Proverbs 17:16-28

¹⁶Dariy gam’ingin ngak be’ nib balyang ni nge n’ag e salpiy ko sukul, ya dariy e nangan’ rok.

¹⁷Pi tafager e gubin ngiyal’ ni yad ma dag e t’ufeg rorad. Mang gam’ingin e walag ni fa’anra dab ra puruy’ niged e gafgow rorad.

¹⁸Go’ en de gonop e ra micheg ni nge milfan e malfith rok be’ ngak.

¹⁹Ra ga ba’adag e denen ma kag ba’adag e k’ar oloboch. Fa’anra ga be yin’ ufan e fel’rogon nga dakenam ma aram e oloboch e ga be ning.

²⁰En ni ba kireb e leam nge thin rok e nge nang uwan’ ni dabi pir’eg ban’en ni bfel’ — kemus ni go’ kireb e ra i mada’eg.

²¹Go’ kirban’ nge gafgowan’ e ra i tay e gallabthir rok e bitir nib balyang ngongolen.

²²Fa’anra ga ba felfelan’ ni ga ma par ma ba falay nga fithik’ i dowam. Kirkireban’ e ma mliknag e pi yil.

²³Pi judge ni kireb e ma fanay puluwon e sasalap nib mith, ma aram e tin ni bfel’ dab nrin’.

²⁴Be’ nib llowan’ e ma nameg e ngongol nib gonop, ma en nib balyang e der muduwgil e gin nge yan ngay.

²⁵Bitir nib balyang e ma gafgownag lanyan’ e chitamngin mma ngochngochan’nag lanyan’ e en ni diyennag.

²⁶De fel’ ni ngan pag be’ ni bfel’ e rok nge bakking; fa’anra ni gechignag e pi’in ni bfel’ e rorad ma aram e kan dalibnag e n’en nib mat’aw.

²⁷Cha’ nib sul lanyan’ ngak e gathi gubin ngiyal’ nma welthin. Girdi’ ni be par nib paslog e ba ga’ e nangan’ rorad.

²⁸Mus ngak be’ nib balyang mrayag ni ngan leamnag nib gonop mab llowan’ ni fa’anra par nib math gulngan nike ning langan.