Proverbs 15:8-29

⁸Ma felan’ SOMOL ko ngiyal’ nra meybil e girdi’ ni bfel’, mma fanenikay e pi maligach nma pi’ e pi’in kireb ngak.

⁹I SOMOL e ba fanenikay e ngongol rok e pi’in kireb, machane ba t’uf rok e pi’in ma rin’ e tin nib mat’aw.

¹⁰Fa’an ga ra rin’ e n’en nib kireb, ma yira gechig nagem nib gel; ga ra yim’ ni fa’anra dab mu pag ngan yal’oweggem.

¹¹Mus ko fayleng ko yam’ ma dabiyag ni ngar mitheged ban’en u rom rok SOMOL ni dabi nang; ere urgon me yag rok be’ ni nge mithag e leam rok ku Got?

¹²Girdi’ ni tolngan’ e daburad ni ngan yal’owegrad; dariy e ngiyal’ ni yad ra ning e fanow ngak e pi’in gonop.

¹³Nap’an nra felfelan’ e girdi’, mra siminmingad, ma nap’an nra kireban’rad, me gafgow ya’arad.

¹⁴Girdi’ nib llowan’ e ba’adag ni nge fil ban’en, machane pi’in pinat e yugub fel’ u wan’rad ni dar nanged ban’en.

¹⁵Par ko pi’in gafgow ndariy ban’en rorad e ba math’kenyil’, machane girdi’ nib felfelan’ e gubin ngiyal’ ma bfel’ u wun’rad e yafos rorad.

¹⁶Kabfel’ ni ga ba gafgow ma bay madgun SOMOL u wan’um ko bin nge yo’or ban’en rom ma der aw e gapas u wan’um.

¹⁷Kabfel’ ni ngu’um ked e girdi’ nib t’uf rom e ggan ni go’ ggan u ta’bang, ko bin ngu’um koy e tin th’abi fel’ e ufin ko gin bay e fananikan riy.

¹⁸Damumuw nib gel’ e ma k’aring e tugthin, machane gumaen’ e ma pi’ e gapas.

¹⁹Fa’anra ga ba gamead, mra um mada’nag e momaw’ u gubin yang, machane fa’anra ga ba yul’yul’ ma dab mu oloboch.

²⁰Bitir nib gonop e ra felfelan’nag e chitamngin. Kemus ni en nib balyang e ma fanenikay e chitiningin.

²¹Girdi’ nib pinat e yad ma felfelan’ u fithik’ e pi balyang rorad, machane pi’in gonop e ra rin’ e n’en nib manigil.

²²Mu fek gubin e fanow nrayag ngom, ma rayag e tin ga be leamnag; mra dariy ma dabi fel’ rogom.

²³Ri dakriy ba felfelan’ ngay, ni ga ra pir’eg e re bbugithin nib mat’aw ni nganog ko ngiyal’ ni ngamog.

²⁴Girdi’ nib gonop e be yan ko kanawo’ nib sor ngalang ko yafos, ma gathi ba kanawo’ ni sor nga but’ ko yam’.

²⁵I SOMOL e ma gathey e tabnaw rok e pi’in tolngan’, mma yoror u tafen be’ nike yim’ figirngin.

²⁶I SOMOL e ba fananikay e leam ni kireb, machane bm’aguwan’ e thin ni gol.

²⁷Ga ra guy rogon ni nge yag e win ngom u fithik’ e sasalap, ma aram e oloboch ni nge yib nga tabnaw rom. Dab mu fek puluwon e sasalap me n’uw e yafos rom.

²⁸Pi’in manigil e yad ma leam u m’on mfin ra pi’ed e fulweg u ban’en. Ma pi’in kireb e rib gur e fulweg rorad, machane ma k’aring e oloboch.

²⁹Nap’an nra meybil e girdi’ ni bfel’ me motoyil SOMOL, machane ma sabalbalyang ko pi’in kireb.