ni rin’ Abraham, me ere bay ban’en nrayag ni nge ufanthin Abraham nga murung’agen. Machane dabiyag ni nge ufanthin nga murung’agen ban’en u p’eowchen Got.

³Ya babyor nib thothup e be ga’ar, “Abraham e mich Got u wan’, me matha’eg Got ngak ni ir be’ nike mat’aw ni bochan e re michan’ rok nem ngak Got.”

⁴Ra maruwel be’ ma yima pi’ puluwon; machane puluwon ni yibe pi’ e danir finey nib tow’ath ngak fa’anem, ya ban’en ni ir e ke thognag.

⁵Ma be’ nde muruwliy ban’en me mich Got u wan’, ni fare Got ni ir e ma mat’awnag e pi tadenen, e ke matha’eg Got ngak ni ir be’ nib mat’aw ni bochan e ke mich Got u wan’.

⁶Ireray e ren’en ni i yip’ David fan ni fa’ani weliy murung’agen e felfelan’ ni tay fa’anem nde muruwliy ban’en me matha’eg Got ngak ni ir be’ nike mat’aw ni ga’ar:

⁷“Kari felfelan’ e pi’in ke n’ag Got fan u wan’ e kireb rorad, ni pi’in ke upunguy Got e denen rorad!

⁸Kari felfelan’ e en ni denen rok e dabki tay Somol ni malfith rok!”

⁹Gur re felfelan’ nem ni weliy David murung’agen e kemus ni pi’in kan maad’ad nagrad e farad? Danga’! Ku errogon ni fen e pi’in ndawor ni maad’ad nagrad. Ya kadogned e tin be yog e babyor nib thothup ni be ga’ar, “I Abraham e mich Got u wan’, ma bochan e re michan’ rok nem ngak Got me matha’eg Got ngak Abraham ni Abraham e be’ nike mat’aw.”

¹⁰Mingiyal’ e yodoro’? I yodoro’ u m’on ara tomuren ni kan maad’adnag Abraham? U m’on riy, ma gathi nga tomuren.

¹¹Fin nni maad’adnag nga tomur riy, ma maad’ad ntay ngak e ba pow ni nge micheg ni bochan e michan’ rok Abraham ngak Got ma aram e ke matha’eg Got ngak ni ir be’ nike mat’aw u m’on ndawor ni maad’adnag. Ere Abraham e kemang chitamngin urngin e pi’in ke mich Got u wun’rad ke matha’eg Got ngorad ni yad e pi’in kar mat’awgad, ni yugu aram rogon ni dawor ni maad’ad nagrad.

¹²Ma ku ir e chitamngin e pi’in kan maad’ad nagrad, ni gathi bochan e kan maad’ad nagrad, machane bochan e yad be ngongol nrogon ngongolen e pi’in ke mich Got u wun’rad ni ta’reb rogon ko ngongol ni i rin’ e chitamangidad i Abraham ko ngiyal’ ni mich Got u wan’, ma dawor ni maad’adnag.

¹³Got e yog ngak Abraham nge pi’in owchen ni bayi mil suwon e re fayleng ney ngorad. I yog Got e re bugithin ney ni gathi bochan e i fol Abraham ko fare Motochiyel, machane bochan e mich Got u wan’ me mathe’eg Got ngak ni be’ nike mat’aw.

¹⁴Ya fa’an mang e tin ni yog Got ni bayi pi’ e ngan pi’ ngak e pi’in yad be fol ko fare Motochiyel, me ere michan’ rok e girdi’ ngak Got e ra yan i aw nib m’ayfan ma tin ke yog Got ni yira pi’ e bm’ayfan.

¹⁵Fare Motochiyel e be fek e damumuw ku Got i yib ngodad; ya fa’an mang e dariy e motochiyel, me ere ku dabiyag ni ngan th’ab e motochiyel.

¹⁶Ere tin ni yog Got nra pi’ e ntay ni bay rogon ko mich u wun’uy ngak Got, ni fan e tin ke yog Got ni bayi pi’ e nge yan i aw nib tow’ath rok Got ngak urngin e pi’in owchen Abraham — ni gathi kemus ni pi’in yad be fol ko fare Motochiyel, machane ku errogon e pi’in ke mich Got u wun’rad ni bod rogon Abraham. Ya Abraham e chitamangidad ni gadad urngin e pi’in ke mich Got u wun’dad.

¹⁷Ni bod rogon ni be yog e babyor nib thothup ni be ga’ar, “Kug ngongliyem kam mang chitamngin bo’or e nem.” Ere pi thin ney nike yog Got e bfel’ u p’eowchen Got, ni ir e re Got nib mich u wan’ Abraham — ni ir fare Got nma faseg e yam’ mra non me sum e tin nda immoy ban’en.

¹⁸Ngiyal’ ni yan i m’ug nsusun e dakuriy rogon ni nge pagan’ Abraham ko tin ni yog Got ngak, e aram e par Abraham ni kab mich Got u wan’ ma be pagan’ ko tin ke yog Got ngak, ma aram me yag ni mang “chitamngin bo’or e nem.” Nri bod rogon ni be yog e babyor nib thothup ni be ga’ar, “Pi’in bay rabad ni owchem e yad ra pire’ ngar boded urngin e t’uf u lanelang.”

¹⁹Ke chugur ni nge gaman ra’ay e duw yangren; machane de me’waer e michan’ rok ngak Got ko ngiyal’ ni ba’aram ni leamnag ir me nang rok ni dabkiyag ni nge fakay e bitir, ma ku errogon Sarah ndabkiyag ni nge sum e bitir nga yin.

²⁰Ma de maruwar Got u wan’ ma ku de maruwar u wan’ e tin ni yog Got ni bayi rin’ ngak; me yib gelngin u daken e michan’ rok ngak Got, me pining e magaer ngak Got.

²¹Ya rib mich u wan’ nrayag rok Got e tin ke yog Got ngak ni bay rin’.

²²Aram fan nu daken e michan’ rok Abraham ngak Got e “matha’eg Got riy ngak Abraham nike mang be’ nib mat’aw.”

²³Pi thin ni ba’aray nike ga’ar e babyor e “matha’eg Got ngak ni ir be’ nike mat’aw” e gathi ni yoloy ni kemus ni ir e fan ngak.

²⁴Ya kani yoloy ni ku fan ngodad e pi’in bayi matha’eg Got ngodad ni kad mat’awgad, ni pi’in ke mich u wun’rad e cha’ ni ir e faseg e Somol rodad i Jesus ko yam’.

²⁵Nni pi’ ni ngem’ ni bochan e denen rodad, mi ni faseg ko yam’ ni fan e nge ta’dad ni kad mat’awgad ngak Got.