Proverbs 31:5-23

⁵Yad ra unum, miyad pagtalin e motochiyel miyad fek owcharad u mat’wun e girdi’ nike t’uf e ayuw rorad.

⁶Alkul e fan ngak e pi’in ngarm’ad, ni pi’in ka ra bilged t’ay e gafgow.

⁷Ni pagrad ngar unumed ngar paged talin e gafgow rorad nge kirban’ rorad.

⁸“Mu non ni pa’ e girdi’ ni dabiyag e numon rorad. Ma ga ayweg mat’wun urngin e pi’in yad bme’waer.

⁹Mu non ni pa’rad ma ga mang ba tapufthin nib mat’aw. Ma ga ayweg mat’wun e gafgow nge pi’in kri t’uf e ayuw rorad.”

¹⁰Ri ba mo’maw’ ni ngan pir’eg reb e bpin nib tafolop ni ngan le’engiy! Re bpin nem e kaba thum’ felngin nga wuru’ e tin th’abi fel’ e churwo’ nib tolang puluwon!

¹¹Figirngin e be par nib pagan’ ngak, ma dabi gafgow figirngin.

¹²N’umngin nap’an e yafos rok e re pin nem ni bay i par ni be rin’ e tin ni bfel’ ngak figirngin, ma dabi rin’ ban’en ngak nib kireb.

¹³Ma yugu be ngongol ni aram e be fal’eg e mad u bunu’en e saf, nge mad ni wech.

¹⁴Ma be fek e ggan u urel i yib nga tabinaw rok, ni bod e barkow nma fek e chugum i yib.

¹⁵Ma od ndawori tamilang nge ngongliy e ggan ni nge kay e girdi’ ko tabinaw rok, me weliy ngak e ppin ni tapigpig rok e n’en ni ngar rin’ed.

¹⁶Ma be changarnag e binaw nge chuw’iy ko salpiy ni ir e thognag, me yung e woldug ngay.

¹⁷Ma ba madangdang ko maruwel ma ba gel.

¹⁸Ma manang feni ga’fan e pin’en ni be ngongliy, mma maruwel nge n’uw e nep’.

¹⁹Ma finathiy e tret rok me ir e ma lifith e mad rok.

²⁰Ma ba gol ngak e pi’in gafgow nge pi’in nib t’uf e ayuw rorad.

²¹Ra taw nga nap’an ni nge aw e ayis ma der ma magafan’, ya bay e mad nib magowel ni fen gathon e tabinaw rok.

²²Ma ngongliy e mad ni ngan filath nga daken e chob, mma chuw ko mad ni bfel’ ma ba ra’en purple.

²³Ma figirngin e ba ga’ bugwan, me ir reb fapi girdi’ nma yog e thin u lan binaw.