Proverbs 16:2-32

²Rayag ni ngam leamnag ni urngin e tin ni ga be rin’ e ba manigil, machane SOMOL e ma thabthabelnag rogom.

³Ngam tay nga pa’ SOMOL nge fal’eg wa’athan urngin e tin ka mu finey ni ngam rin, mra yal’uw rogon ni ngam muruwliy.

⁴Urngin ban’en ni ngongliy SOMOL e bay e gin nge yani mada’ ngay, ma girdi’ ni kireb e gechig e ra mada’nag.

⁵I SOMOL e dabun gubin e pi’in tolngan’; ma dariy liben me pagrad ngar thaygad ko gechig.

⁶Mu par ni ga ba yul’yul’ ma rogon e rogon ma bay e michan’ rom, mra n’ag Got machan e denen rom. Ngu’um liyor ngak SOMOL ma dariy ban’en nra buch rom.

⁷Nap’an ga ra fel’ u wan’ SOMOL, ma rayag ni ngam pingeg e pi to’ogor rom ngar manged fager rom.

⁸Bfel ni bochu’uw ban’en rom nim thognag u fithik’ e yul’yul’ ko bin nge yo’or ban’en rom ni yag ngom u fithik’ e sasalap.

⁹Rayag ni ngam tanomnag e pin’en ni ngam rin’, machane Got e be pow’iy e ngongol rom.

¹⁰Ba pilung e ma non ni ba mathangeluwol lungun; ma tin ma duwgiliy e gubin ngiyal’ nib mat’aw.

¹¹I SOMOL e ba’adag e thabthabel nge yungi fol nib yul’yul’ ya nge gubin e chuway’ ni ngan tay ma bfel’ rogon.

¹²Pi pilung e dabi k’adan’ ko kireb, ya tin nib mat’aw e aram e n’en nma gelnag e am.

¹³Pilung e ba’adag ni nge rung’ag e tin riyul’ mma fol ngak e pi’in yad e rogned.

¹⁴Be’ nib gonop e ma guy rogon ngi i par fare pilung nib felfelan’; ya fa’anra damumuw fare pilung ma rayag ni nge yim’ be’.

¹⁵Yira fel’ u wan’ fare pilung ma bod e manileng ni be kunuy ir ni nge aw nn’uw u ngilan’ e spring— bay e yafos riy.

¹⁶Rib fel’ nrib pag feni fel’ ni nge yag e gonop nge llowan’ ko bin nge yag e gol nge silber.

¹⁷Pi’in yad bmanigil e yad ma yan u kanawo’ nib gilaf ko kireb; ere mu fal’eg i yaliy e gin ga be sor ngay — rayag ni nge ayweg e yafos rom.

¹⁸Tolngan’ e be sor i yan ko riya’, ma ufanthin e be sor i yan ko gin yira mul riy.

¹⁹Kabfel’ ni ngam sobutan’ ma ga par ni ga ba gafgow ko bin ngam mang be’ nib tolangan’ ngam un i f’oth e tin kar laged u fithik’ e yargal.

²⁰Ngam tiyan’um ko tin kan fil ngom, ma ga man’og i yan; me pagan’um ngak SOMOL ma ga par ni ga ba felfelan’.

²¹Be’ nib gonop ma ke ilal lanyan’ e yira nang u rogon feni tamilngan’ u ban’en. Ya feni fel’ e thin rok, e aram feni be m’agan’uy ko tin be weliy.

²²Gonop e ba athang’el ko yafos ngak e pi’in bay rorad, machane pi’in balyang e balyang rorad e ma girengiy e gechig nga dakenrad.

²³Gumircha’ rok be’ nib tamilangan’ e ma pow’iy u m’on ko mang e nge yog, ma dap’ilugun e ma manging’nag.

²⁴Thin ni bfel’ e bod e honey— nib athibthib ma bfel’ nga fithik’ i dowey.

²⁵Bay e wo’ nma leamnag e girdi’ nib mat’aw machane ba sor ko yam’.

²⁶Feni gel e mak’iy nike yib ngom, e aram feni gel e maruwel ni ga be tay.

²⁷Girdi’ ni kireb e yad be gay rogon ni ngar gafgow niged boch e girdi’; mus ko thin rorad ma be yik ko kireb.

²⁸Girdi’ ni kireb e yad ma nonnon i yan; yad ma k’aring e oloboch ma yad ma wereg e pi tafger.

²⁹Girdi’ ni tamacham e yad ma sabanbannag e pi tafger rorad ngar soregned yad ko oloboch.

³⁰Mu kol ayuw ko pi girdi’ ni yad ma siminmin ma yad t’ar owcharad ngom; ya kar leam naged ban’en nib kireb.

³¹Yafos nib n’uw nap’an e towa’th rok e pi’in nib mat’aw; ma manna’ u lolugenrad e ba te’elyaw nib gamog.

³²Kabfel’ ni ngam gumaen’ ko bin ngam ma’ngach. Kabfel’ ni ngam nang rogon i gagiyeg nagem ko bin ngam gagiyegnag e binaw ni polo’.