Proverbs 3:1-25

¹Fakag, dab mu pag talin e machib rog ngom. Gubin ngiyal’ ni ngi i par u wun’um e n’en kugog ngom ni ngam rin’.

²Machib rog e ra pi’ ngom e yafos nib n’uw ma bfel’ rogon.

³Dab mu pithig pa’am ko yul’yul’ nge t’ufeg. Mu the’ row nga bilel’ugnam; mag yoloy nga lanin’um.

⁴Fa’an ga ra rin’ ni arrogon, ma ga ra fel’ u wan’ Got nge girdi’.

⁵Mu pagan’um ngak SOMOL u polo’ i lanin’um, ma ri dab mu toer ko tin ga be finey ni ga manang.

⁶Ngu’um leamnag SOMOL u fithik’ urngin ban’en ni ga be rin’, me dag ngom e bin mat’aw e kanawo’.

⁷Dab mu leamnag ni gur e ga ba gonop; ya ngu’um par ni bay madgun SOMOL u wan’um, ma ga pag i rin’ e kireb.

⁸Fa’an ga ra rin’, ma ra yan i aw ni bod e falay ni bay angin nra golnag e yungin ke maad’ad u dowam me chuweg e amith rom.

⁹Tin be yib ko woldug rom e ngam fek e tin th’abi fel’ riy ngam pi’ ngak SOMOL, ni aram e ga be tay fan.

¹⁰Fa’an ga ra rin’, ma ra sug e grain u lan e pi naun rom ni kam toy ni tafen e grain, ma ra pire’ e wayin rom nge dabkum nang e gin ngam cha’riy ngay.

¹¹Fakag, fa’anra yal’uwegem SOMOL, ma ngar mu nang ni be ginangem.

¹²Ya SOMOL e ma yal’uweg e pi’in yad ba t’uf rok, ni bod rogon ba matam nma yal’uweg bpagel ni fak nib t’uf rok.

¹³Nge felan’ e en nike yag e gonop ngak, ya ke yib e tamilangan’ ngak.

¹⁴Ya fel’ nma yib riy e bo’or ko fel’ nma yib ko silber; ba ga’ fan ngom ko gol.

¹⁵Gonop e ka ba ga’ fan ko churwo’; dariy ban’en ni ga ba’adag nrayag ni ngam puluwnag ngay.

¹⁶Gonop e ra n’uwnag nap’am ko biney e tamilang, ma ra yagnag ngom e fel’ rogon nge tayfan.

¹⁷Gonop e ra i tayem ni ga bfelfelan’ ko biney e tamilang, mi i pow’iyem riy ndariy ban’en nra buch rom.

¹⁸Pi’in nra ur pired ni yad ba gonop e yad ba felfelan’, ya gonop e ra pi’ e yafos ngorad, ni bod rogon ba ke gek’iy ni yug be k’uf.

¹⁹I SOMOL e sunmiy e fayleng ko gonop rok; ma llowan’ rok e ayliy lanelang riy ngagil’.

²⁰Gonop rok e k’aring e pi lul’ nge yan nlul’ nge manileng ni nge pi’ e n’uw nga fayleng.

²¹Fakag, mu chichi’iy pa’am ko gonop rom nge nangan’. Dariy e ngiyal’ ngam pithig pa’am riy nge chuw rom.

²²Ra yib riy ngom ba yafos ni bfel’ ma ba felfelan’.

²³Ga ra yan ko kanawo’ rom ni dariy ban’en nra buch rom ma dariy e ngiyal’ nra tun em.

²⁴Ma dab mu rus ko ngiyal’ ni ga ra yan nga chob, ma ga mol ni n’umngin e nep’ nib mola’ram.

²⁵Ma dabi magfan’um ko riya’ nra yib nib tomgin, ni bod e tin ma yib ko pi’in kireb ni bod bang i lang.