Proverbios 31:16-31

¹⁶Nainu-nued amidaed, geb nainu bakdaed, nainugi, uvaʼbi bipirmaknai imakdaed.

¹⁷Ome, arbaega, guagwar gunaidaed, gandikidba na surgan-minaidaed.

¹⁸Ome, e-ibmar-ukedi nueganbi nasgumaidaed. Mutikidbali, e-neggi gwallu-dummad akinsisulid, ar mutik-mutik arbasidaed.

¹⁹Argan-nailik mor-sobed-naku gani sidaed. Argan-baidsik, dub ebisidaed.

²⁰Ome, dule-wileged-bendakdaed, dule-ibmar-abesaagudiid-bendakdaed.

²¹Dambed-sibudik-sibudik batealile, e-mimmiganga bukib-binsadasulid. Ar bela e-mimmigan dambed-mor yoyoidbi damalad.

²²Ome na dukin, ubsan-mor-uki mor-baid makdaed, mor-suir-akwagiid yoidaed, lino-mor-sunsogmalad yoidabalid.

²³Dulemar bela neggweburgi e-sui mag-dakedbimalad. E-sui, ibmar-dummadga dummagan-abargi simogad.

²⁴Ome, lino-mor-nued-sobedi, saderba-mor-nagumalad-imakedi, dulemar-ibmar-ukmaladga manigi ukdaed.

²⁵Ome, innikigwadba gudidaed. E-nug dummarbaa gued. Ibmar-guoedga, bukib binsadasulid, ega alledaed.

²⁶Sunmakdele, binsaed-nikaa sunmakdedaed, dule-odurdakdele, sabekwaa dule-odurdakdaed.

²⁷E-neguya-selemaidgi nue-nakuledaed, e-mani-amiedginbi na mas-gundaed.

²⁸E-mimmigan, e-nanga sokardaed, bedi nan-nuedye. E-sui, e-ome-nug odummodamogad. Ega sogdaed:

²⁹“Ome-nuegan bukidar nikaye, degi-inigwele, bedi amarba bur bule ome-nuedye.”

³⁰Yeerdaklegedi, dule-yamogedid. Yeerdaklegedi, sikwas yeer dakledaed. Ome Bab-Jehová-dobee-nanaeddi, e-nug odummolegoed.

³¹Dulemar, ome-e-ibmar-imaked magar dakmarsun. Bela dulemar-abargi e-nug odummolesun.